Փաստ ինֆո

Արարատի և Վայոց Ձորի մարզի ընդհանուր իրավասության դատարանը կքննի կնոջ սպանության մեջ մեղադրվող ամուսնու գործը, նախաքննական մարմնի կողմից Արմանին մեղադրանք է առաջադրվել՝ խանդի հողի վրա փաստացի ամուսնական հարաբերությունների մեջ գտնվող կնոջ սպանության համար:

Գործով նախաքննությունն ավարտվել և այն ուղարկվել է դատարան:

Ըստ մեղադրանքի՝ Արմանը 2016թ. ապրիլի 14-ին ժամը 20:00-ի սահմաններում, իր հետ փաստացի ամուսնական հարաբերությունների մեջ գտնվող Ռ.-ի կողմից Չարենցավան քաղաքից տաքսի ավտոմեքենայով իր տուն գալուց հետո տաքսու ուղևարձը չվճարելու պատճառով բարկացել է նրա վրա, որից հետո կինը գումար խնդրելու համար բջջային հեռախոսով խոսել է Արմանի քրոջ ամուսնու հետ և խոսելով դուրս եկել Արմանի տանից: Շուրջ երկու ժամ սպասելուց հետո Արմանը, տեսնելով, որ կինը չի վերադարձել, իսկ հեռախոսը դարձել է անհասանելի, տաքսի ավտոմեքենայի վարորդին ճանապարհել է և սկսել է փնտրել կնոջը:

Հաջորդ օրը ժամը 00:40-ի սահմաններում Արմանը կնոջը նկատելով Վեդի քաղաքի Արարատյան փողոցում հեռախոսով խոսելիս և կասկածելով իրեն դավաճանելու մեջ, շուրջ երկու-երեք կիլոմետր հետևել է նրան, իսկ ժամը 1-ի սահմաններում Վեդի- Վանաշեն ավտոճանապարհի երկրորդ կիլոմետրի հատվածում հասել է կնոջը և խանդի հողի վրա ապօրինաբար վերջինիս դիտավորությամբ կյանքից զրկելու նպատակով բռունցքներով և ոտքերով հարվածներ է հասցրել նրա մարմնի տարբեր մասերին:

Արդյունքում կինը ստացել է գանգի, կրծքավանդակի, որովայնի, կոնքի, աջ վերին վերջույթի, համակցված տրավմայի ձևով մարմնական վնասվածքներ, որից զարգացած տրավմատիկ հեմոռագիկ շոկի հետևանքով կնոջը պատճառել է մահ:

Արմանին մեղադրանք է առաջադրվել ՀՀ քրեական օրենսգրքի 104-րդ հոդվածի 1-ին մասով և նրա նկատմամբ որպես խափանման միջոց է ընտրվել կալանավորումը:

Աղբյուր` Փաստինֆո