Փաստ ինֆո

Ժամանակակից ֆուտբոլի ամենաքննարկվող երկու մարզիչները 3 տարի անց կրկին կհանդիպեն: Անգլիայի առաջնության 4-րդ տուրի կենտրոնական խաղում Ժոզե Մոուրինյուի «Մանչեսթեր Յունայթեդը» կընդունի Խոսեպ Գվարդիոլայի «Մանչեսթեր Սիթիին»:

Armsport.am-ը ներկայացնում է այդ մարզիչների անհատական հակամարտության ժամանակագրությունը, որի առաջին մասը կարող եք կարդալ այստեղ:

10. 2011-12 թթ. մրցաշրջանի մեկնարկից առաջ Մոուրինյուի «Ռեալն» ու «Գվարդիոլայի» «Բարսելոնան» հանդիպեցին Իսպանիայի Սուպերգավաթի խաղարկության շրջանակում: Առաջին հանդիպումը նախանշված էր Մադրիդում: Երկարատև մրցաշրջանից հետո կատալոնական ակումբի հիմնական ֆուտբոլիստները ուշ էին արձակուրդի մեկնել և վերադարձել էին այդ խաղից մի քանի օր առաջ: Փոխարենը, «սերուցքայինները» մոտ մեկ ամսվա նախապատրաստական շրջան էին անցել: «Ռեալը» շատ ավելի թարմ տեսք ուներ և կարողացավ արագ գոլ խփել (Մեսութ Օզիլ), սակայն «կապտանռնագույնները» Վիլյայի ու Մեսսիի անհատական բարձր վարպետության շնորհիվ մինչև ընդմիջում 2 գոլ խփեցին: Երկրորդ կեսում Խաբի Ալոնսոն վերականգնեց հաշվի հավասարակշռությունը և խաղն ավարտվեց 2:2 հաշվով:

11. Սուպերգավաթային պատասխան հանդիպումը անչափ հետաքրքիր ստացվեց: Սկզբում Մեսսիի անզուգական փոխանցումից հետո Ինիեստան բացեց խաղի հաշիվը (15), սակայն 5 րոպե անց Ռոնալդուն պատասխան գոլը խփեց: Առաջին կեսի վերջին րոպեին Պիկեի կրկնկով փոխանցումից հետո Մեսսին հաշիվը դարձրեց 2:1, բայց «յուրահատուկի» թիմն իր մեջ ուժ գտավ կրկին հավասարացնել այն. 82-րդ րոպեին գնդակը «Բարսելոնայի» դարպասը գլորեց Բենզեման: Այնուամենայնիվ, «Պեպ-թիմը» կարղացավ հաղթանակ կորզել, Ադրիանոյի փոխանցումից հետո աշխարհի ներկայիս հնգակի լավագույն ֆուտբոլիստը ընթացքից կատարած փայլուն հարվածով խոցեց Կասիլյասի դարպասը: «Ռեալին» ժամանակ չմնաց ևս մեկ անգամ պատասխանելու համար: Լարված վերջաբանը վերածվեց կոպիտ խաղի, երկկողմանի վիրավորանքների, հրմշտաոցի, կարմիր քարտերի (Մարսելո, Օզիլ, Պինտո) և Մոուրինյուի կողմից Տիտո Վիլանովայի աչքը «կոխած» մատի հայտնի տեսարանի:

12. Չնայած Սուպերագավաթում կրած պարտությանը՝ մասնագետներն այն կնքեցին «Ռեալի» հոգեբանական հաղթանակ, քանզի երկար ժամանակ մադրիդցիները չէին կարողանում հավասար պայքար մղել կատալոնացիների հետ, իսկ օգոստոսյան խաղերը հավասար էին: 2011/12 մրցաշրջանի առաջին Էլ Կլասիկոյին սպասում էին որպես «Ռեալի» առաջխաղացման նոր փուլ: Մոուրինյուի ֆուտբոլիստները հանդիպումը փալուն սկսեցին, առաջին րոպեին բացեցին խաղի հաշիվը (Բենզեմա) և մոտ 15-20 րոպե մի գլուխ բարձր էին «Բարսելոնայից»: Սակայն մրցակիցը կարողացավ հավասարեցնել խաղի ընթացը, ապա նաև հաշիվը (Ալեքսիս Սանչես), իսկ երկրորդ կեսում ևս 2 գնդակ խփելով (Չավի, Ֆաբրեգաս)՝ 3:1 հաշվով հաղթանակ տոնեց:

13. Հունվարին իսպանական ֆուտբոլի գրանդների դիմակայությունն էր Իսպանիայի Գավաթի խաղարկության քառորդ եզրափակչի շրջանակում: Մադրիդում կայացած առաջին հանդիպումը շատ նման էր այս թիմերի միջև նախորդ խաղին: Կրկին «Ռեալն» արագ գոլ խփեց. հրթիռային հակագրոհի արդյունքում աչքի ընկավ Ռոնալդուն: Բայց նորից մադրիդիցները պարտություն կրեցին (1:2): Երկրորդ կեսի սկզբում անկյունայինի խաղարկումից հետո աչքի ընկավ Պույոլը (Մուորինյոն խաղից հետո Ռամոսից բացատրություն պահանջեց, թե ինչու նրա փոխարեն Պեպեն էր հսկում Կառլեսին), իսկ 76-րդ րոպեն Մեսսիի հնարամիտ փոխանցումից հետո Աբիդալը խփեց իր բարսելոնյան կարիերայի 2 գոլերից մեկը:

