Փաստ ինֆո

ԼՂՀ ազգային ժողովի պատգամավոր Հայկ Խանումյանին առևանգելու ու ծեծի ենթարկելու մեղադրանքը խուլիգանության վերաորակելու որոշման դեմ տուժողի ներկայացուցիչ Հայկ Ալումյանն արդեն բողոք է ուղարկել ԼՂՀ ընդհանուր իրավասության դատարան: Այս մասին «Փաստինֆո»-ի լրագրողին հայտնեց Հայկ Ալումյանը:

Բողոքում փաստաբանը միջնորդում է պարտավորեցնել վարույթ իրականացնող մարմնին վերացնել Հ.Խանումյանի իրավունքների ու ազատությունների խախտումները:

Մեր խնդրանքով անդրադառնալով մեղադրանքի վերորակման վերաբերյալ ԼՂՀ դատախազության հայտարարությանը, Հայկ Ալումյանը նկատեց, որ հայտարարությունից երևում է, որ այն նախատեսված է լայն հասարակության համար, սակայն դրանում կիրառված է նեղ մասնագիտական տերմինաբանություն: Դրա արդյունքում ոչ իրավաբան քաղաքացիները հավանաբար տպավորություն են ստանում, որ ինչ-ինչ անհասկանալի արտահայտություններ կան, ըստ որոնց այդ անձինք պետք է ազատվեն քրեական պատասխանատվությունից:

Իրականում, նշեց Հայկ Ալումյանը, այդ տեքստը իրավաբանների համար զավեշտալի պատճառաբանություններ է պարունակում, ցանկացած իրավաբան դրանում լուրջ անհամապատասխանություններ կարող է նկատել, որոնք տեսանելի չեն ոչ իրավաբան քաղաքացիների համար:

«Եթե իրավաբանական խուճուճ ձևակերպումները փորձենք ավելի մատչելի ներկայացնել, ապա դատախազության դիրքորոշումը հանգում է նրան, որ թեև այդ մարդիկ Ստեփանակերտի կենտրոնում՝ Վերածննդի հրապարակում, ԱԺ-ի դիմաց օրը ցերեկով ծեծի են ենթարկել Հայկ Խանումյանին, ինչը չի ժխտվում, որովհետև տեսագրված է, հետո էլ նրան բռնի ուժով մտցնելով ավտոմեքենան, տեղափոխել են նրան այլ վայր և ծեծը շարունակել այնտեղ, սակայն Խանումյանին ոչ ծեծի ենթարկելը, ոչ էլ առևանգումը դիտավորություն չի ունեցել:

Այդքանից հետո, երբ դիտավորությամբ խճճված իրավաբանական տեքստը թարգմանում ենք բոլորի համար հասանելի լեզվի, կարո՞ղ է գտնվել մի մարդ, որը լուրջ կընդունի այսպիսի պատճառաբանությունը: Իհարկե, ոչ: Մտքի սակավությունը նեղ մասնագիտական տերմինների ներքո թաքցնելու համար դիտավորյալ խճճած տեքստ է»,- ասաց Հայկ Ալումյանը:

Փաստաբանը նշեց, որ մեղադրանքը վերաորակելու այս որոշումը ֆեյսբուքյան էջերից մեկում փաստաբանների միջև բուռն քննարկման առարկա է դարձել, բազմաթիվ կատակների են արժանացել ինչպես տեքստն, այնպես էլ դրա հեղինակները: Անգամ առաջարկվել է այդ տեքստը քննարկել ոչ թե իրավաբանական, այլ բժշկական տեսանկյունից:

«Վերջ ի վերջո, ինչ իրավաբանական արտահայտություններ մենք կիրառենք, ինչ օրենքի վրա հղումներ կատարենք, փաստը մնում է փաստ. ԼՂՀ իրավապահները ապացուցել են, որ կարելի է օրը ցերեկով, ամենամարդաշատ ժամին, Ստեփանակերտի ամենամարդաշատ հատվածներից մեկում, ԱԺ-ի դիմաց մի քանի հոգով դաժան ծեծի ենթարկել պատգամավորին, ավտոմեքենայով նրա կամքին հակառակ տեղափոխել մեկ այլ վայր, դաժան ծեծի ենթարկել այդ վայրում և այդ ամենից հետո ընդամենը երկու ամիս անազատության մեջ մնալուց հետո ազատվել որևէ պատասխանատվությունից: Քաղաքացուն քիչ կհուզի այս ամենը հաջողվել է օրենքի անկատարությա՞ն, թե՞ իրավապահների տգիտության արդյունքում: Փաստը մնում է փաստ, որ ծանրագույն արարքը կարող է մնալ անպատիժ»,- ասաց պատգամավորի ներկայացուցիչը:

Հայկ Ալումյանը նշեց, որ ինչպես պարզվել է, դեպքը սկսվել է ժամը 10.59-ին և սկսվելուն պես, անմիջապես, դեպքին ականատես քաղաքացիները սկսել են զանգահարել ԼՂՀ ոստիկանություն, սակայն վերջինս այդ հաղորդումները չի գրանցել և դեպքին չի միջամտել: Առաջին հաղորդումը, որը գրանցվել է ոստիկանությունում, Հայկ Խանումյանի կնոջ հաղորդումն է եղել, ով մոտավորապես 13.30-ին տեղեկանալով դեպքի մասին, զանգահարել է ոստիկանություն: Դեպքը քրեաիրավական գնահատականի չի արժանացել, նշեց Հայկ Ալումյանը:

Աղբյուր` Փաստինֆո