Փաստ ինֆո

ԱԺ-ում կառավարության հետ հարցուպատասխանի ժամանակ ԲՀԿ խմբակցության քարտուղար Վահե էնֆիաջյանը ՀՀ էներգետկայի և բնական պաշարների նախարարի պաշտոնակատար Լևոն Յոլյանից հետաքրքրվեց երբեմնի տնտեսական գիգանտ համարվող Վանաձորի Քիմպրոմ գործարանի ճակատագրից: «Ի վերջո գործարանն աշխատելու է, թե՞ անցնելու է պատմության գիրկը: Գործարանը, որ երկար տարիներ ուներ շուրջ չորս ու կես հազար աշխատող, այսօր ունի միայն տասնվեցը, ովքեր համարվում են հիմնական աշխատողներ: Գիտենք նաև, որ գործարանն արդեն լուծարման պրոցեսում է գտնվում, սակայն որևիցե կերպ մեզ այդ մասին ոչ ոք ոչինչ չի ասում: Ավելին՝ մեզ, որպես ԱԺ պատգամավորների հնարավորություն չընձեռվեց հայտնվել գործարանի տարածքում և ծանոթանալ գործարանի խնդիրներին: Այսինքն՝ անհսականալի մարդիկ անհասականալի  ձևակերպումներով խաչընդոտում են նաև պատգամավորներին, ինչն արդեն դառնում է նախադեպ: Ուզում եմ իմանալ առաջիկայում ի՞նչ ծրագրեր կան գործարանի ու աշխատակիցների հետ կապված»,- հետաքրքրվեց պատգամավորը:

Լ. Յոլյանն հիշեցրեց, որ սույն թվականի փետրվար ամսին Լոռու մարզի ընդհանուր իրավասության դատարանի որոշմամբ՝ գործարանը ճանաչվել է սնանկ, և սնանկության կառավարիչ է նշանակվել Կարեն Ասատրյանը: «Իմ  կարծիքով, բոլոր այդ հարցերը պետք է  համապատասխան կառավարչին տայիք»,- արձագանքեց նախարարի պաշտոնակատարը:

Էնֆիաջյանն էլ իր հերթին արձագանքեց, թե իրենք բազմաթիվ անգամ իրենց մտահոգությունները հայտնել են կառավարությանը, սակայն բոլորն էլ անտեսվել են, և ընդգծեց, որ իրենց մտահոգություններն էլ ավելի խորացան: «Գործարանի տարածքը գտնվում է անմխիթար վիճակում, գույքը թալանված է, իսկ մենք ԱԺ պատգամավորներով չկարողացանք իրավիճակը փոխել»,- հավելեց նա:

«Պարոն Էնֆիաջյան, նախկինում ևս այդ հարցը բարձրացրել եք, սակայն հետագայում ճշտել, որ նման բան չկա: Հիմա էլ կարծես նույն բանն է կրկնվում»,- նկատեց Լ. Յոլյանը:

Պատգամավորն էլ իր հերթին արդարացավ, թե երբևէ նման բան չի եղել, իսկ նախարար պնդեց, որ կարող է նույնիսկ խոսակցության մանրամասները ներկայացնել: «Կրկնում եմ, որ օրենքով սահմանված Ձեր լիազորություններով Դուք կարող եք այդ հարցերը տալ սնանկացման կառավարչին: Դուք դիմե՞լ ենք նրան»,- հետաքրքրվեց նա, սակայն այս անգամ տեղից արձագանքեց ԲՀԿ խմբակցության ղեկավար Նաիրա Զոհրաբյանը, ում դուր չէր եկել Յոլյանի արձագանքը: «Մենք դիմել ենք, և մեզ ոչինչ չեն տրամադրել»,- նեղսրտեց նա:

Նիստերի դահլիճում մեծ աղմուկ բարձրացավ, իսկ ԱԺ նախագահ Գալուստ Սահակյանը փորձեց սաստել ու փրկել իրավիճակը. «Սա Ազգային Խորհրդի նիստ է, տեղերից մի աղմկեք»,- հայտարարեց նա:

Աղբյուր` Փաստինֆո