Փաստ ինֆո

Փաստաբան Երվանդ Վարոսյանն այսօր Ֆեյսբուքում անդրադարձել է ՀՀ վճռաբեկ դատարանի նախագահ Արման Մկրտումյանի, փաստաբանի ձևակերպմամբ՝ օտարերկրյա հյուրերի հետ հանդիպման ժամանակ արտահայտած մտքի գոհարներին: 

Ե.Վարոսյանը նշում է, որ իր գործընկեր Վահե Գրիգորյանի միջոցով տեղեկացել է ՀՀ վճռաբեկ դատարանի նախագահ Արման Մկրտումյանի (Ա.Մ. ըստ եվրոպական դատարանի հայտնի որոշման) կողմից օտարերկրյա հյուրերի հետ հանդիպման ժամանակ արտահայտած մտքի գոհարների մասին, որոնց մի մասը վերաբերում է նաև փաստաբաններին: Փաստաբանը համոզված է, որ դրանք անպատասխան մնալ չեն կարող...

Այսպես, Դանիայի միգրացիայի մինիստրության ներկայացուցիչները այս տարվա ապրիլին Հայաստանում հանդիպումներ են ունեցել տարբեր մակարդակների պետական մարմինների և դրանց ներկայացուցիչների/պաշտոնյանների հետ: Այսպիսի պարտադիր ընթացակարգ կա հիմա, որը ԵՄ անդամ պետությունների միգրացիոն ծառայություններին պարտավորեցնում/խրախուսում է երկիր առ երկիր գնալ և զեկույցներ կազմել, որպեսզի այդ երկրից հավանական ապաստանի համար դիմողի կամ այլ տեսակի միգրանտի հետ կապված գործերով իրենց վարչական և դատական մարմիններում գործ լինելու դեպքում, ունենան ուղեցուցային նշանակության փաստաթուղթ։

Դանիացիներին հատկապես հետաքրքրել է, թե որքանով են դատարաններն ի վիճակի արդյունավետ պաշտպանություն ապահովել անհատների հիմնարար իրավունքների համար: Ընթացքում էլ շոշափվել են այս առնչությամբ տարբեր թեմաներ: Մասնավորապես և հատկապես քննարկվել է դատական համակարգում կոռուպցիայի առկայության և դրա դեմ պայքարի հարցը 04/04/2016թ.-ին վճռաբեկ դատարանում դատարանի նախագահ Ա. Մկրտումյանի հետ:

Ի պատախան կոռուպցիայի մասին հարցին, ըստ Երվանդ Վարոսյանի, Ա. Մկրտումյանը պատասխանել է, որ իրենց խնդիրն այն է, որ որոշ փաստաբաններ իրենց վստահորդներ/հաճախորդներից խարդախորեն կորզում են գումարներ, որոնք իբր որպես կաշառք պետք է փոխանցվեն դատավորներին (115 էջ):

Իսկ, դատավարական երաշխիքների վերաբերյալ խոսելիս, զեկույցն արձանագրում է. «ՎԴ նախագահը չի կարող համաձայնվել փաստաբանների այն դիտարկմանը, որ նրանց համար մեղադրյալը կամ քրեական գործի նյութերն անհասանելի են նախաքննության ընթացքում: ՎԴ նախագահը համարում է, որ թե մեղադրյալը, թե քրեական գործի նյութերն առավել քան հասանելի են պաշտպանության կողմին: ՎԴ նախագահը համարում է, որ այդ պնդումն իրողության կեղծման հետևանք է եւ ցավում է, որ իրողությունն այսպես էլ ներկայացվել է ԶԼՄ-ներում» (114 էջ):

Ե.Վարոսյանն արձագանքում է՝ այն որ Ա.Մկրտումյանը` նախաքննության ընթացքում քրեական գործի նյութերի հասու լինել-չլինելու վերաբերյալ ՀՀ քրեական դատավարության օրենսգրքով սահմանված կարգավորումներին ծանոթ չէ, դա արդեն վաղուց զարմանալի չէ: Բայց սեփական անձի կողմից ղեկավարվող, բոլորիս հայտնի վիճակում գտնվող համակարգում առկա կոռուպցիայի մասին պնդումները փաստաբանների (եթե անգամ նկատի ունենար որոշ փաստաբանների) գործունեությամբ քողարկելը, դրանով իսկ դատական համակարգի մասին հասարակության բացասական կարծիքի《պատասխանատու》ներկայացնելով փաստաբաններին, Ա.Մկրտումյանը ոչ միայն խուսանավելու անհաջող փորձ է կատարել, այլև ցեխ է նետել ողջ փաստաբանական համայնքի ուղղությամբ։

«Թեև մոտավոր պատկերացնում եմ, թե փաստաբան ասելիս Ա.Մկրտումյանի մտքում ում լուսապայծառ կերպարն է հայտնվում, բայց անգամ դա չի կարող արդարացնել նման անպատասխանատու հայտարարությունը:

Առավել քան համոզված եմ, որ շատ վաղուց արդեն հասունացած է դատական համակարգում տարատեսակ լոլոների փոխարեն իրական փոփոխություններ արձանագրելու ժամանակը, և այդ ուղղությամբ առաջին քայլը պետք է լինի Ա.Մկրտումյանի《վաստակած》հանգստի անցնելը... »,- նշում է փաստաբան Երվանդ Վարոսյանը:

Աղբյուր` Փաստինֆո