Փաստ ինֆո

2015թ. հունվարի 29-ին ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով այսօրվա դատական նիստը հետաձգվեց. դատարան չէին ներկայացվել տուժողները և վկաները:

Ավան և Նոր-Նորք վարչական շրջանների ընդհանուր իրավասության դատարանում այսօր նախատեսվում էր հրապարակել տուժող Արտուշ Սիմոնյանի նախաքննական ցուցմունքները, քանի որ նրա դատաքննական և նախաքննական ցուցմունքներում առկա էին հակասություններ, սակայն նախագահող դատավոր Դավիթ Հարությունյանը կողմերին տեղեկացրել է, որ տուժողները և վկաները դատարան չեն բերվել, ինչի վերաբերյալ դատարանին ռազմական ինստիտուտից հայտնել են, թե կուրսանտների դատարան բերելու մասին ծանուցագրերը ժամանակին չեն ստացվել:

Միևնույն ժամանակ նշենք, որ նշանակվելիք դատական նիստի օրվա և ժամի մասին հայտնի է դառնում հենց դատական նիստի ժամանակ, իսկ տուժողները նախորդ նիստին ներկա էին, ուստիև՝ տեղյակ էին նիստի օրվա և ժամի մասին:

Ամբաստանյալ Գնել Թևոսյանի պաշտպան Արա Զաքարյանն իր մտահոգությունը հայտնեց այս ամենի առնչությամբ՝ նշելով, որ ռազմական ոստիկանության աշխատակիցները չեն ապահովվել նրանց ներկայությունը դատարանում և կարծիք հայտնեց, որ համապատասխան քայլեր են ձեռնարկում տուժողների, վկաների դատարանում տված ցուցմունքների վրա ազդելու ուղղությամբ և չի բացառվում, որ նրանք պատրաստ չեն եղել այսօրվա դատական նիստին ներկայացվելու:

Մեղադրանքի կողմն էլ հայտարարեց, որ պաշտպանի մտահոգությունը տեղին չի:

Ուստի և տուժողների և վկաների բացակայության պատճառով դատական նիստը հետաձգվեց և նշանակվեց հոկտեմբերի 3-ին:

Գնել Թևոսյանին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 5-րդ, 7-րդ և 10-րդ կետերով և 358.1-րդ հոդվածի 2-րդ մասով, Նորիկ Սահակյանին՝ 104-րդ հոդվածի 2-րդ մասի 5-րդ, 7-րդ և 10-րդ կետերով և 359-րդ հոդվածի 1-ին մասով, Վաչե Սահակյանին՝104-րդ հոդվածի 2-րդ մասի 5-րդ, 7-րդ և 10-րդ կետերով, 359-րդ հոդվածի 2-րդ մասի 2-րդ կետով և 359-րդ հոդվածի 1-ին մասով, իսկ Մովսես Ազարյանին՝104-րդ հոդվածի 2-րդ մասի 5-րդ, 7-րդ և 10-րդ կետերով, 2 դրվագով՝ 359-րդ հոդվածի 2-րդ մասի 2-րդ կետով և 2 դրվագով՝ 359-րդ հոդվածի 1-ին մասով:

Ըստ Վարազդատ Սաֆարյանին առաջադրված մեղադրանքի՝ 2014թ. նոյեմբերի 16-ին ժամը 21.00-ի սահմաններում նույն մարտկոցի կուրսանտ Տ.Մանասերյանին շարքում խոսելու համար դիտողություն անելուց և վերջինիս կողմից հակադարձում ստանալուց հետո Վաչե Սահակյանի, Մովսես Ազարյանի հետ միասին, մի խումբ անձանցով խախտելով ՀՀ ԶՈՒ ներքին ծառայության կանոնագրքի 13, 16, 65 հոդված. ծեծի են ենթարկել Մանասերյանին, բացի այդ 2015թ. հունվարին լսարանում խոսելու համար ծեծի է ենթարկել համածառայող Արտուշ Սիմոնյանին:

Վարազդատ Սաֆարյանին մեղադրանք է առաջադրվել ՀՀ քրեական օրենսգրքի 359-րդ հոդվածի 2 մասի 2 կետով և 359-րդ հոդվածի 1-ին մասով:

Աղբյուր` Փաստինֆո