14. Մեկ շաբաթ անց գրեթե կրկնվեց ընդունված սցենարը, պարզապես այս անգամ հակառակ կողմից: Առաջին կեսի վերջին 3 րոպեների ընթացքում «կապտանռնագույնները» 2 գնդակ խփեցին. Պեդրոյի գոլին հաջորդեց Դանի Ալվեսի հրանոթային հարվածը, որի դեմ Կասիլյասը ոչինչ անել չէր կարող: «Ռեալը» կարողացավ «քամբեք» կատարել և դրա համար նրան նույնպես 3 րոպե պահանջվեց: Օզիլի հարմարավետ փոխանցումից հետո աչքի ընկավ Ռոնադուն (68), իսկ քիչ անց Բենզեման օգտվեց սեփական կիսադաշտում մրցակցի պաշտպանների սխալից (71): «Ռեալը» նետվեց երրորդ ու հաղթական գոլը խփելուն, սակայն «Բարսելոնան» կարողացավ պահպանել առաջին խաղից ունեցած առավելությունը: Հանդիպումից հետո «կապտանռնագույններն» ամենևին ուրախ չէին, որովհետև հասկացել էին, որ «Ռեալի» նկատմամբ հեշտ հաղթանակներն արդեն անցյալում են և «սերուցքայինները» գրեթե հասել են նրանց մակարդակին:

15. Էլ Կլասիկոյի շրջանակում Մոուրինյուի ու Գվարդիոլայի վերջին հակամարտությունը կայացավ Իսպանիայի առաջնության 35-րդ տուրում, որից առաջ «Ռեալի» 10 միավորի առավելությունը կրճատվել էր մինչև 4-ի: «Կամպ Նոուում» կայանալիք խաղը որոշիչ էր չեմպիոնական պայքարում: 16-րդ րոպեին անկյունայինի խաղարկումից հետո Սամի Խեդիրան գնդակը «հրեց» կատալոնացիները դարպասը: Գվարդիոլայի թիմը հաշիվը հավասարեցնելու համար մի շարք հիանալի պահեր ուներ, սակայն միայն 70-րդ րոպեին կարողացավ Ալեքսիս Սանչեսի կրկնակի հարվածով դա անել: Երբ կատալոնացիները նախապատրաստում էին վերջնական պաշարումը, կրկին աշխատեց Օզիլ-Ռոնալդու հիանալի խաղազույգը և պորտուգալացին «Ռեալին» հաղթանակ պարգևեց այդ խաղում և գործնականում չեմպիոնությունը: Այդ մրցաշրջանից հետո Գվարդիոլան որոշեց չերկարաձգել պայմանագրի ժամկետը «Բարսելոնայի» հետ և մեկ տարով արձակուրդի մեկնեց:

16. 2013 թվականի օգոստոսի 30-ին «Բավարիայի» ու «Չելսիի» նորանշանակ գլխավոր մարզիչներ Պեպ Գվարդիոլան ու Ժոզե Մոուրինուն անցկացրին մինչև օրս նրանց միջև վերջին հանդիպումը: Եվրոպայի Սուպերգավաթի խաղում պորտուգալացու գլխավորած թիմը Տորեսի ու Ազարի գոլերի շնորհիվ 2 անգամ առաջ էր հաշվի մեջ (մեկը հիմնական ժամանակում, մյուսը լրացուցիչում), բայց երկու անգամ էլ մյունխենցիները պատասխան գնդակը խփեցին: Առաջին դեպքում դա արեց Ֆրանկ Ռիբերին, իսկ երկրորդը գրանցվեց 120+1 րոպեին, երբ այդ խաղում «Բավարիայի» 37-րդ հարվածը կատարած Խավի Մարտինեսը մոտ տարածությունից գրավեց փայլուն հանդիպում անցկացրած Պետր Չեխի դարպասը: Հետխաղյա 11 մետրանոց հարվածաշարում Գերմանիայի ու Չեմպիոնների լիգայի գործող չեմպիոնները հաղթեցին 5:4 հաշվով: Վճռորոշ դարձավ Ռոմելու Լուկակուի հարվածից հետո Մանուել Նոյերի սեյվը:

 Այսպիսով, Գվարդիոլայի ու Մուորինյոյի թիմերը հանդիպել են 16 անգամ: 7 հաղթանակ տարել է Գվարդիոլան, 6 խաղ ավարտվել է ոչ-ոքի արդյունքով և 3 անգամ առավելության է հասել Մոուրինյուն: Կատալոնացու թիմերը խփել են 28 գոլ, իսկ «յուրահատուկի» թիմերն աչքի են ընկել 18 անգամ:

Այսօր՝ Երևանի ժամանակով 15:30-ին կկայանա այդ հռչակավոր մասնագետների 17-րդ դիմակայությունը:

Աղբյուր` Փաստինֆո