Փաստ ինֆո

Ավան եւ Նոր Նորք վարչական շրջանների ընդհանուր իրավասության դատարանում շարունակվում է կուրսանտ Հայկազ Բարսեղյանի սպանության գործով դատավարությունը։

Ավելի վաղ տեղեկացրել ենք, որ նիստն ընդմիջվել էր, քանի որ ամբաստանյալ Մովսես Ազարյանը հայտարարեց, որ ինքնազգացողությունը վատ է, ուստիեւ դատարանը շտապօգնություն հրավիրեց։

Ամբաստանյալը ենթարկվեց բուժզննման եւ ըստ բժիշկների նա գանգատվել է գլխացավից, գլխապտույտից,  սրտխառնոցից, իսկ ճնշումը եղել է 130/80: Նրան ցուցաբերվել է անհրաժեշտ բժշկական օգնություն։

Ընդիմջումից հետո  ամբաստանյալը հայտարարեց որ իրեն արդեն նորմալ է զգում և որ կարող է մասնակցել նիստին:

Այս պահին դատական նիստը շարունակվում է և հարցաքննվում է տուժող Արթուր Սիմոնյանը:

Ըստ մեղադրանքի՝ Գնել Թևոսյանը, Նորիկ Սահակյանը, Վաչե Սահակյանը և Մովսես Ազարյանը 2015թ. հունվարի 29-ին ժամը 02:00-ից 03:00-ի սահմաններում ՀՀ ՊՆ N զորամասի առաջին գումարտակի առաջին մարտկոցի ննջարանում առանձին դաժանությամբ, վերը նշված անձանցով, խուլիգանական դրդումներով սպանել են Հայկազ Արկադիի Բարսեղյանին:

Ինչպես ավելի վաղ «Փաստինֆո»-ն տեղեկացրել էր, նախաքննության արդյունքներով` 4 հոգուց բաղկացած կազմակերպված խումբը գործել է առանձին դաժանությամբ՝ Հայկազ Բարսեղյանին զրկելով անգամ որևէ կերպ օգնություն կանչելու հնարավորությունից. մասնավորապես՝ փակել են բերանը, անշարժացրել։

Կուրսանտի դին հայտնաբերվել է հունվարի 29-ին՝ ՊՆ Վազգեն Սարգսյանի անվան ռազմական ինստիտուտի մարզահրապարակում պտտաձողի վրա պարանով կախված վիճակում՝ մահացած։ Սակայն պարզվել է, որ դա եղել է ինքնասպանության իմիտացիա. երիտասարդը սպանված է եղել մինչ այդ։

Մասնավորապես՝ մի քանի այլ զինծառայողներ բռնել են անկողնում պառկած կուրսանտի ոտքերը և ձեռքերը, փակել բերանը՝ զրկելով օգնություն կանչելու հնարավորությունից, ապա սուր կտրող-ծակող գործիքով կտրել նրա աջ նախաբազկի արմնկափոսի երակը, որին հաջորդել են հարվածներ կուրսանտի կրծքավանդակին և դեմքին, այնուհետև սեղմելով պարանոցը՝ կոտրել են կուրսանտի ենթալեզվային ոսկորը։

Ապա հագցրել են կուրսանտի հագուստները և տեղափոխել զորամասի մարզահրապարակ, որտեղ և պտտաձողից կախել են այս դաժան գործողությունների արդյունքում շնչահեղձությունից մահացած Հայկազ Բարսեղյանին:

Գնել Թևոսյանին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 5-րդ, 7-րդ և 10-րդ կետերով և 358.1-րդ հոդվածի 2-րդ մասով, Նորիկ Սահակյանին՝ 104-րդ հոդվածի 2-րդ մասի 5-րդ, 7-րդ և 10-րդ կետերով և 359-րդ հոդվածի 1-ին մասով, Վաչե Սահակյանին՝104-րդ հոդվածի 2-րդ մասի 5-րդ, 7-րդ և 10-րդ կետերով, 359-րդ հոդվածի 2-րդ մասի 2-րդ կետով և 359-րդ հոդվածի 1-ին մասով, իսկ Մովսես Ազարյանին՝104-րդ հոդվածի 2-րդ մասի 5-րդ, 7-րդ և 10-րդ կետերով, 2 դրվագով՝ 359-րդ հոդվածի 2-րդ մասի 2-րդ կետով և 2 դրվագով՝ 359-րդ հոդվածի 1-ին մասով:

Աղբյուր` Փաստինֆո