Փաստ ինֆո

Փաստաբան Նորայր Նորիկյանը ֆեյսբուքյան իր էջում արձագանքել է ապրիլ ամսին Դանիայի միգրացիայի մինիստրության ներկայացուցիչների հետ ՀՀ Վճռաբեկ դատարանի նախագահի հանդիպման ժամանակ վերջինիս արտահայտած մտքերին, որոնք վերջին օրերին տարբեր ԶԼՄ-ների և անձանց կողմից բուռն քննարկման առարկա են դարձել:

Հանդիպման ընթացքում, ըստ հրապարակված տեղեկությունների, պատախանելով կոռուպցիայի մասին տրված հարցին, Ա.Մկրտումյանը հայտնել է, որ իրենց խնդիրն այն է, որ որոշ փաստաբաններ իրենց վստահորդներից խարդախորեն կորզում են գումարներ, որոնք, իբրև թե որպես կաշառք, պետք է փոխանցվեն դատավորներին:

«Ինձ համար իսկապես մտահոգիչ է, որ մինչ այս պահը ՀՀ վճռաբեկ դատարանը չի արձագանքել նշված հրապարակումներին և չի պարզաբանել, թե ինչի՞ մասին է խոսքն առհասարակ»,- նշում է փաստաբանը:

Ն. Նորիկյանը գտնում է, որ ՀՀ վճռաբեկ դատարանի նախագահը պարտավոր է համապատասխան պարզաբանումներ ներկայացնել վերը նշված տեղեկությունների կապակցությամբ, իսկ խարդախությամբ զբաղվող անձանց մասին ունեցած տեղեկությունները հայտնել իրավասու մարմիններին՝ համապատասխան քրեաիրավական գնահատական տալու համար:

Միաժամանակ փաստաբանը գտնում է, որ ՀՀ փաստաբանների պալատը պատվախնդրորեն պետք է հետամուտ լինի՝ պարզելու համար, թե ովքե՞ր են հանդիսանում այն անձինք, ովքեր ունենալով փաստաբանի կարգավիճակ, ըստ ՀՀ վճռաբեկ դատարանի նախագահի, զբաղված են իրենց վստահորդներից խարդախորեն գումարների կորզմամբ, որոնք, իբրև թե որպես կաշառք, պետք է փոխանցվեն դատավորներին:

«Եվ առհասարակ, ինձ համար մի բան անքննարկելի է. կլինի դատավո՞ր, թե՞ փաստաբան, կաշառք տվո՞ղ, թե՞ վերցնող, հանցագործը պետք է պատժվի…»,- եզրահանգել է փաստաբան Նորայր Նորիկյանը:

Աղբյուր` Փաստինֆո