Փաստ ինֆո

Գյումրիում Ավետիսյանների ընտանիքի անդամների դաժան սպանության գործով առաջին ատյանի դատարանի դատավճիռը միանշանակ կբողոքարկվի Վերաքննիչ քրեական դատարան՝ կյանքի իրավունքի խախտման հիմքով բարոյական վնասի հատուցման պահանջով տուժող կողմի ներկայացրած քաղհայցը պատշաճ կարգով չքննելու մասով: Այս մասին «Փաստինֆո»-ի լրագրողին հայտնեց տուժողների իրավահաջորդների ներկայացուցիչ, փաստաբան Արամազդ Կիվիրյանը:

Տուժողների իրավահաջորդների ներկայացուցիչները վերաքննիչ բողոքում պահանջելու են դատական ակտը բեկանել՝ քաղաքացիական հայցը վարույթ չընդունելու և քննություն չիրականացնելու մասով:

Արամազդ Կիվիրյանը պարզաբանեց, որ դատարանը քաղհայցը չքննեց ոչ միայն այն պատճառով, որ քաղաքացիական պատասխանողը Ռուսաստանի Դաշնությունն է, այլ նաև այն պատճառով, որ քաղաքացիական հայցում որպես փաստական հիմք մեջ են բերվում Ռուսաստանի Դաշնության մեղավորության մասին փաստող, նրա կողմից թույլ տրված որոշակի խախտումներ: Մասնավորապես, Ռուսաստանի Դաշնությունը՝ տեղեկացված լինելով Պերմյակովի՝ բազմաթիվ, մոտ տասի հասնող դասալքությունների մասին, ունենալով ապացույց առ այն, որ նա ունի որոշակի հոգեկան խնդիրներ, որի պատճառով նրան արգելվել է զենք կրել, նման պայմաններում նրան ուղարկել է Հայաստանի Հանրապետություն, ձեռքը զենք տվել: Իսկ երբ որ արդեն Հայաստանի Հանրապետությունում Պերմյակովը դասալքության է դիմել, միայն մի քանի ժամ անց է այդ մասին տեղեկացրել Հայաստանի կողմին, այսինքն՝ տվյալ դեպքում Ռուսաստանի Դաշնության կողմից կատարվել են ոչ իրավաչափ գործողություններ:

Փաստաբանը նշեց, որ բուն քրեական գործի քննության շրջանակում դատարանը քննության առարկա դարձրեց բացառապես Պերմյակովի կողմից հանցագործությունը կատարելու հանգամանքը, այլ անձանց կողմից իրենց պարտականությունները չկատարելու, նրանց գործողությունների մասով քննություն չկատարեց: «Եթե դատարանը քաղաքացիական հայցը վարույթ ընդուներ, ինքը ստիպված էր այդ մասով կատարել քննություն, որովհետև քաղաքացիական հայցի փաստական հանգամանքը հենց դա է՝ հայցը ՌԴ-ի դեմ է և դրա քննությամբ պետք է բացահայտվեր ռուսական կողմի մեղավորությունը: Մեր արդարադատությունը, մեր դատական համակարգը այդ կամքը չունեցավ՝ կոնկրետ առաջին ատյանի դատարանի մակարդակով»,- ասաց Արամազդ Կիվիրյանը:

Հիշեցնենք, որ դատարանն սկզբնապես որոշել էր վարույթ ընդունել քաղաքացիական հայցը, տուժողների իրավահաջորդներին ճանաչել էր որպես քաղհայցվորներ, իսկ Ռուսաստանի Դաշնությանը՝ որպես քաղպատասխանող: Դատարանը նաև մեկ ամիս ժամկետով հետաձգել էր դատական նիստը, որպեսզի այդ ընթացքում քաղհայցը թարգմանվի և ուղարկվի ՌԴ: Սակայն մեկ ամիս անց դատարանը կայացրել էր որոշում, որով հրաժարվել էր քաղաքացիական հայցը վարույթ ընդունելուց:

Տուժող կողմի քաղհայցն ընդունելուց հրաժարվելու՝ դատարանի որոշման դեմ վերաքննիչ բողոքը թողնվել էր առանց քննության:
Տուժողների իրավահաջորդների ներկայացուցիչ, փաստաբան Արամազդ Կիվիրյանը Վերաքննիչ քրեական դատարան ներկայացրած բողոքում խնդրել է վերացնել 27.05.2016թ. ներկայացված քաղաքացիական հայցն ընդունելուց հրաժարվելու վերաբերյալ ՀՀ Շիրակի մարզի ընդհանուր իրավասության առաջին ատյանի դատարանի որոշումը և տուժողների իրավահաջորդների քաղաքացիական հայցն ընդդեմ Ռուսաստանի Դաշնության` ոչ նյութական վնասի հատուցման պահանջի մասին, համարել վարույթ ընդունված:

Վերաքննիչ դատարանը գտել էր, որ քրեադատարավարական օրենքը որևէ նշում չի պարունակում քաղաքացիական հայցն ընդունելուց հրաժարվելու մասին որոշման` վերաքննության կարգով բողոքարկման հնարավորության մասին:

Բողոքն առանց քննության թողնելու Վերաքննիչ դատարանի որոշումը Արամազդ Կիվիրյանը բողոքարկել է ՎՃռաբեկ դատարան: Կողմը վճռաբեկ բողոքում հիմնավորում է, որ տվյալ դատական ակտը ենթակա է բողոքարկման, ընդ որում հենց Սահմանադրական դատարանի կողմից արտահայտված դիրքորոշման հիման վրա:

«Սպասում ենք Վճռաբեկ դատարանի որոշմանը, մինչ օրս նորություններ չունենք»,- ասաց Արամազդ Կիվիրյանը:

Աղբյուր` Փաստինֆո