Փաստ ինֆո

Առողջական խնդիրների պատճառով մահացած զինծառայողի հոր հայցը՝ որդու կյանքի իրավունքի խախտման համար ոչ նյութական վնասի հատուցման պահանջով, Կենտրոն և Նորք-Մարաշ վարչական շրջանների ընդհանուր իրավասության դատարանը մերժել է:

Այդ մասին «Փաստինֆո»-ն տեղեկացրել է զինծառայողի հոր՝ Հովհաննես Այվազյանի ներկայացուցիչ Մարինե Գրիգորյանից:

Պաշտպանը նշեց, որ դատարանի այս որոշումն անպայման բողոքարկելու է, իսկ ներպետական դատական ատյաններն սպառելու դեպքում գանգատ են ներկայացնելու Մարդու իրավունքների եվրոպական դատարան:

Այսպիսով, Ռուբեն Ներսիսիյանի նախագահությամբ դատարանը հայցն անհիմն է գնահատել` նշելով, որ հայցվորը չի ներկայացրել որևէ վերաբերելի և թույլատրելի ապացույց առ այն, որ իր որդին հիվանդությունը ձեռք է բերել զորավարժությունների ընթացքում ստացված հարվածից, ինչի հետևանքով նա դիմել է բուժօգնության։ Ներկայացված ապացույցներով հայցվորը չի հիմնավորել հայցադիմումով բերված հանգամանքները:

Ավելին, դատարանի իրավական գնահատման համաձայն՝ առկա չէ քրեական հետապնդման մարմնի կամ դատարանի որևէ համապատասխան ակտ, որը կհաստատեր այն, որ սույն գործով պատասխանողների որոշման, գործողության կամ անգործության հետևանքով խախտվել է անձի կյանքի իրավունքը:

Ավելի վաղ տեղեկացրել ենք, որ 2012թ. Աշոտ Այվազյանը ծառայել է Վարդենիսի զորամասում, մեկուկես տարի ծառայությունից հետո հարվածի հետևանքով ստացած վնասվածքի պատճառով նա զորացրվել է:

Կատարված հետազոտություններով՝ Այվազյանի մոտ հայտնաբերվել է չարորակ ուռուցք, Առողջապահության նախարարությունից զինծառայողի հարազատներին հայտնել են, որ նրա բուժումը պետք է իրականացվի արտեկրում: Աշոտ Այվազյանը դիմել է Գերմանիայի Դաշնային Հանրապետության Քյոլնի համալսարանական կլինիկա, որտեղ ձեռք է բերվել պայմանավորվածություն հետազոտությունների համար վճարել 12.000 եվրոյի չափով կանխավճար, որից հետո կծրագրվեն թերապիայի հնարավոր միջոցները։ Կանխավճարը կատարվել է, որից հետո հարկավոր է եղել 25.000 եվրո գումար փոխանցել նույն կլինիկա որպեսզի սկսվի բուժման կուրսը:

Եվ հենց այդ գումարը փոխանցելու և Այվազյանի բուժման կուրսը սկսելու համար հարազատները դիմել են Պաշտպանության նախարարություն, սակայն ՊՆ-ից նրանց հայտնել են, որ իրենք զինծառայողի բուժումն արտերկրում կազմակերպելու գործընթաց չունեն:

Այսքանից հետո ծառայության ընթացքում առողջական խնդիրներ ձեռքբերած Աշոտ Այվազյանը 2015թ. հուլիսի 9-ին հայցադիմում է ներկայացրել Վարչական դատարան՝ ընդդեմ ՀՀ պաշտպանության նախարարության՝ խնդրելով պարտավորեցնել ՀՀ պաշտպանության նախարարությանը վճարել միանվագ դրամական օգնություն:

15.07.2015 թվականին հայցադիմումն ընդունվել է վարույթ, սակայն 2016թ. փետրվարի 11-ին Աշոտ Այվազյանը մահացել է, և 23.02.2016 թվականին հայցվորի ներկայացուցիչն այդ մասին դիմում է ներկայացրել ՀՀ վարչական դատարան:

Այվազյանի մահվան հիմքով գործի վարույթը կարճվել է:

Որից հետո էլ զինծառայողի հայրը ընդդեմ ՀՀ Ֆինանսների նախարարության և ՀՀ Պաշտպանության նախարարության հայց է ներկայացրել դատարան պատասխանողներից հօգուտ իրեն բռնագանձել 3.000.000 ՀՀ դրամ որպես Աշոտ Այվազյանի կյանքի իրավունքի խախտման համար ոչ նյութական վնասի հատուցում:

Աղբյուր` Փաստինֆո