Փաստ ինֆո

Անձինք, ովքեր անցանկալի են իշխանության համար, մեղադրվում են տարբեր ծանր հանցագործությունների մեջ, իսկ իրավապահ և դատական համակարգը հլու-հնազանդ կատարում են կենտրոնացված պատվեր:

Այս մասին լրագրողների հետ այսօրվա հանդիպմանը հայտարարել է Մարաշում հայտնաբերված զենք-ռազմամթերքի գործով մեղադրյալ Արթուր Վարդանյանի պաշտպան Լևոն Բաղդասարյանը: Նա հավելել է, որ Արթուր Վարդանյանն (ըստ մեղադրանքի, նա այդ վնասազերծված խմբի ղեկավարն է) իրեն համարում է իր հայացքների համար հետապնդվող քաղաքական կալանավոր։

Ըստ պաշտպանի, Արթուր Վարդանյանը շինծու, հորինովի է համարում իրեն առաջադրված մեղադրանքը։ Մասնավորապես, նա չի ընդունում հանցավոր համագործակցություն ստեղծելու կամ ղեկավարելու մեղադրանքը՝ պնդելով, որ ինքը չի փորձել կատարել այնպիսի գործողություն, որը նախատեսված է եղել ՀՀ քրեական օրենսգրքով։

Զենք-ռազմամթերքի վերաբերյալ էլ ձերբակալվել-կալանավորվելուց հետո Արթուր Վարդանյանը հայտարարել է, որ զենքը բացառապես ուղղված էր լինելու հետագայում, եթե կարիքը զգացվեր՝ Արցախում, ինչու չէ նաև հետագայում, եթե կարիքը զգացվեր, Սիրիայում որոշակի գործողություններ կատարելու։

Պաշտպանը հիշեցրել է, որ Արթուր Վարդանյանը նոյեմբերի վերջին է արել հայտարարությունն առ այն, որ ինքը վստահ չէ, որ վաղը, մյուս օրը պատերազմ չի լինի, և իշխանությունը որոշակի գործառույթներից հետո հողերը չի տա թշնամուն։

«Եվ մենք ունեցանք ապրիլյան քառօրյա պատերազմը, և ապրիլյան քառօրյա պատերազմից հետո ժողովրդի, քաղաքական գործիչների և այլ անձանց արձագանքը, որ այս իշխանությունները ցանկանում էին ապրիլյան պատերազմին հողերը տալ թշնամուն, միայն մեր ժողովրդի, մեր զինվորների ֆանատիզմի շնորհիվ դա հնարավոր չեղավ»,- նշել է փաստաբանը՝ հավելելով, որ այդ հայտարարությունն Արթուրն արել էր դեռևս նոյեմբեր ամսին, «երբ մենք չգիտեինք, որ լինելու է ապրիլյան պատերազմ և այսպիսի արձագանք»։

Ըստ Լ.Բաղդասարյանի, Արթուրի ձեռքին եղել են նաև փողոցների քարտեզներ, և նրա մեկնաբանությամբ՝ պետք է անհնազանդություն լիներ։

Լևոն Բաղդասարյանը հայտնել է, որ հայտարարվել է քրեական գործի նախաքննության ավարտի մասին, գործի նյութերը պետք է տրամադրվեն կողմերին՝ ծանոթանալու համար։

Աղբյուր` Փաստինֆո