Փաստ ինֆո

2015թ. հունվարի 29-ին ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով տուժողների հարցաքննությունը շարունակվում է:

Դատարանն այսօր անցավ թվով երրորդ տուժողի հարցաքննությանը, Արտուշ Սիմոնյանը գործով տուժող է ճանաչվել ամբաստանյալ Վարազդատ Սաֆարյանի հետ ունեցած  վիճաբանության ու ծեծի դրվագով:

Տուժողը պնդեց, որ ամբաստանյալից պարտք ու պահանջ չունի, հիմա արդեն չի հիշում այդ դեպքի մասին, ավելին նա պատմեց,  որ ընդամենը քաշքշուկ է եղել նրանց մեջ այն բանից հետո, երբ լսարանում նստած դաս են սովորել, իսկ որպեսզի չաղմկեն, Սաֆարյանը պահանջել է լռություն պահպանել, այդ ընթացքում տուժող Սիմոնյանն իր համակուրսեցիներից մեկից ինչ-որ բան է հարցրել, ըստ իրեն՝ շշուկով, սակայն Սաֆարյանը դիտողություն է  արել, այստեղից էլ առաջացել է վեճը:

Ըստ տուժողի՝ քաշքշուկին միջամտել են ներկա կուրսանտները, իսկ թե կոնկրետ ովքեր, նա չէր հիշում, սակայն նշեց, որ ընդամենը քաշքշուկ է եղել, հարվածներ չեն հասցրել միմյանց, իսկ շրթունքը պատռվել է ու արնահոսել, քանի որ ձմեռ է եղել ու թեթև շարժումից ճաքել է ու արնահոսել:

Տուժողի խոսքով՝ միջադեպի վերաբերյալ վերադաս հրամանատարությանը տեղյակ չի պահել, տեղյակ են եղել միայն ներկաները:

Ինչ վերաբերում  է բուն գործին՝ Հայկազ Բարսեղյանի սպանությանն,  ապա ըստ տուժողի՝  այդ մասին տեղեկացել է դեպքի առավոտյան, երբ արթնացել են ու պետք է գնային շարահրապարակ, չի հիշում,  թե ումից, բայց բղավոցներ է լսել,  որ Հայկազը չկա, և, իր խոսքով, կուրսանտները գնացել են փնտրելու նրան, իսկ ինքը մնացել է վաշտի միջանցքում, սակայն երբեմն-երբեմն մոտեցել է պատուհաններին, որպեսզի տեսնի, թե ֆիզհրապարակում ինչ  է կատարվում: Քիչ անց լսել է, որ Հայկազին պպտաձողից կախված են գտել:

Իսկ թե ի՞նչն է եղել Հայկազ Բարսեղյանի սպանության պատճառը, տուժողը չի փորձել ճշտել: «Փորձում եմ դեպքը մոռանալ»,- ասաց նա:

Ըստ տուժողի՝ դեպքի օրը ինքը վերակարգում է եղել, սակայն իր պարտականությունները լրիվ չի կատարել, «խառն է եղել,  հոգնած», թե ինչու է խառն եղել, հոգնած, որ պարտականությունները  չի կատարել, այդպես էլ տուժողը հստակ պատասխան չտվեց, սակայն նշեց,  որ վերակարգում է եղել օրապահ երկրոդ հարկում և եթե միջանցքում կանգնում լիներ, ապա շարժ կնկատեր, իսկ քանի որ գնացել-եկել է ու ըստ կարգի չի կատարել օրապահի իր պարտականությունները, չի նկատել շարժ:

Տուժողը նաև նշեց,  որ քննիչը իրեն հարցաքննելիս ևս չի հավատացել, որ ինքը գտնվել է երկրոդ հարկում,  սակայն ոչինչ չի տեսել, միևնույն ժամանակ նա նշեց, որ քննիչին հայտնել է, որ  եթե օրապահի պահարանի մոտ կանգած չի եղել, որտեղից պետք է ինչ-որ բան տեսներ:

Մեղադրող դատախազի հարցին,  թե նախաքննության ընթացքում իր նկատմամբ ճնշում, սպառնալիքներ եղել են, թե ոչ, տուժողը բացասական պատասխան տվեց: Պարզվեց նաև, որ նախաքննության ընթացքում տուժողն իր ձեռքով է գրել ցուցմունքները:

Աղբյուր` Փաստինֆո