Փաստ ինֆո

ՀՅԴ-ն պետական կառավարման գործում պահանջկոտությունից չի վախենում, այլ ցանկանում է, որ դա քաջալերվի: Խորհրդարանական ճեպազրույցների շրջանակներում լրագրողների հետ հանդիպմանն այս մասին ասաց ԱԺ ՀՅԴ խմբակցության ղեկավար Արմեն Ռուստամյանը՝ պատասխանելով հարցին, թե հնարավո՞ր է, որ նորանշանակ վարչապետ Կարեն Կարապետյանն այնքան պահանջկոտություն դրսևորի, որ ՀՅԴ-ն ինքնակամ վայր դնի պորտֆելները:

«Մենք ցանկանում ենք, որ դա տեղի ունենա անընդհատ: Եթե վարչապետը պահանջկոտ է, դա միայն ողջունելի է: Եվ մենք մեր նախարարներին չենք ասում, որ այնտեղ իրենք պաշտպանված են նրա համար, որ դաշնակցական են: Նրանք պաշտպանված են իրենց աշխատանքով, իրենց պրոֆեսիոնալ կարողություններով: Մենք՝ որպես քաղաքական ուժ, այնտեղ ներկայացված ենք այնքանով, որքանով ունենք համաձայնություն, որը հրապարակվել է և ներկայացվել է հանրությանը: Այսինքն, մենք համաձայնեցրել ենք մեր արտաքին և ներքին քաղաքականության ռազմավարությունը, որին պետք է համապատասխանեն բոլոր քայլերը»,- «Արմենպրես»-ի հաղորդմամբ՝ ասաց Ռուստամյանը:

Նրա խոսքով՝քայլերն այդ ռազմավարությանը համապատասխանեցնելու հետ կապված մարտավարական, անհրաժեշտ հրահանգներ կլինեն, պահանջկոտություն կլինի, իրենք միայն դա կողջունեն:

«Մեր գործողությունները չպետք է դուրս գան այդ ռազմավարության տրամաբանությունից: Վարչապետը կարող է ասել, որ ռազմավարությունը ճիշտ է, բայց ինքն այս կամ այն քայլի անհրաժեշտություն է տեսնում, մենք դա կողջունենք: Հենց դա էլ մենք ցանկանում ենք, որ լինի: Ես կոչ եմ անում բոլորին, այդ թվում նաև վարչապետին, որ մենք միասին խոսենք հայեցակարգված ռազմավարության հստակ քաղաքական դրույթների շուրջ, համապատասխանեցնենք քայլերը՝ կապված օբյեկտիվ խնդիրների հետ»,- նշեց ՀՅԴ-ական պատգամավորը:

Աղբյուր` Փաստինֆո