Փաստ ինֆո

ՀՀ քաղաքաշինության նախարարությունը կոմիտեի վերածելու և մշակույթի նախարարության ենթակայությամբ գործող հուշարձանների պահպանության գործակալությունը ձևավորվելիք՝ ճարտարապետության և հուշարձանների պահպանության պետական կոմիտեի կազմի մեջ մտցնելու վերաբերյալ կարծիքներ են հայտնում բնագավառի մասնագետները՝ ճարտարապետներ, շինարարկեր, կոնստրուկտորներ…

Գրիգոր Ազիզյան, Հայնախագիծ ինստիտուտի տնօրեն

Սխալ էլ չեմ համարում, դա կառավարության գործն է: Առանձնապես գործառույթների մեջ փոփոխման խնդիր չկա:
Կոմիտեն ևս քաղաքականություն մշակող մարմին է: Այդ ոլորտի քաղաքականությունը կիրականացնի Կոմիտեն: Տարբերություն չկա անունը կլինի կոմիտե թե՝ նախարարություն: Կատարելու է նույն գործառույթները` նորմատիվ փաստաթղթերի, հսկողության, ճարտարապետության և այլն:
Ինչ վերաբերում է հուշարձանների՝ մշակույթի նախարարութան ենթակայությունից հանելուն, ապա դրական եմ համարում: Ընդհանուր առմամբ, գտնում եմ, որ քաղաքաշինության նախարարությունը իր տեսակետով ավելի մոտ է կանգնած այդ կառույցին, քան մշակույթի նախարարությունը:

Թեմուր Մարգարյան, շինարար, ՃՇՀԱՀ դոցենտ

-Մեծ աշխատանք պետք է տանել այդ ուղղությամբ: Միգուցե ճիշտ կլիներ նախարարության անվանումը փոխելով հարցը լուծելը: Այլապես հարցեր կան, որոնք օդի մեջ են մնում: Ասենք՝ շինարարական նորմերը, ոլորտի վերահսկողությունը և վերջապես ունենք քաղաքաշինության գործունեության մասին հիմնական օրենք: Հիմա դուրս է գալիս, որ այս ամենը պետք է ջնջենք ու նորի՞ց սկսենք: Այստեղ մտորումների ու մտածելու տեղիք է տալիս, գուցե կան քայլեր որոնք դեռ հայտնի չե՞ն և նոր են պարզվելու:
Իսկ նախարարությունը կոմիտեի վերածելու գաղափարը, ընդհանրապես, ճիշտ չեմ համարում:

Սամվել Այվազյան, վերականգնող ճարտարապետ

-ԽՍՀՄ տարիներին հուշարձանների պահպանության կոմիտեն եղել է քաղաքաշինության նախարարության կազմի մեջ, որն այդ ժամանակ կոչվում էր պետշին: Հիմա ըստ էության, վերադառնում են նորից նույն սխեմային:
Երևի թե ճիշտ է այն իմաստով, որ հուշարձանների ու վերականգնումը ճարտարապետական միջավայրի մեջ է նորից մտնում, ուղղակի մի տարբերություն միայն պետք է լինի: Այնտեղ պետք է ընդհանուր ճարտարապետությունից առանձնացվի առանձին ճյուղ, որի չլինելու դեպքում վատ կլինի: Այսինքն հուշարձանների պահպանությունը պետք է մի ճյուղով գնա, ճարտարապետությունը մեկ այլ ճյուղով:

Ընդհանուր հաշվարկով ճիշտ է, բայց պետք է կոմիտեի մեջ ճյուղավորում լինի` քաղաքաշինական ու ժամանակակից ճարտարապետության խնդիրները պետք է առանձին լինեն, իսկ հուշարձանները` առանձին:

Ի վերջո, եթե նյութն իր կառուցվածքի մեջ է գտնվում և դրանով մասնագիտական խումբ է զբաղվում, ապա գործը ճիշտ կկազմակերպվի: Պետք է հստակ դնել, որ այնտեղ աշխատեն միայն պրոֆեսիոնալ մասնագետներ՝ վերականգնող ճարտարապետներ, կոնստրուկտորներ: Պետք է հստակ մոտեցում ցուցաբերել:
Հուշարձանների բնագավառը յուրահատուկ մոտեցում է պահանջում:

Աղբյուր` Փաստինֆո