Փաստ ինֆո

«Լեռնային Ղարաբաղի դե յուրե ճանաչումը ժամանակի խնդիր է»,- այս մասին այսօր Ազգային ժողովում լրագրողների հետ զրույցում ասաց ԱԺ փոխխոսնակ Էդուարդ Շարմազանովը: «Սա է մեր կարծիքը. չի Ղարաբաղը երբեք չի լինելու Ադրբեջանի կազմում: Թիվ մեկ խնդիրը կարգավիճակն է: տարածքներից պետք չէ խոսել: Խնդիրը պետք է լուծի Ղարաբաղի ժողովուրդը: Իսկ Հայաստանը պաշտպանելու է ԼՂՀ ժողովրդի արդար պայքարը», – 1In.am-ի փոխանցմամբ՝ նշել Է.Շարմազանովը:

Նրա խոսքով՝ ձեռքբերված պայմանավորվածությունները չեն իրականանում Ադրբեջանի պատճառով:

«Սա Հայաստանի և Ադրբեջանի միջև տարածքային վեճ չէ: սա ինքնորոշման իրավունքի իրացման պայքար է: Երբ ԼՂ իշխանությունը գա բանակցային սեղան, ինքն էլ կորոշի՝ ինչ են զիջում, ինչ են փոխզիջում», – ընդգծեց ԱԺ փոխխոսնակը:

Անդրադառնալով Հովիկ Աբրահամյանի հրաժարականին՝ ԱԺ փոխնախագահ Էդուարդ Շարմազանովը նշեց. «Դրական ենք գնահատում ՀՀ նախկին վարչապետ Հովիկ Աբրահամյանի պետականամետ դիրքորոշումը, նա իր քայլով օրինակ ծառայեց շատ պաշտոնյաների համար, որ եթե կա պետական շահ, չպետք է վերմակը քաշես միայն քեզ վրա»: Նա նաև հավելեց, որ դրական է գնահատում Հ. Աբրահամյանի գործունեությունը, քանի որ, իր կարծիքով, Հ. Աբրահամյանը մինիմումի է հասցրել այն վտանգները, որի առջև կանգնել էր Հայաստանը:

Է. Շարմազանովի խոսքով՝ Հովիկ Աբրահամյանը դեռ շատ անելիքներ ունի քաղաքականության մեջ։ «Հովիկ Աբրահամյանը մնում է ՀՀԿ-ում և իմ սուբյեկտիվ կարծիքով, դեռ անելիքներ ունի, ինչպես կուսակցությունում, այնպես էլ քաղաքականության մեջ: Մենք թիմակիցներ ենք: Մի՛ զարմացեք՝ քաղաքականությունն այդպիսին է՝ մի օր գալիս ես, մի օր՝ գնում։ Ես հիմա ձեր հետ խոսում եմ, բայց վաղը կարող է ես էլ գնամ», – ասաց Է. Շարմազանովը:

Մանրամասները՝ սկզբնաղբյուր-կայքում և տեսանյութում

Աղբյուր` Փաստինֆո