Փաստ ինֆո

«Անելիք» բանկի իրավաբանական վարչության պետ Հովհաննես Աթանյանի սպանության գործով այսօրվա նիստում ամբաստանյալ Մկրտիչ Պողոսյանի պաշտպան, փաստաբան Սարգիս Ասլանյանը հայտարարեց, որ քանի որ իր պաշտպանյալն իր ծառայություններից hրաժարվելու հայտարարություն չի անում, ինքն է ցանկանում հրաժարվել պաշտպանություն իրականացնելուց` պաշտպանական մարտավարության հարցում ծագած տարաձայնությունների պատճառով: Ամբաստանյալը չառարկեց այդ որոշման դեմ և ժամանակ խնդրեց նոր պաշտպան ներգրավելու համար: Միջնորդությունը բավարարվեց:

Լրագրողների հետ զրույցում ամբաստանյալի կինը որպես  տարաձայնությունների հնարավոր պատճառ նշեց իր կողմից ՀՀ գլխավոր դատախազին բողոք ներկայացնելու հանգամանքը: Նա հայտնեց, որ սպանվածի հարազատներից մեկը` նրա աներորդին,  դատական նիստի դահլիճում հարվածել է իր ամուսնուն: «Ես այնքան ժամանակ չգրեցի բողոքը` մեր փաստաբանին ասելով, որ այդ հարցերը լուծի»,- ասաց տիկինը` հավելելով, որ այնուհետև` անցած չորեքշաբթի, ինքը  այդ միջադեպի հետ կապված բողոք-դիմում է ներկայացրել ՀՀ գլխավոր դատախազին: Նա բողոքում դժգոհություն է հայտնել նաև այն կապակցությամբ, որ սկզբնապես իր ամուսնուն մեղադրանք է առաջադրվել ՀՀ քրեական օրենսգրքի 104-րդ հոդվածի 1-ին մասով` սպանություն, սակայն յոթ ամիս անց նրա մեղադրանքը փոխվել է նույն հոդվածի երկրորդ մասի: Կինը վիճարկում է մեղադրանքի հոդվածը. հայտարարելով, որ մեղադրանքը պետք է ըստ արժանվույն գնահատվի` «ոչ թե 6-7 մարդու քնած ժամանակ սպանած Պերմյակովի հոդվածը դնեն այդ մարդու վրա»: Ըստ կնոջ, «հարյուր մլն-ի ապրանքի վաճառք են արել անօրինական ձևով` հիպոթեքով ու գրավի առարկա են սարքել 80 անուն շարժական գույքը` բանկն ու իրենք»:

Ամբաստանյալի կինը հայտնեց, որ իր ամուսնուն հարվածելու պատճառով շտապօգնություն է հրավիրվել, աչքը կապտել ու արյուն էր լցվել, «տեսողությունն էլ հարվածի ժամանակ գնացել էր», ուստի հարվածողը պետք է պատասխան տա կալանավորին հարվածելու համար:

Հիշեցնենք, որ 2015թ. նոյեմբերի 24-ին` ժամը 20:40-ի սահմաններում, Վարդանանց փողոցում որսորդական հրացանից արձակված կրակոցով սպանվել էր «Անելիք» բանկի իրավաբանական վարչության պետ Հովհաննես Աթանյանը: Սպանությունը կատարելու մեջ մեղադրվում  է տաքսու վարորդ Մկրտիչ Պողոսյանը, ով  բանկի հետ ունեցել է գույքային վեճ, ինչի կապակցությամբ նախկինում մի քանի անգամ հանդիպել է բանկի իրավաբանական վարչության պետին: Վերջին հանդիպումը տեղի է ունեցել դեպքի օրը՝ բանկում, որից ժամեր անց տեղի է ունեցել սպանությունը։

2012թ-ի սեպտեմբերին Պողոսյանները վաճառել են Փարաքարում գտնվող, իրենց ընտանիքին պատկանող «Անգելինա» ռեստորանը, որի ներսում գտնվող գույքը նույն պայմանագրով անհատույց օգտագործման պայմանագրով հանձնվել է ռեստորանի նոր տիրոջը: Նա էլ  գրեթե անմիջապես գրավադրել է ռեստորանի անշարժ գույքը «Անելիք բանկ»-ում` դրա դիմաց ստանալով 1.300.000 ԱՄՆ դոլարի վարկ: Սակայն հետագայում վարկային պարտավորությունները չի կատարել, որի պատճառով էլ գրավադրված գույքը դարձել է բանկի սեփականությունը: 

Իմանալով այս մասին Մկրտիչ Պողոսյանը դիմել է բանկ` ռեստորանում մնացած իր գույքի դիմաց բանկից պահանջելով 300.000 ԱՄՆ դոլար: Բանկը, սակայն հրաժարվել է վճարել կամ վերադարձնել գույքը` պատճառաբանելով, որ ռեստորանային համալիրում գտնվող շարժական գույքը նույնպես հանդիսացել է գրավի առարկա, որի նկատմամբ բռնագանձում է տարածվել և այն չի կարող վերադարձվել իրեն:

Այս հարցի շուրջ Մկրտիչ Պողոսյանը 2012թ-ից մինչ օրս բազմիցս հանդիպել է բանկի իրավաբան, այնուհետև իրավաբանական վարչության պետ Հովհաննես Աթանյանին, բայց մերժում ստացել:

Մկրտիչ Պողոսյանը նաև դատարան է դիմել` դատական կարգով փորձելով վերականգնել իր խախտված իրավունքները: Բայց քաղաքացիական գործերի քննությունը դեռևս չավարտված՝ Մկրտիչ Պողոսյանն իմացել է, որ «Անգելինա» ռեստորանը` իրեն պատկանող գույքով, դարձյալ շահագործվում է:

Լուսանկարը՝ Քննչական կոմիտեի

Աղբյուր` Փաստինֆո