Փաստ ինֆո

Արմեն Տեր-Սահակյանի բանդայի վերաբերյալ երբեմնի աղմկահարույց գործով ցմահ ազատազրկման դատապարտված Ալիկ Գրիգորյանն այսօր հայտարարեց, որ ինքը վերջին հինգ տարիների ընթացքում որևէ տույժի չի ենթարկվել,  պետության հետ էլ պարտք ու պահանջ չունի:

Հայտնելով այս մասին դատարանում իր դիմում-բողոքի քննությանը, Ալիկ Գրիգորյանը նշեց, որ այդուհանդերձ  քրեակատարողական հիմնարկը մերժել է իր դիմումը՝ պայմանական վաղաժամկետ ազատ արձակելու կամ պատժի չկրած մասը ավելի մեղմ պատժատեսակով փոխարինելու մասին:

Ցմահ դատապարտյալը դժգոհություն հայտնեց, որ իր հոդվածները փոխվել են՝ «լավ է, տեռորիզմ չեն գրել», ու ներկայացվել է բնութագիր, «որը ես չեմ»: «Ոչ մի բան չես արել ու քեզ ներկայացնում են որպես գել ու գազան, չեմ կարող դա տանել»,- ասաց նա:

Դատապարտյալի շահերի պաշտպան, հանրային պաշտպան Կարեն Մեժլումյանը նշեց, որ սխալ հոդվածներ նշելը, շատ հնարավոր է, որ  վրիպակ է: Սակայն դա էլ է վկայում, որ որևիցե կերպ պատճառաբանված չի կարելի համարել քրեակատարողական հիմնարկի որոշումը և որ պայմանական վաղաժամկետ ազատ արձակման գործընթացը ձևական բնույթ ունի: Ինչի՞ հիման վրա է բացասական բնութագիր ներկայացվել և ինչո՞ւ է մերժվել Ա.Գրիգորյանի դիմումը, հարցրեց փաստաբանը:

Դիմելով քրեակատարողական հիմնարկի ներկայացուցչին՝ դատապարտյալն իր հերթին հայտարարեց. «Չեք իմանում, թե 15 օր մեր խցում ի՛նչ է կատարվում՝ Արմեն Տեր-Սահակյանը 15 օր հացադուլի մեջ է»:

Ինքն՝ Ալիկ Գրիգորյանն էլ, խնդիրներ ունի՝ թուրքի սնայպերը խփել է իր որդու թևին, ինչի հետևանքով որդին երրորդ կարգի հաշմանդամ է դարձել, և ինքը պետք է որդուն բուժման տանի:

«Նուբարաշեն» քրեակատարողական հիմնարկի ներկայացուցիչ Արմեն Պետրոսյանը հայտարարեց, որ Ալիկ Գրիգորյանը մեկ տարվա՝ 2011թ. ընթացքում, երկու անգամ կարգապահական տույժերի է ենթարկվել, խախտումները ճանաչվել են որպես չարամիտ խախտումներ:

Քրեակատարողական հիմնարկի ներկայացուցիչը հիշատակեց  նաև այն, որ 1998թ. Ալիկ Գրիգորյանը գնահատվել է որպես բարձր ռիսկայնության փախուստի հակում ունեցող անձ՝ ինչ-ինչ գաղտնի օպերատիվ տվյալի հիման վրա, ռիսկայնությունը նրանից հանվել է 2012թ.: 

Բողոքի քննությունը կշարունակվի հաջորդ դատական նիստում:

Նշենք, որ Արմեն Տեր-Սահակյանի ու մյուսների  գործի  առանցքում ՀՀ ներքին գործերի նախարար Վանո Սիրադեղյանն է: Ըստ վերջինիս առաջադրված մեղադրանքի՝ նա 1992թ. ամռանը Արմեն Տեր-Սահակյանի միջոցով կազմակերպել է կայուն զիված հանցավոր խումբ՝ բանդա, իսկ հետագայում հովանավորել է բանդային և պարտակել նրա կատարած բազմաթիվ ավազակային հարձակումներն ու այլ հանցագործությունները:

Աղբյուր` Փաստինֆո