Փաստ ինֆո

Սեպտեմբերի 13-ին կմեկնարկի այս գումարման Ազգային ժողովի վերջին աշնանային նստաշրջանը:

Առաջին նիստերը, ի տարբերություն սովորական 4-ի, կտևեն 3 օր, ինչը պայմանավորված է սեպտեմբերի 12-ը ոչ աշխատանքային օր լինելու հանգամանքով:

Նստաշրջանին ընդառաջ՝ ԱԺ-ի սեպտեմբերի 9-ի աշխատանքային խորհրդակցության ընթացքում արդեն իսկ ձևավորվել են նստաշրջանի և սեպտեմբերի 13-15-ի նիստերի օրակարգերի մասին ԱԺ որոշումների նախագծերը: Դրանցում համապատասխանաբար ընդգրկվել են 170 հարց ու 33 միջազգային պայմանագիր և 136 հարց ու 32 միջազգային պայմանագիր:

Օրակարգերի մասին որոշումների նախագծերի քվեարկությունը տեղի կունենա սեպտեմբերի 13-ի ԱԺ առաջին նիստում:

Ինչպես «Փաստինֆո»-ն արդեն իսկ հայտնել է, առաջին իսկ նիստերում ԱԺ-ն կքննարկի նոր գլխավոր դատախազի նշանակման հարցը: Հիշեցնենք, որ ՀՀ գլխավոր դատախազի պաշտոնը թափուր է օգոստոսի 4-ից, երբ Գևորգ Կոստանյանն առողջական խնդիրների պատճառաբանությամբ հրաժարական տվեց։

Հանրապետության Նախագահի առաջարկությամբ Ազգային ժողովը Գլխավոր դատախազին կընտրի գաղտնի քվեարկությամբ՝ 6 տարի պաշտոնավարման ժամկետով: Այդ պաշտոնում ՀՀ Նախագահի կողմից առաջարկվել է ՀՀ գլխավոր դատախազի տեղակալ Արթուր Դավթյանի թեկնածությունը:

Նստաշրջանի օրակարգում են նաև 2015-ի տարեվերջին հանրաքվեով ընդունված Սահմանադրության փոփոխություններով պայմանավորված մի շարք հարցեր: Մասնավորապես, խորհրդարանը պետք է մինչև նոյեմբերի 1-ը կազմավորի նոր Կենտրոնական ընտրական հանձնաժողովը: Այն, ինչպես և ներկայումս գործողը, կազմված է լինելու յոթ անդամից: ԿԸՀ նախագահին և մյուս անդամներին Ազգային ժողովի իրավասու՝ ԱԺ պետաիրավական հարցերի մշտական հանձնաժողովի առաջարկությամբ ընտրելու է Ազգային ժողովը` պատգամավորների ընդհանուր թվի ձայների առնվազն երեք հինգերորդով, վեց տարի ժամկետով: Նշենք, որ հիշյալ հանձնաժողովում սեպտեմբերի 5-ին մեկնարկել է ԿԸՀ անդամների թեկնածուների առաջադրումը, որը կտևի մինչև սեպտեմբերի 15-ը:

Աշնանային նստաշրջանում խորհրդարանը պետք է քննարկի նաև Սահմանադրության փոփոխություններով պայմանավորված մի շարք օրինագծեր: Դրանց թվում է ԱԺ նոր կանոնակարգ-օրենքը: Վերջինիս նախագծի մշակված նախնական տարբերակը, ինչպես «Փաստինֆո»-ի թղթակցին հայտնեց ԱԺ պետաիրավական հարցերի մշտական հանձնաժողովի նախագահ Հովհաննես Սահակյանը, արդեն իսկ պատրաստ է և ուղարկվել է ԱԺ բոլոր խմբակցություններին՝ այն քննարկելու և կարծիքներ ձևավորելու նպատակով, որից հետո նախագիծը ԱԺ-ում կդրվի պաշտոնական շրջանառության մեջ:

Բացի այդ, Սահմանադրության փոփոխություններով սահմանված է, որ Սահմանադրությանը պետք է համապատասխանեցվի Տեղական ինքնակառավարման մասին օրենքը, որն ուժի մեջ պետք է մտնի 2017 թվականի հունվարի 1-ից:

Աշնանային նստաշրջանի օրակարգում է նաև Հայաստանի Հանրապետության 2015 թվականի պետական բյուջեի կատարման տարեկան հաշվետվությունը, իսկ ավելի ուշ կընդգրկվի նաև 2017թվականի պետական բյուջեի նախագիծը, որը պետք է նախապես քննարկվի ԱԺ մշտական հանձնաժողովների, իսկ այնուհետև նաև՝ ԱԺ լիագումար նիստերում և հաստատվի մինչև տարեվերջ:

Իսկ այս բոլոր քննարկումների առանցքում իհարկե կլինի նոր կառավարության ձեւավորումն ու ծրագրի հաստատումը։

Նախընտրական արշավի մեկնարկը տրված է…

Աղբյուր` Փաստինֆո