Փաստ ինֆո

Դոնի Ռոստովում ավազակության, մարդու առևանգման ու մահվան հանգեցրած ծանր մարմնական վնասվածք հասցնելու վերաբերյալ գործով ամբաստանյալ Արմեն Ղազարյանի պաշտպան Հայարփի Սարգսյանը վերաքննիչ բողոք է ներկայացրել՝ պահանջելով վերացնել ամբաստանյալի խափանման միջոց կալանավորումը: Այս մասին «Փաստինֆո»-ի լրագրողին հայտնեց փաստաբան Հայարփի Սարգսյանը:

Վերաքննիչ բողոքը ներկայացվել է ամբաստանյալի նկատմամբ ընտրված կալանավորումը վերացնելու պաշտպանական կողմի միջնորդությունը մերժելու առաջին ատյանի դատարանի որոշման դեմ:

Արմեն Ղազարյանի պաշտպաններ Հայարփի Սարգսյանն ու Արա Ղարագյոզյանը գործը քննող առաջին ատյանի դատարանի նախորդ դատական նիստում միջնորդել էին վերացնել իրենց պաշտպանյալի նկատմամբ ընտրված կալանավորումը՝ ընդգծելով, որ Ա.Ղազարյանն ինքնակամ է ներկայացել, քննությանը խոչընդոտելու ուղղությամբ ոչ մի քայլ չի արել: Ուստի, ըստ պաշտպանների, անհիմն է ենթադրությունը, թե ազատության մեջ հայտնվելով՝ նա կարող է թաքնվել կամ խոչընդոտել քննությանը:

Ըստ պաշտպանական կողմի, խափանման միջոց կալանքն արդեն կրում է պատժի տարրեր՝ հաշվի առնելով, որ ամբաստանյալը երեք տարուց ավելի գտնվում է կալանքի մեջ:

Պաշտպանական կողմը դժգոհություն էր հայտնել նաև այն կապակցությամբ, որ դատական նիստերը հետաձգվում են՝ ՌԴ-ից չեն ներկայանում տուժողներն ու վկաները:

Ի դեպ, առաջին ատյանի դատարանի այսօրվա դատական նիստում ևս կողմերին հայտնվեց, որ վկաներին ու տուժողներին ծանուցելու վերաբերյալ դատարանը ՌԴ-ից դեռևս տեղեկություններ չի ստացել:

Հիշեցնենք, որ Արմեն Ղազարյանը մեղադրվում է ՀՀ քրեական օրենսգրքի 175-րդ հոդվածի 3-րդ մասի 3-րդ կետով՝ առողջությանը ծանր վնաս պատճառելով ավազակություն, 131-րդ հոդվածի 2-րդ մասի 1-ին, 6-րդ և 7-րդ կետերով՝ շահադիտական դրդումներով երկու կամ ավելի անձանց առևանգելը, որը կատարվել է մի խումբ անձանց կողմից նախնական համաձայնությամբ, 112-րդ հոդվածի 2-րդ մասի 14-րդ կետով՝ դիտավորությամբ առողջությանը ծանր վնաս պատճառելը, որն անզգուշությամբ առաջացրել է տուժողի մահը:

Աղբյուր` Փաստինֆո