Փաստ ինֆո

Ոստիկանների կողմից լրագրողների մասնագիտական օրինական գործունեությանը խոչընդոտելու գործով այսօրվա դատական նիստը հետաձգվեց՝ մեղադրողի բացակայության պատճառով:

Մեղադրողը դատարանին հայտնել էր, որ մասնակցում է վերապատրաստման դասընթացների և խնդրել էր իր բացակայությունը հարգելի համարել:

Այսօրվա դատական նիստում որպես բոլոր 4 ամբաստանյալների պաշտպան գործում ներգրավվեց փաստաբան Տիգրան Գալստյանը: Նա դատարանին խնդրեց իրեն տրամադրել գործի նյութերը և հավելյալ ժամանակ տրամադրել դրանց ծանոթանալու համար: Դատարանն այդ հաշվարկով էլ դատական նիստը հետաձգեց մինչև հոկտեմբերի 10-ը:

Ըստ մեղադրական եզրակացության, պաշտոնատար անձինք՝ իրենց պաշտոնեական դիրքն օգտագործելով, 2015թ. հունիսի 23-ին Ազատության հրապարակում խոչընդոտել են «Ֆոտոլուր» լրատվական գործակալության ֆոտոլրագրող Հայկ Բադալյանի մասնագիտական օրինական գործունեությանը և ապօրինաբար նրան բերման ենթարկել՝ խոչընդոտելով վերջինիս աշխատանքը, «Արմենիա» հեռուստաընկերության լրագրող Խաչատուր Եսայանի մասնագիտական օրնական գործունեությանը,ինչպես նաև Աշոտ Բոյաջյանի, լրագրող Արթուր Պապայանի մասնագիտական օրինական գործունեությանը (գործում տուժողները 5-ն են):

Տաճատ Նորատունկյանին, Արթուր Այվազյանին, Կոստան Բուդաղյանին մեղադրանք է առաջադրվել ՀՀ քրեական օրենսգրքի 164-րդ հոդվածի 2-րդ մասով՝ պաշտոնատար անձի կողմից, պաշտոնական դիրքն օգտագործելով՝ լրագրողի մասնագիտական օրինական գործունեությանը խոչընդոտելը, իսկ Դավիթ Փերիխանյանին՝ 164-րդ հոդվածի առաջին մասով (երկու դրվագով)` լրագրողի մասնագիտական օրինական գործունեությանը խոչընդոտելը, և 185-րդ հոդվածի 1-ին մասով՝ գույքը դիտավորությամբ ոչնչացնելը կամ վնասելը:

Ի դեպ, ինչպես նշվեց դատական նիստում, ամբաստանյալներն ընդունել են մեղադրանքը:

Աղբյուր` Փաստինֆո