Փաստ ինֆո

«Քաղաքացի դիտորդ» նախաձեռնությունն այսօր անցկացվող ՏԻՄ ընտրությունների քվեարկության ընթացքում արձանագրել է մի շարք խախտումներ ու թերություններ:

Նախաձեռնությունը դիտորդական առաքելություն է իրականացնում Արմավիր, Արագածոտն, Սյունիք և Տավուշ մարզերի 16` Աշտարակ, Գորիս, Տեղ, Ծաղկահովիտ, Ապարան, Ջրառատ, Բյուրական, Արմավիր, Ազատամուտ, Աչաջուր, Գետահովիտ, Դիտավան, Ենոքավան, Լուսահովիտ, Լուսաձոր, Գանձաքար համայնքներում: Նախաձեռնության 112 դիտորդները գտնվում են 57 տեղամասերում:
Ըստ «Թրանսփարենսի Ինթերնեշնլ» հակակոռուպցիոն կենտրոնի կայքում հրապարակված տեղեկատվության՝ ժամը 17-ի դրությամբ նախաձեռնությունն արձանագրել է 117 ընտրախախտում:

Առավել մեծ թվով խախտումներ արձանագրվել են Ապարանի թիվ 14/1 ընտրատեղամասում:

Դրանք են մասնավորապես՝ մարդկանց կուտակումներ տեղամասում և դրանից դուրս, յուրաքանչյուր խախտում արձանագրելու փորձի դեպքում սարսափելի գոռգոռոցներ, խոչընդոտում են դիտորդի աշխատանքին, վիրավորական արտահայտություններ, սպառնալիքների և ճնշումների հետևանքով դիտորդը չի կարողանում կատարել իր պարտականությունները, պարբերաբար անծանոթ մարդիկ են մտնում ընտրատեղամաս, ներկայանում որպես վստահված մարդիկ, իսկ երբ դիտորդը վկայական է ուզում, ցույց են տալիս թուղթ, որի վրա, բացի անուն ազգանունից, այլ տեղեկատվություն չկա,  անձնագիր պահանջելու դեպքում դուրս են գալիս իբր մեքենայից բերելու ու էլ հետ չեն գալիս, դիտորդը գրանցել է դեպք, երբ քվեաթերթիկը ընտրատեղամասից դուրս է հանվել, տեղամասի մուտքի դարպասի վրա փակցված է ավագանու անդամի թեկնածուներից մեկի նկարով քարոզչանյութ:

Հիշեցնենք, որ Հայաստանի 5 մարզերի՝ Արագածոտնի, Արարատի, Արմավիրի, Սյունիքի, Տավուշի,  317 համայնքներում այսօր անցկացվում են տեղական ինքնակառավարման մարմինների ընտրություններ:

Լուսանկարը՝ «Ֆոտոլուր»-ի

Աղբյուր` Փաստինֆո