Փաստ ինֆո

«Քաղաքացի դիտորդ» նախաձեռնությունն այսօր անցկացվող ՏԻՄ ընտրությունների քվեարկության ընթացքում արձանագրել է մի շարք խախտումներ ու թերություններ:

Նախաձեռնությունը դիտորդական առաքելություն է իրականացնում Արմավիր, Արագածոտն, Սյունիք և Տավուշ մարզերի 16` Աշտարակ, Գորիս, Տեղ, Ծաղկահովիտ, Ապարան, Ջրառատ, Բյուրական, Արմավիր, Ազատամուտ, Աչաջուր, Գետահովիտ, Դիտավան, Ենոքավան, Լուսահովիտ, Լուսաձոր, Գանձաքար համայնքներում: Նախաձեռնության 112 դիտորդները գտնվելու են 57 տեղամասերում:

Ըստ «Թրանսփարենսի Ինթերնեշնլ» հակակոռուպցիոն կենտրոնի կայքում հրապարակված տեղեկատվության՝ ժամը 12-ի դրությամբ, այն է՝ 4 ժամում, նախաձեռնությունն արձանագրել է 85 ընտրախախտում: Դրանք են՝ մարդկանց կամ մեքենաների կուտակումներ տեղամասից 50 մետր շառավիղով, ընտրողների ուղղորդում տեղամասում և դրանից դուրս, բազմակի (ուրիշի փոխարեն) քվեարկություն կամ այդպիսի փորձ, ընտրական հանձնաժողովի կողմից դիտորդի ազատ տեղաշարժման խոչընդոտում, նրա իրավունքների սահմանափակում և այլն

Ըստ այդմ, Մասնավորապես, Աշտարակի 14/10 ընտրատեղամասում ընտրողները գալիս են քվեարկելու թերթիկներով, ուր գրված են ընտրողների հերթական համարները և ավագանու թեկնածու Տաշչյան Մուշեղ Սայաթ-Նովայի հերթական համարը, ինչը, ըստ ամենայնի, նախապես ուղղորդման ցուցիչ է, իսկ հիշյալ թղթիկները` քվեարկության նկատմամբ հսկողության միջոց:

Ջրառատի 20/2 տեղամասում մարկդանց և մեքենաների կուտակումներ են` տեղամասից 50 մետր շառավղով, որն ըստ օրենքի արգելված է:

Հիշեցնենք, որ Հայաստանի 5 մարզերի՝ Արագածոտնի, Արարատի, Արմավիրի, Սյունիքի, Տավուշի,  317 համայնքներում այսօր անցկացվում են տեղական ինքնակառավարման մարմինների ընտրություններ:

Աղբյուր` Փաստինֆո