Փաստ ինֆո

Ցմահ դատապարտյալ Արմեն Տեր-Սահակյանն այսօր դատարանում՝ մինչ դատական նիստի սկսվելը, հայտարարեց, որ երեկ դուրս է եկել հացադուլից, սակայն էլի շարունակելու է այն:

Ա.Տեր-Սահակյանի՝ հացադուլի մեջ գտնվելու մասին բարձրաձայնել էր վերջինիս հետ նույն գործով՝ Արմեն Տեր-Սահակյանի բանդայի վերաբերյալ երբեմնի աղմկահարույց գործով մեկ այլ ցմահ դատապարտյալ, նրա ազգական Ալիկ Գրիգորյանը՝ սեպտեմբերի 16-ին հայտարարելով, որ Ա.Տեր-Սահակյանը 15 օր հացադուլի մեջ է:

Արմեն Տեր-Սահակյանը անդրադարձավ նաև հացադուլի պատճառներին: Նա հայտարարեց՝ «պե՞տք է վաղաժամկետը կիրառվի»: Խոսքը պայմանական վաղաժամկետ ազատ արձակելու կամ պատժի չկրած մասը ավելի մեղմ պատժատեսակով փոխարինելու ինստիտուտի մասին է, որը կարող է կիրառվել նաև ցմահ դատապարտյալների հանդեպ՝ պատիժը կրելուց քսան տարի անց:

Արմեն Տեր-Սահակյանը հավելեց, որ քրեակատարողական հիմնարկը այդ կապակցությամբ մերժման որոշում է կայացնում՝ չճանաչելով կալանավորին:
Ցմահ դատապարտյալը բողոք է ներկայացրել իրեն պայմանական վաղաժամկետ ազատ արձակելը կամ պատժի չկրած մասը ավելի մեղմ պատժատեսակով փոխարինելը մերժելու որոշման դեմ:

Այսօրվա դատական նիստում գործում ներգրավվեց հանրային պաշտպան Էմին Բեգլարյանը՝ որպես ցմահ դատապարտյալի շահերի պաշտպան: Նա նշեց, որ ինքը ծանոթ չէ բողոքարկվող որոշմանը, խնդրեց իրեն տրամադրել այդ որոշումն ու բողոքին կցված մյուս փաստաթղթերը և դատական նիստը հետաձգել, որպեսզի ինքը հնարավորություն ունենա դրանց ծանոթանալու համար: Դատարանը բավարարեց միջնորդությունը:

Նշենք, որ Արմեն Տեր-Սահակյանի ու մյուսների գործի առանցքում ՀՀ ներքին գործերի նախարար Վանո Սիրադեղյանն է: Ըստ վերջինիս առաջադրված մեղադրանքի՝ նա 1992թ. ամռանը Արմեն Տեր-Սահակյանի միջոցով կազմակերպել է կայուն զինված հանցավոր խումբ՝ բանդա, իսկ հետագայում հովանավորել է բանդային և պարտակել նրա կատարած բազմաթիվ ավազակային հարձակումներն ու այլ հանցագործությունները:

Աղբյուր` Փաստինֆո