Փաստ ինֆո

Ծանոթ կնոջ սպանության մեջ մեղադրվող Ռոբերտ Հովհաննիսյանի գործով այսօրվա դատական նիստում պաշտպանական կողմի միջնորդությամբ որպես վկաներ հարցաքննվեցին Դատահոգեբուժական ու դատահոգեբանական համալիր փորձաքննություն անցկացրած երկու հոգեբույժ փորձագետներ:

Ամբաստանյալի պաշտպան Սարգիս Ասլանյանը նշեց, որ որևէ խնդիր չկա եզրակացության հոգեբուժական մասով, սակայն կա խնդիր հոգեբանական մասով: Մասնավորապես, պաշտպանը դատարանի, դատավարության մասնակիցների ու վկայի ուշադրությունը հրավիրեց այն հանգամանքի վրա, որ զուտ հոգեբանական կատեգորիայի՝ աֆեկտի, մասին դատողություններ են արել ու ստորագրել նաև այդ մասով փորձաքննության եզրակացությունը հոգեբույժները:

Փորձագետ Սուքիասյանը նշեց, որ այդ հարցն իրենց ուղղված հոգեբուժական բնույթի հարցի շարունակությունն է, դրա համար էլ պատասխանել են նաև դրան:

Ըստ փորձաքննության եզրակացության, որը ստորագրել են չորս հոգեբույժները, նշվել է, որ հոգեկան խիստ հուզմունքի վիճակը՝ աֆեկտը, բացակայում է, անգամ այն անհավանական է, առկա է եղել ընդամենը հոգեկան լարվածություն և ոչ ավելին:

Իսկ երկու հոգաբաններից մեկն առանձին եզրակացություն է գրել, որովհետև համամիտ չի եղել հանձնաժողովի հետ և գտել է, որ աֆեկտն առկա է, մյուս հոգեբանը նույնպես գտել է, որ աֆեկտը բացակայում է:

Պաշտպանի հարցադրումներին ի պատասխան փորձագետը հաստատեց, որ իրենք՝ փորձաքննություն անցկացնող հանձնաժողովի անդամները, հրավիրվել են քաղաքային դատախազություն, որտեղ 15-20 րոպե տևած զրույցի ընթացքում պաշտոնատար անձը, որի անունն ու պաշտոնը վկան չմտաբերեց, իրենց հորդորել է տեղավորվել ժամկետներում և տալ մաքսիմալ օբյեկտիվ փորձաքննության եզրակացություն:

Դատարանի այն հարցին, թե՝ իսկ քանի՞ դեպք ունեք, որ օբյեկտիվ եզրակացություն չի տրվել, վկան պատասխանեց՝ չի եղել:

Երկրորդ փորձագետ Ղահրամանյանը նշեց, որ ըստ կարգի, հոգեբույժները հոգեբուժական և հոգեբաններն հոգեբանական մասով են եզրակացություն գրում, սակայն քանի որ հոգեբուժական հարցի մեջ կար նաև հոգեբանական հարց, ուստի իրենք գրել են՝ ոչ հոգեկան խանգարում կա, ոչ էլ աֆեկտ:

Նշենք, որ սա արդեն երրորդ եզրակացությունն է՝ ըստ առաջինի, աֆեկտի վիճակ եղել է, ըստ երկրորդի՝ չի եղել, իսկ ըստ երրորդ եզրակացության, հոգեբույժները միահամուռ արձանագրել են, որ աֆեկտը բացակայում է, իսկ երկու հոգեբանները տվել են իրար հակասող եզրակացություններ:

Հաջորդ դատական նիստում կհարցաքննվեն հոգեբան փորձագետները:

Հիշեցնենք, որ ըստ մեղադրական եզրակացության, Ռոբերտ Հովհաննիսյանը 2013թ.հոկտեմբերի 24-ին՝ ժամը 15.00-ից մինչև 17.00-ն ընկած ժամանակահատվածում, վիճաբանել է բնակարանի բնակչուհու հետ, որի ընթացքում նրան շահադիտական դրդումներով սպանելու դիտավորությամբ՝ սուր, ծակող-կտրող գործիքով մի շարք հարվածներ է հասցրել նրա մարմնի տարբեր մասերին՝ հասցնելով առողջության ծանր վնաս՝ կյանքին վտանգ սպառնացող և առաջացած արյան սուր կորստի հետևանքով ապօրինաբար կյանքից զրկել է կնոջը, ապա տիրանալով բնակարանում գտնվող 80.000 ՀՀ դրամ կանխիկ գումարին և թվով 5 հատ ոսկյա զարդերին՝ դեպքի վայրից դիմել է փախուստի:

Աղբյուր` Փաստինֆո