Փաստ ինֆո

Երրորդմասցի Լյովիկի ու նրա ընկերների սպանության գործով այսօրվա դատական նիստում շարունակվեց հրապարակվել վկաների նախաքննական ցուցմունքները: Այսօր դատարանում հրապարակվեց թվով 13 վկայի նախաքննական ցուցմունք, դեռևս 12-ինն էլ նախատեսվում է հրապարակել:

Հիշեցնենք, որ վկաների նախաքննական ցուցմունքները հրապարակվում են, քանի որ ողջամտության սահմաններում դատարանի կողմից բոլոր միջոցները ձեռնարկվել են նրանց ներկայությունն ապահովելու ուղղությամբ, սակայն ապարդյուն:

Այսօր հրապարակվեցին սպանված երրորդմասցի Լյովիկի ընկերների նախաքննական ցուցմունքները:

Մասնավորապես, այդ ցուցմունքներից պարզ դարձավ, որ նրանք մի քանի ավտոմեքենայով ուղևորվել են «Նուբարաշեն» ՔԿՀ, նրանց մի մասը նշել է, որ չգիտի, թե ինչու են գնացել ՔԿՀ, սակայն Լյովիկի անվտանգությունն ապահովվելու նպատակով նրանք միշտ վերջինս հետ շրջել են, իսկ մի քանիսն էլ նշել էին, որ Լյովիկը գնացել է «Նուբարաշեն» ՔԿՀ՝ մանումենտցի Դավիթին տեսության:

Ըստ վկա Սեյրան Կարապետյանի նախաքննական ցուցմունքի՝  երրորդմասցի Լյովիկին ճանաչել է Դրոյի միջոցով,  2015թ. մարտի 3-ին Դրոն իրեն ասել է, որ լինի օֆիսում, որտեղ նրանք տղաներով հաճախակի հավաքվել են, թե ինչի համար նա չի իմացել, իսկ երբ հաջորդ օրը գնացել է օֆիս Դրոյի հետ ավտոմեքենայով ուղևորվել են դեպի  Լյովիկի տուն, այդ ժամանակ նկատել են,  որ իրենց հետևում է  մի մեքենա, քիչ ուշ նա իջել է մեքենայից և նստել տաքսի ավտոմեքենա, որպեսզի հետևի այդ ավտոմեքենային, ապա ուղևորվել է  «Նուբարաշեն» ՔԿՀ, իսկ երբ մոտեցել է ՔԿՀ-ին նկատել է,  որ մարդիկ են կուտակված, իսկ Դրոն ընկած է եղել գետնին, սակայն դեռևս շնչել է: Նրան օգնություն ցուցաբերելու համար քաշ է տվել մեքենայի դռան մոտ որպեսզի տեղափոխի հիվանդանոց, իսկ երբ շրջանցել է և մոտեցել մեքենայի մյուս կողմից նկատել է, որ այդ կողմում էլ ընկած է Մոսոն, ով ունեցել է գլխի հրազենային վնասված այդ ժամանակ հասկացել է,  որ Մոսոն մահացած է:

Վկան հայտնել է, որ Մոսոյի դին մի կողմ է քաշել և նստելով մեքենայի ղեկին Դրոյին տեղափոխել է Էրեբունի բժշկական կենտրոն:

Թե ո՞ւմ է երրորդմասցի Լյովիկը «Նուբարաշեն» ՔԿՀ տեսության գնացել, վկան հայտնել է,  որ չգիտի:

Հաջորդիվ հրապարակվեց երրորդմասցի Լյովիկի մյուս ընկերոջ՝ Էդգար Պետրոսյանի նախաքննական ցուցմունքը, վերջինս հայտնել է, որ Դերենիկ Թադևոսյանին՝ Դրոյին  ճանաչում է  մանկուց,  քանի որ նույն բակում են ապրել, իսկ Լևոն Ղազարյանի՝ Լյովիկի հետ ծանոթացել է 2006թ. երբ պատիժ է կրել «Նուբարաշեն» ՔԿՀ-ում: Պատժի  կրումից հետո նրանց շփումը ևս  շարունակվել է : Վկան նաև նշել է, որ չնայած նրան, որ ինքը Լյովիկի մոտ չի աշխատել, սակայն վերջինս իրեն ֆինանսապես օգնել է:

Դեպքի վերաբերյալ էլ նա հայտնել է, որ  մի քանի ավտոմեքենայով  ուղևորվել են դեպի «Նուբարաշեն» ՔԿՀ, որտեղ նրանց սպասելիս է եղել Մոսոն:

Ըստ վկայի նախաքննական ցուցմունքի՝ երրորդմասցի Լյովիկը պետք է այցելեր մանումենտցի Դավիթին: Հասնելով ՔԿՀ-ի մոտ Լյովիկը և Դրոն իջել են ավտոմեքենայից, իսկ երբ ինքը պատրաստվել է իջնել ավտոմեքենայից այդ պահին հնչել են ավտոմատի կրակոցներ:

Վկան հայտնել է, որ երբ  դուրս է եկել ավտոմեքենայից  թաքնվել է մեքենայի դիմացի մասում և հասցրել է տեսնել,  որ մեքենայի ձախ կողմում կա 2 դիմակավորված անձ, ովքեր կրակել են, իսկ աջ կողմում՝ եղել է մեկ դիմակավորված անձ, ով ևս զենքից կրակ է արձակել: Այդ ամենից հետո վկան հայտնել է, որ նկատել է, թե ինչպես դիմակավորված անձինք կրակելով սկսել են հետ վազել և ոտքով հեռանալ դեպքի վայրից, իսկ թե ուր՝ ինքը չգիտի:

Ինչ վերաբերում է Լեքսուս  մակնիշի ավտոմեքենայում հայտնաբերված զենքերին, ապա նա նշել է, որ դրանից մեջ է եղել Լևոնի գրանցված զենքը, որը նա միշտ պահել է իր մոտ, իսկ դեպքի վայրում հայտնաբերված 20 հազար ՀՀ դրամ  թղթադրամների վերաբերյալ էլ վկան հայտնել է, որ ավտոմեքենայում եղել է 600 000 ՀՀ դրամ, Լյովիկը այդ գումարը տվել է Դրոյին որպեսզի վերջինս փոխանցեր Լյովիկի մահացած ընկերոջ կնոջը, և այդ գումարը Դրոն պահել է մեքենայի մեջ մինչև փոխանցելը: Բացի այդ վկան նշել է, որ Լևոն ու Դրոն իրենց մոտ բավականին մեծ քանակությամբ գումար էին պահում:

Վկա նաև հայտնել է, որ դեպքից մոտ 10 օր առաջ Լյովիկը կրկին այցելել է մանումենտցի Դավիթին:

Սպանված երրորդմասցի Լյովիկի ընկերները հայտնել էին, որ տեղյակ են եղել, որ Լյովիկը ամբաստանյալ Գաստիկի՝ Վահան Հակոբյանի հետ հակասությունների մեջ է եղել և կասկածում են,  որ նա էլ իր երկու ընկերների հետ կարող էր կազմակերպել սպանություն:

Հաջորդ սեպտեմբերի 23-ին կայանալիք նիստում կշարունակվի վկաների նախաքննական ցուցմունքների հրապարակումը:

Աղբյուր` Փաստինֆո