Փաստ ինֆո

Մեղադրանքը փոփոխելու ու նոր մեղադրանք առաջադրելու որոշման շրջանակում  այսօր ՀՀ պաշտպանության նախկին փոխնախարար Վահան Շիրխանյանին առաջադրվել է նաև իշխանության յուրացման նախապատրաստության մեղադրանք:  Այս մասին «Փաստինֆո»-ի լրագրողին հայտնեց Վ.Շիրխանյանի պաշտպան, փաստաբան Հայկ Ալումյանը:

Վ. Շիրխանյանը մեղադրվում է նաև հանցավոր համագործակցությանն անդամակցելու ու զենք-ռազմամթերքի հոդվածներով:

Հայկ Ալումյանը հայտնեց, որ իր պաշտպանյալն այս որոշումը որակել է որպես թատրոն և հայտարարել, որ «իրական հանցագործներն այս գործը սարքողներն են»: Պաշտպանի տեղեկություններով, իր պաշտպանյալի ընտանիքը պատրաստվում է առանձին հայտարարությամբ հանդես գալ գործի, «հավանաբար թաքնված ենթատեքստերի» հետ կապված:

Հայկ Ալումյանը հայտնեց, որ այսօր հայտարարվել է նաև նախաքննության ավարտի ու քննչական խմբի փոփոխության մասին: Պաշտպանն ընդգծեց, որ 10 քննիչներից Վ.Շիրխանյանը միայն մեկին է տեսել. «Ոչ հներին է տեսել, ոչ նորերին է տեսել, ծպտյալ, լատենտային քննիչներ»:

Հ.Ալումյանը նշեց, որ դեռևս իրենց չեն տրամադրվել ավելի քան 30 հատոր կազմող գործի նյութերը: Նա մտավախություն հայտնեց՝ հանկարծ այնպես չստացվի, որ պատճենահանելու համար ավելի շատ ժամանակ է պետք, քան իրենց՝ գործի նյութերին ծանոթանալու համար՝ մանավանդ հաշվի առնելով Վ.Շիրխանյանի առողջական վիճակով պայմանավորված դժվարությունները:

Լուսանկարը՝ azatutyun.am-ի

Աղբյուր` Փաստինֆո