Փաստ ինֆո

Սեպտեմբերի 18-ին Հայաստանի հինգ մարզերում տեղի ունեցած տեղական ինքնակառավարման մարմինների ընտրությունների նախնական արդյունքների համաձայն՝ 58 համայնքում նոր ղեկավար է ընտրվել: 

Այս մասին սեպտեմբերի 23-ի ասուլիսում ասաց Կենտրոնական ընտրական հանձնաժողովի նախագահ Տիգրան Մուկուչյանը՝ հավելելով, որ 58 համայնքներից 8-ը խոշորացված համայնքներ են՝ Արարատի մարզի Ուրցաձոր, Սյունիքի մարզի Գորայք, Գորիս, Մեղրի, Տեղ և Տավուշի մարզի Այրում, Կողբ, Նոյեմբերյան, 20 համայնքում գործող համայնքների ղեկավարները չեն առաջադրվել, իսկ 30-ում՝ գործող համայնքապետը չի ընտրվել:

Սեպտեմբերի 18-ին կայացած ՏԻՄ ընտրությունների վերջնական արդյունքները կամփոփվեն այսօր՝ սեպտեմբերի 23-ին:

Նշենք, որ սեպտեմբերի 18-ին տեղական ինքնակառավարման մարմինների ընտրություններ են անցկացվել Հայաստանի Արագածոտնի, Արարատի, Արմավիրի, Սյունիքի, Տավուշի մարզերի 317 համայնքներում: Դրանցից 22-ում կայացել են միայն համայնքի ղեկավարի, 80-ում՝ միայն ավագանու անդամների, 215-ում՝ և՛ համայնքի ղեկավարի, և՛ ավագանու անդամների ընտրություններ:

Ըստ Տ.Մուկուչյանի, 237 համայնքներում անցկացված համայնքի ղեկավարի ընտրություններին ընդհանուր առմամբ քվեարկվել է 408 թեկնածու, որոնցից 230-ը ՀՀԿ անդամներ են, 144-ը՝ անկուսակցական: Առաջադրվածներից մեկական թեկնածուներ «Ազգային ինքնորոշում միավորում» և «Ալյանս» ցենտրիստական կուսակցության անդամներ են, 2-ը «Լուսավոր Հայաստան» կուսակցությունից են, 3-ը՝ «Քաղաքացիական պայմանագիր» կուսակցությունից, 6-ական թեկնածուներ՝ «Բարգավաճ Հայաստան»-ից և «Հայկական Վերածնունդ»-ից, 15-ը՝ ՀՅԴ-ից:

Հիշյալ 408 թեկնածուներից 218-ն առաջադրվել են ինքնաառաջադրման կարգով, 180-ն առաջադրվել են ՀՀԿ-ի, 1-ական թեկնածուներ՝ ԲՀԿ-ի և ՀՅԴ-ի, 3-ը՝ «Քաղաքացիական պայմանագրի», 5-ը՝ «Հայկական Վերածնունդ»-ի կողմից:

Աղբյուր` Փաստինֆո