Փաստ ինֆո

Այս տարվա հունվարի 19-ին Արցախի պողոտայում մայթի վրա 22-ամյա Արամ Ներսիսյանին վրաերթի ենթարկելու և անզգուշությամբ մահ պատճառելու գործով մեղադրողը առաջին ատյանի դատարանի դատավճռի դեմ վերաքննիչ բողոք է ներկայացրել:

Մասնավորապես, մեղադրողը պահանջել է մասնակիորեն` պատժի մասով բեկանել Աշոտ Հովհաննիսյանի վերաբերյալ 08.08..2015թ. դատավճիռը և Հովհաննիսյանի նկատմամբ ՀՀ քրեական օրենսգրքի 70-րդ հոդվածի կիրառումը վերացնել:

Ինչպես ավելի վաղ «Փաստինֆո»-ն տեղեկացրել էր, Էրեբունի և Նուբարաշեն վարչական շրջանների ընդհանուր իրավասության դատարանի դատավճռով, 24-ամյա Աշոտ Հովհաննիսյանը մեղավոր է ճանաչվել ՀՀ քրեական օրենսգրքի 242-րդ հոդվածի 2-րդ մասով և դատապարտվելով 1 տարի 6 ամիս ժամկետով ազատազրկման, սակայն նրա նկատմամբ պատիժը պայմանականորեն չի կիրառվի՝ սահմանվել է փորձաշրջան 1 տարի ժամկետով։

Մինչև դատաքննությունը սկսելն ամբաստանյալն առաջադրված մեղադրանքում իրեն մեղավոր է ճանաչել և միջնորդել կիրառել դատական քննության արագացված կարգ։

Մայթի վրա երիտասարդին վրաերթի ենթարկողը դատապարտվեց պայմանական ազատազրկման

Ըստ մեղադրանքի՝ Աշոտ Հովհաննիսյանը 19.01.2016թ. ժամը 16:00 սահմաններում «ԲՄՎ» մակնիշի ավտոմեքենան վարել է Տիգրան Մեծ պողոտայի կողմից դեպի Էրեբունի փողոց տանող ուղեմասի ձախ եզրային գոտով և հասնելով Արցախի պողոտայի թիվ 14 հասցեի դիմաց` թույլ է տվել ՃԵԿ-ի 65,66 և 67 կետերի ու «Ճանապարհային երթևեկության անվտանգության ապահովման մասին» ՀՀ օրենքի 23 հոդվածի 3-րդ կետի պահանջներին հակասող գործողություններ, որի հետևանքով կորցրել է ավտոմեքենայի կառավարումը, իր գործողություններով ստեղծել է վթարային իրադրություն, դուրս է եկել երթևեկելի գոտուց, վրաերթի ենթարկել մայթի վրայով քայլող հետիոտն Ա.Ներսիսյանին և անզգուշությամբ պատճառել մահ` ինքն իրեն զրկելով վրաերթը կանխելու տեխնիկական հնարավորությունից:

Դեպքից անմիջապես հետո վրաերթի ենթարկված 22-ամյա Արամ Ներսիսյանը շտապօգնության ավտոմեքենայով տեղափոխվել էր «Էրեբունի» բժշկական կենտրոն, որտեղ նրա առողջական վիճակը գնահատվել էր ծայրահեղ ծանր:

Շուրջ 16 օր անց գտնվելով անգիտակից վիճակում այդպես էլ գիտակցության չգալով երիտասարդը մահացել է:

Աղբյուր` Փաստինֆո