Փաստ ինֆո

Ազգային ժողովը քննարկում է Հեռուստատեսության և ռադիոյի ազգային հանձնաժողովի անդամի ընտրության հարցը: ՀՌԱՀ անդամի պաշտոնը թափուր է հանձնաժողովի անդամ Արամ Մելքոնյանի պաշտոնավարման ժամկետը լրանալուց հետո:

Ինչպես «Փաստինֆո»-ն ավելի վաղ հայտնել է, ՀՌԱՀ անդամի թափուր տեղի մրցույթում հաղթող է ճանաչվել Տիգրան Հակոբյանը: Տ.Հակոբյանը եղել է «Ռեսբուպլիկա Արմենիա», «Հայք» թերթերի գլխավոր խմբագիրը, զբաղեցրել է ՀՀ Հեռուստառադիոպետկոմի նախագահի և «Արմենպրես» լրատվական գործակալության գլխավոր տնօրենի պաշտոնները, եղել է ՀՀ կառավարության աշխատակազմի տեղեկատվության և հանրության հետ կապերը վարչության և Կառավարությանը առընթեր տեղեկատվության և գրահրատարակչության վարչության պետը:

«Կարծում եմ, որ կարող եմ մասնակից լինել Հայաստանի էլեկտրոնային մեդիայի զարգացմանը և հանձնաժողովների այլ անդամների, շահագռգիր կազմակերպությունների, հասարակության լայն շերտերի հետ փորձել լուծել  այն խնդիրները, որոնք կանգնած են այսօր Հայաստանի ԶԼՄ-ների առջև»,- հայտնեց թեկնածուն՝ պարզաբանելով, թե ինչու է ցանկանում դառնալ ՀՌԱՀ անդամ:

Այս պահին թեկնածուն պատասխանում է պատգամավորների հարցերին:

ԱԺ կանոնակարգ-օրենքի համաձայն՝ ՀՌԱՀ անդամի թափուր տեղի համար թեկնածու կարող է ինքնաառաջադրվել յուրաքանչյուր ոք՝ «Հեռուստատեսության և ռադիոյի մասին» ՀՀ օրենքի պահանջների համաձայն։

Թեկնածուն ներկայացնում է երկու երաշխավորագիր զանգվածային լրատվության և հեռահաղորդակցության բնագավառներում ՀՀ օրենսդրությամբ սահմանված կարգով գրանցված և տվյալ բնագավառում գործունեություն իրականացնող հասարակական կազմակերպություններից:

Մրցույթն անցկացվում է երկու փուլով՝ թեստավորման և հարցազրույցի։

Մրցույթի արդյունքների հրապարակումից անմիջապես հետո մրցույթի արդյունքների վերաբերյալ եզրակացությունը մրցութային հանձնաժողովի նախագահը գրավոր ներկայացնում է Ազգային ժողովի նախագահին։

Մրցույթի արդյունքների հիման վրա Ազգային հանձնաժողովի անդամի ընտրության հարցը ներկայացվում է Ազգային ժողովի առաջիկա չորսօրյա նիստերի օրակարգ։

Ազգային հանձնաժողովի անդամ է ընտրվում Ազգային ժողովի պատգամավորների ընդհանուր թվի ձայների մեծամասնությունն ստացած թեկնածուն՝ փակ գաղտնի քվեարկությամբ։

Ազգային ժողովի կողմից Ազգային հանձնաժողովի անդամի ընտրության արդյունքների մասին տեղեկությունները ԱԺ նախագահը ընտրության հաջորդ օրը հրապարակում է մամուլում և զանգվածային լրատվության մյուս միջոցներում։

Աղբյուր` Փաստինֆո