Փաստ ինֆո

ՀՀ Մարդու իրավունքների պաշտպանի նախկին թեկնածու Ն.Ալոյանի դիմումը՝ ՀՀ ոստիկանության կազմակերպված հանցավորության դեմ պայքարի գլխավոր 6-րդ վարչության պետին Ստյոպա Սաֆարյանի գործունեության վերաբերյալ

Դ Ի Մ ՈՒ Մ
(Հանցակազմի ուսումնասիրման վերաբերյալ)

«Հիմնադրամների մասին» ՀՀ օրենքի 39-րդ հոդվածի համաձայն. «Յուրաքանչյուր տարի հաշվետու տարվան հաջորդող մարտի 25-ից ոչ ուշ հիմնադրամն http://www.azdarar.am հասցեում գտնվող Հայաստանի Հանրապետության հրապարակային ծանուցումների պաշտոնական ինտերնետային կայքում պարտավոր է հրապարակել`

1) Հաշվետվություն իր գործունեության մասին: (…)»:

Վերոնշյալ օրենսդրական պահանջով պայմանավորված՝ ՀՀ հրապարակային ծանուցումների պաշտոնական ինտերնետային կայքում` www.azdarar.am (այսուհետ սույն դիմումում` azdarar.am) հրապարակված են ՀՀ-ում գործող տարբեր հիմնադրամների հաշվետվություններ:

Սույն թվականի սեպտեմբերի 22-ին, անձնական, անշահագրգիռ հետաքրքրությունից դրդված, azdrar.am կայքում ուսումնասիրել եմ մի շարք հիմնադրամների հաշվետվություններ, այդ թվում` «Միջազգային և անվտանգության հարցերի հայկական ինստիտուտ» հիմնադրամի (գրանցման համարը` 222.160.799795, գրանցման ամսաթիվը` 17.02.2014թ., գտնվելու վայրը` ք. Երևան, Կորյունի 8 շենք, բն. 5) 2015թ-ի գործունեության հաշվետվությունը` հաստատված հիմնադրամի հոգաբարձուների խորհրդի 03.03.2016թ-ի որոշմամբ:

Գտնում եմ, որ վերոնշյալ հաշվետվությունը պարունակում է առերևույթ հանցակազմ` նման եզրահանգման համար հիմք են հանդիսանում հետևյալ փաստերը և հանգամանքները.

1. Հաշվետվության 7-րդ կետում սահմանված է հետևյալը. «Ֆինանսական տարում օգտագործված միջոցների ընդհանուր չափը` 14 028 470 ՀՀ դրամ»,

2. Հաշվետվության 2-րդ, 4-րդ և 7.1 կետերում սահմանված են գումարների ծախսի նպատակային ուղղությունները, մասնավորապես.

2.1 Համաձայն 2-րդ կետի հիմնադրամի գործադիր մարմնի ղեկավար` Պետրոս Բոլյանին վճարվել է աշխատավարձ` 1 164 020 ՀՀ դրամ,

2.2 Համաձայն 4-րդ կետի հիմնադրամի աշխատակազմին` վեց աշխատողների վճարվել է աշխատավարձ` 5 451 536 ՀՀ դրամ,

2.3 Հիմնադրամի կանոնադրական նպատակների իրականացմանն ուղղված ծախսերը կազմել են` 2 597 950 ՀՀ դրամ, (նույն գումարը ևս մեկ անգամ հաստատված և նշված է փակագծում, հաշվետվության 5-րդ կետում` իրականացված ծրագրերի մասում),

3. Սուն դիմումի 1-ին և 2-րդ կետերի համադրությունից և վերլուծությունից բխում է հետևյալը` հիմնադրամը ծախսել է 14 028 470 ՀՀ դրամ, որից հաշվետվության մեջ ներառված է 9 213 486 ՀՀ դրամը (1 164 020 ՀՀ դրամ (2-րդ կետ) + 5 451 536 ՀՀ դրամ (4-րդ կետ) + 2 597 950 ՀՀ դրամ (7.1 կետ)= 9 213 486 ՀՀ դրամ), այսինքն` հաշվետվության մեջ բացակայում է տեղեկությունը 4 814 984 ՀՀ դրամի ծախսի վերաբերյալ:

Ելնելով վերոնշյալից և հաշվի առնելով, որ նշված գումարը` 4 814 984 ՀՀ դրամն, ըստ հաշվետվության, չի ծախսվել հիմնադրամի կանոնադրական նպատակների կամ աշխատավարձի համար, եկել եմ եզրահանգման` որ հնարավոր է նշված գումարը` 4 814 984 ՀՀ դրամը յուրացված, վատնված լինի կամ այլ ոչ իրավաչափ գործողությունների արդյունքում օրենքով նախատեսված կամ նախանշված և կազմակերպության շահերին համապատասխան կերպով ծախսված չլինի, ուստի խնդրում եմ Ձեր հանձնարարությունը համապատասխան պաշտոնատար անձին կամ անձանց նշված փաստերն ուսումնասիրելու, իրավական գնահատական տալու և քրեական գործի հարուցման վերաբերյալ համապատասխան որոշում կայացնելու նպատակով:

Կից ներկայացնում եմ`

- հիմնադրամի 2015թ-ի հաշվետվության պատճենը` ներբեռնված azdarar.am կայքից:

Հարգանքով`
ՀՀ քաղաքացի` Ն.ԱլոյանՆյութի աղբյուրը ` http://hraparak.am/?p=124515&l=am/

Աղբյուր` Փաստինֆո