Փաստ ինֆո

Ազգային ժողովն այսօր կեսօրին մեկնարկելիք նիստում կշարունակի ՀՀ նոր գլխավոր դատախազի նշանակման հարցի քննարկումը: 

Հարցի քննարկումը նախօրեին ընդհատվել է պատգամավորների ելույթների փուլում: Հերթագրված 13 պատգամավորներից նախօրեին հասցրել են ելույթ ունենալ ընդամենը 2-ը:
Քննարկման ավարտին կկազմակերպվի փակ գաղտնի թվեարկություն:

Հիշեցնենք, որ ՀՀ Նախագահի կողմից այդ պաշտոնում առաջարկվել է ՀՀ գլխավոր դատախազի տեղակալ Արթուր Դավթյանի թեկնածությունը:

ՀՀ գլխավոր դատախազի պաշտոնը թափուր է օգոստոսի 4-ից, երբ Գևորգ Կոստանյանն առողջական խնդիրների պատճառով դիմեց ՀՀ նախագահին՝ խնդրելով ընդունել ՀՀ գլխավոր դատախազի պաշտոնից ազատվելու վերաբերյալ իր դիմումը:

Ըստ ԱԺ նախագահ Գալուստ Սահակյանի կողմից նախօրեին հրապարակված քննարկվող հարցերի հերթականության՝ ՀՀ գլխավոր դատախազի նշանակման հարցի քննարկումից հետո խորհրդարանը ձեռնամուխ կլինի Հեռուստատեսության և ռադիոյի ազգային հանձնաժողովի անդամի ընտրությանը: Այդ պաշտոնում առաջադրված է Տիգրան Հակոբյանի թեկնածությունը: ՀՌԱՀ անդամի պաշտոնը թափուր է հանձնաժողովի անդամ Արամ Մելքոնյանի պաշտոնավարման ժամկետը լրանալուց հետո:

Տ.Հակոբյանն եղել է «Ռեսբուպլիկա Արմենիա», «Հայք» թերթերի գլխավոր խմբագիրը, զբաղեցրել է ՀՀ Հեռուստառադիոպետկոմի նախագահի և «Արմենպրես» լրատվական գործակալության գլխավոր տնօրենի պաշտոնները, եղել է ՀՀ կառավարության աշխատակազմի տեղեկատվության և հանրության հետ կապերը վարչության և Կառավարությանը առընթեր տեղեկատվության եւ գրահրատարակչության վարչության պետը:

Օրվա վերջին՝ երրորդ նիստում, ԱԺ կանոնակարգ-օրենքի համաձայն, կառավարության անդամների պաշտոնակատարները կպատասխանեն պատգամավորների հարցերին:

Աղբյուր` Փաստինֆո