Փաստ ինֆո

Երրորդմասցի Լյովիկի ու նրա ընկերների սպանության գործով այսօրվա դատական նիստում սկսվեց դատարան չներկայացող վկաների նախաքննական ցուցմունքների հրապարակումը: Ընդհանուր  առմամբ վկաները  54-ն են, որոնցից դատարանում հարցաքննվել են 25-ը, իսկ մեկը մահացել է:

Դատարանը մինչև որոշում կայացնելը արձանագրեց, որ վկաներ կան, որոնց վերաբերյալ  արդեն չորս անգամ բերման ենթարկելու որոշումներ են կայացվել: Վկաներից ութն, ըստ սահմանային ծառայությունների տվյալների, գտնվում են հանրապետությունից դուրս: 

Մեղադրող կողմը միջնորդեց հրապարակել չներկայացող վկաների նախաքննական ցուցմունքները, քանի որ ողջամտության սահմաններում դատարանի կողմից բոլոր միջոցները ձեռնարկվել են նրանց ներկայությունն ապահովելու ուղղությամբ, սակայն ապարդյուն, ուստի առկա է նրանց նախաքննական ցուցմունքները հրապարակելու ու դրանք հետազոտելու հիմք: 

Ամբաստանյալների պաշտպան, փաստաբան Երվանդ Վարոսյանը նշեց, որ նախաքննական ցուցմունքները հրապարակվում են վկաների ներկայությունը դատարանում ապահովելու անհնարինության դեպքում: Փաստաբանը չառարկեց, որպեսզի հրապարակվեն  հանրապետությունում չգտնվող վկաների նախաքննական ցուցմունքները, իսկ մնացած մասի ցուցմունքները, ըստ պաշտպանի, դեռ պետք չէ հրապարակել: «Պաշտպանական կողմն իրավունք ունի հարցեր ուղղել նրանց»,- ասաց Ե.Վարոսյանը:

Դատարանը, սակայն, որոշեց հրապարակել բոլոր չներկայացող վկաների ցուցմունքները:

Առաջինը հրապարակվեցին   վկա Վարդանի ցուցմունքները, ում մեքենայի զույգ համարանիշները հայտնվել էին սպանության վայրում հայտնաբերված մեքենայի վրա: Վկան սկզբնապես այլ բացատրություն էր տվել իր համարանիշների տեղաշարժին: Ըստ վկայի, ինքն իր մեքենան տարել է մանկության ընկերոջ մոտ՝ ներկելու համար, ինքը հանել է համարանիշները, որպեսզի  «տակի կեղտը մաքրի», հետո երևի աղբի հետ գցել է աղբամանը:

Ավելի ուշ վկան հայտնել է, որ իր ցուցմունքներն իրականությանը չեն համապատասխանում: Վկան հայտնել է, որ մեքենան կանգնեցրել է իր տան մոտ, կանգնեցնելիս համարանիշները տեղում են եղել, սակայն առավոտյան տեսել է, որ դրանք գողացել են մեքենայի վրայից:

Մյուս վկան՝ Վարդգեսը,  նախաքննության ժամանակ հայտնել էր, որ իր եղբայր Դավիթը կալանավոր է և գտնվում է «Նուբարաշեն» քրեակատարողական հիմնարկում, ինքը գնացել է այնտեղ եղբոր հետ տեսակցության: Վկան իմացել է, որ Լևոն Ղազարյանը (գործով երեք տուժողներից մեկը), գալու է, քանի որ հիշյալ քրեակատարողական հիմնարկի մոտ տեսել է վերջինիս մտերիմին՝  Մոսոյին (գործով տուժող Մեսրոպ Նազարյանցին), ով հայտնել է, որ Լյովիկը շուտով կգա՝ վերջինս ևս ցանկանում էր տեսակցել վկայի եղբոր հետ: Ապա վկան լսել է ինքնաձիգի խառը կրակահերթեր: Տեսել է Լյովիկի ավտոմեքենան, Լյովիկին ու Մոսոյին՝ ընկած, անշարժ վիճակում էին, Լյովիկը դեռ ողջ էր, անգամ խոր շունչ քաշեց, նշել էր վկան:

Հաջորդ վկան՝ Աշոտը,  Լևոն Ղազարյանի ազգականն է, և կալանավորի եղբոր՝ Վարդգեսի,  հետ գնացել էր քրեակատարողական հիմնարկ Դավիթին տեսակցելու համար: Վկան նշել էր, որ Լյովիկն առաջին անգամը չէր գնում Դավիթին տեսակցելու, դեպքից մեկ ամիս առաջ էլ էր տեսակցել, ի դեպ, ըստ գործի տվյալների, տեսակցությունը չէր գրանցվել:

Վարդգեսն ու Աշոտը կրակոցներից հետո Լևոն Ղազարյանին պառկեցրել են մի մեքենայի մեջ՝ հիվանդանոց  տեղափոխելու համար, սակայն նույն մեքենայով նրան չեն ուղեկցել՝ Լ.Ղազարյանը հիվանդանոց տեղափոխվելու ճանապարհին մահացել էր:

Նախաքննական ցուցմունքների հրապարակումը ընդհատվեց էլեկտրականության մատակարարման խափանման պատճառով, ցուցմունքների հրապարակումը կշարունակվի հաջորդ դատական նիստում:

Հիշեցնենք, որ ըստ մեղադրանքի,  ամբաստանյալ Վահան Հակոբյանը մի խումբ անձանց կողմից նախնական համաձայնությամբ ապօրինի ձեռք է բերել և պահել մարտական ակոսափող հրազեն հանդիսացող` 1963թ. գործարանային արտադրության 7,62 մմ տրամաչափի   «ԱԿՄՍ » տեսակի ինքնաձիգ, 1976թ. գործարանային արտադրության 7,62 մմ տրամաչափի «ԱԿՄ» տեսակի ինքնաձիգ և 1960թ. գործարանային արտադրության 7,62 մմ տրամաչափի «ԱԿՄ» տեսակի ինքնաձիգ, որոնք ապահովված են եղել պահունակներով, ինչպես նաև ռազմամթերք հանդիսացող փամփուշտներով:

Ըստ մեղադրանքի, 2015թ. մարտի 4-ին ժամը 13:50-ի սահմաններում Վահան Հակոբյանը, Սարգիս Հախանումյանը և Սարգիս Գրիգորյանը նախնական համաձայնությամբ, շատերի կյանքի համար վտանգավոր եղանակով, երկու և ավելի անձանց ապօրինաբար կյանքից զրկելու դիտավորությամբ, իրենց մոտ ապօրինի պահվող մարտական ակոսափող հրազեն հանդիսացող թվով 3 ինքնաձիգերից կրակահերթ են արձակել (առնվազն 82 փամփուշտ) Լևոն Ղազարյանի, Դրաստամատ Թադևոսյանի և Մեսրոպ Նազարյանցի ուղղությամբ, որի հետևանքով ստացված հրազենային վնասվածքներից Մ.Նազարյանցը տեղում, իսկ Լ.Ղազարյանն ու Դ.Թադևոսյանը  «Էրեբունի»  բժշկական կենտրոն տեղափոխվելու ճանապարհին մահացել են:

Աղբյուր` Փաստինֆո