Փաստ ինֆո

Կառավարությունն Ազգային ժողովի քննարկմանն է ներկայացրել «Հանրային ծառայության մասին», «Դատախազության մասին» օրենքներում և Վարչական իրավախախտումների վերաբերյալ, ՀՀ քրեական ու քրեական դատավարության օրենսգրքերում փոփոխությունների և լրացումների օրենսդրական փաթեթը:

Ինչպես Ազգային ժողովում հայտնեց հիմնական զեկուցող՝ ՀՀ արդարադատության նախարար Արփինե Հովհաննիսյանը,  օրինագծերի փաթեթը «նպատակ ունի կարգավորել բարձրաստիճան պաշտոնատար անձանց և նրանց հետ փոխկապակցված անձանց եկամուտների հայտարարագրման և այդ գործընթացի ոչ պատշաճ իրականացման, կամ կարգի չպահպանման, կամ ժամկետներում չներկայացման դեպքում առաջացող իրավահարաբերությունները»:

Ըստ նրա՝ նախաձեռնությունը մշակվել է հակակոռուպցիոն ռազմավարության շրջանակներում և նպատակ ունի կարգավորել այն հարաբերությունները, որոնք Հայաստանում «նյութական իմաստով վաղուց կարգավորված էին, սակայն հետևանքային առումով՝ ոչ»:

Միջազգային փորձն այս առումով տարբեր է՝ կապված, թե կոնկրետ երկրում հայտարարագրման ինչպիսի մեխանիզմ է գործում՝ կենտրոնացված, թե ապակենտրոնացված, ինչից կախված է վրա հասնող պատասխանատվությունը՝ կարգապահական, վարչական կամ քրեական:

ՀՀ կառավարությունն Վարչական իրավախախտումների վերաբերյալ ՀՀ օրենսգրքում առաջարկում է հետևյալ փոփոխությունը. եթե պաշտոնատար անձը կամ նրա հետ փոխկապակցված անձը Բարձրաստիճան պաշտոնատար անձանց էթիկայի հանձնաժողով հայտարարագիր չի ներկայացնում, դա առաջացնում է նախազգուշացում: Դրանից հետո 30 օրվա ընթացքում հայտարարագիր չներկայացնելն առաջացնում է վարչական տուգանք՝ 200 հազար դրամի չափով:

Երկրորդ խախտումը՝ հայտարարագիր ներկայացնելու պարտականություն ունեցող անձի կողմից հայտարարագիրը՝ դրա լրացման նկատմամբ պահանջների կամ ներկայացման կարգի խախտմամբ էթիկայի հանձնաժողով ներկայացնելը, պատասխանատվության առումով ևս երկու մասի է բաժանվում՝ նախազգուշացում և դրանից հետո 30-օրյա ժամկետում ներկայացման կարգին համապատասխան չներկայացնելու դեպքում՝ վարչական տուգանք՝ 200 հազար դրամի չափով:

Պատասխանատվություն առաջացնող երրորդ խախտումը՝ հայտարարագիր ներկայացնելու պարտականություն ունեցող անձի կողմից անզգուշությամբ սխալ կամ ոչ ամբողջական տվյալ ներկայացնելը, առաջացնում է պատասխանատվություն՝ 200 հազարից 400 հազար դրամի չափով:

Վարչական իրավախախտումների վերաբերյալ գործերը քննում և վարչական տույժեր է նշանակում Բարձրաստիճան պաշտոնատար անձանց էթիկայի հանձնաժողովը:

ՀՀ քրեական օրենսգրում առաջարկվող լրացումներով՝ հայտարարագիրը վարչական տույժի կիրառումից հետո 30 օրվա ընթացքում Բարձրաստիճան պաշտոնատար անձանց էթիկայի հանձնաժողով դիտավորությամբ չներկայացնելը`պատժվում է տուգանքով՝ 1,5 մլն-ից 2 մլն դրամի չափով, կամ ազատազրկմամբ՝ առավելագույնը երկու տարի ժամկետով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը երեք տարի ժամկետով կամ առանց դրա:

Նույն արարքը, որը հանգեցրել է առանձնապես խոշոր չափերով գույքի կամ եկամտի չհայտարարագրմանը, պատժվում է ազատազրկմամբ՝ երկուսից չորս տարի ժամկետով՝ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը երեք տարի ժամկետով կամ առանց դրա:

Նշենք, որ կառավարությունն առաջարկում է, որպեսզի այս փոփոխություններն ուժի մեջ մտնեն 2017 թվականի հուլիսի 1-ից:

Աղբյուր` Փաստինֆո