Փաստ ինֆո

Դոնի Ռոստովում ավազակության, մարդու առևանգման ու մահվան հանգեցրած ծանր մարմնական վնասվածք հասցնելու վերաբերյալ գործով այսօրվա դատական նիստում ամբաստանյալ Արմեն Ղազարյանի պաշտպաններ Հայարփի Սարգսյանն ու Արա Ղարագյոզյանը ինքնաբացարկի միջնորդություն ներկայացրեցին դատարանին:

Ըստ պաշտպանական կողմի, իրենց պաշտպանյալը երեք տարուց ավելի գտնվում է կալանքի մեջ, այսինքն՝ խախտվում է ազատության ու անձնական անձեռնմխելիության, ինչպես նաև ողջամիտ ժամկետում գործի քննության ամբաստանյալի իրավունքները:

Հայարփի Սարգսյանը նշեց, որ դատական նիստերը հետաձգվում են՝ ՌԴ-ից չեն ներկայանում տուժողներն ու վկաները: Դատարանն էլ բավարարել է մեղադրողի միջնորդությունը ևս մեկ անգամ նրանց ծանուցումներ ուղարկելու մասին: Ըստ պաշտպանի, դատարանն այլևս ի վիճակի չէ կողմերի միջև հավասարությունը պահպանել:

Մեղադրողը գտավ, որ ինքնաբացարկի համար հիմքեր չկան: Նա, մասնավորապես, նշեց, որ դատարանը ջանասիրություն է դրսևորում չներկայացող վկաների ու տուժողների մասնակցությունը դատարանում ապահովելու համար, սակայն ծանուցումները հետ են վերադառնում:

Դատարանը մերժեց ինքնաբացարկի միջնորդությունը:

Պաշտպանական կողմը միջնորդեց նաև վերացնել իրենց պաշտպանյալի կալանավորումը, նրան ազատել կալանքից: Ըստ պաշտպանների, Արմեն Ղազարյանն ինքնակամ է ներկայացել, քննությանը խոչընդոտելու ուղղությամբ ոչ մի քայլ չի արել, ուստի անհիմն է ենթադրությունը, թե ազատության մեջ հայտնվելով նա կարող է թաքնվել կամ խոչընդոտել քննությանը: Ըստ պաշտպանական կողմի, խափանման միջոց կալանքն արդեն կրում է պատժի տարրեր՝ հաշվի առնելով, որ ամբաստանյալը երեք տարուց ավելի գտնվում է կալանքի մեջ:

Մեղադրողն առարկեց միջնորդության դեմ՝ նշելով, որ այն անհիմն է, չի բխում գործի նյութերից: Ավելին, ամբաստանյալն, ըստ նրա, առերևույթ առնչություն ունի իրեն մեղսագրվող հանցագործությանը: Մասնավորապես, գործի տվյալներով համակատարող Մոգիլևսկին խոստովանական ցուցմունքներ է տվել Արմեն Ղազարյանի հետ միասին մեղսագրվող արարքները կատարելու մասին, արդեն դատապարտվել է ութ տարվա ազատազրկման: Ա.Ղազարյանի դեմ ցուցմունքներ են տվել նաև վկաներն ու տուժողները:

Ըստ մեղադրողի, հիմնավորված ու արդարացված է ամբաստանյալին կալանքի տակ պահելը:

Դատարանը մերժեց այս միջնորդությունը ևս, պաշտպանական կողմը որոշումը կբողոքարկի Վերաքննիչ դատարան:

Ըստ մեղադրական եզրակացության, Արմեն Ղազարյանը 2000թ. մայիսին, նախնական համաձայնությամբ գործելով Ի. Մոգիլևսկու և քննությամբ չպարզված անձի հետ, առևանգել է Ս. Կրուգլովային և Ե. Տոլստիխին, նրանց պատկանող դրամական միջոցների գտնվելու վայրը պարզելու նպատակով: Խաբեությամբ նրանց տարել են դոնիռոստովյան բնակարան, որտեղ պահանջել են ասել տնային տնտեսության վաճառքից ստացված գումարի գտնվելու տեղը: Խոշոր չափի գումար գույքին տիրանալու նպատակով սկսել են նրանց ծեծի ենթարկել, որից Ե. Տոլստիխը գիտակցությունը կորցրել է և գիտակցության գալով, չդիմանալով հարվածներին ասել է, թե որտեղ են գտնվում իրենց պահանջած գումարները:

Ըստ մեղադրական եզրակացության, այնուհետև Ղազարյանը գործելով ըստ նախնական համաձայնության Մոգիլևսկու և քննությամբ չպարզված հանցագործի հետ ուղևորվել է Տոլստիխի նշած հասցե, որտեղ այդ պահին գտնվել են Ս. Կրուգլովայի և Ե. Տոլստիխի ծեր բարեկամները Յու. Կրուգլովը, Ա. Կրուգլովան, Ե. Պտուխան:

Ղազարյանը գնալով այդ հասցեով և օգտվելով այն հանգամանքից, որ իրեն նախկինում ծանոթ Կրուգլովը բացել է դուռը, մտել է բնակարան, որտեղ նախնական համաձայնությունը կատարելու նպատակով, քննությամբ չպարզված հանցագործի հետ Ս.Կրուգլովայի գումարին տիրանալու նպատակով սկսել է ծեծի ենթարկել նրանց, որից հետո հափշտակել է Ս. Կրուգլովային պատկանող 6900 ԱՄՆ դոլար գումարը:
Բացահայտելով, որ Ս. Կրուգլովան ստացված հարվածներից մահացել է, Ղազարյանը, Մոգիլևսկին և քննությամբ չպարզված հանցագործը Ս. Կրուգլովայի դիակը փաթաթել են փալասի մեջ և այն թողել բնակարանում, իսկ Ե. Տոլստիխին Մոգիլևսկին ստիպողաբար դուրս է բերել բնակարանից և ավտոմեքենայով տարել ք. Դոնի Ռոստովի Մալինովսկու փող, որտեղ ավտոշուկայի շրջանում նրան բաց է թողել և թաքնվել:

Արմեն Ղազարյանը մեղադրվում է ՀՀ քրեական օրենսգրքի 175-րդ հոդվածի 3-րդ մասի 3-րդ կետով՝ առողջությանը ծանր վնաս պատճառելով ավազակություն, 131-րդ հոդվածի 2-րդ մասի 1-ին, 6-րդ և 7-րդ կետերով՝ շահադիտական դրդումներով երկու կամ ավելի անձանց առևանգելը, որը կատարվել է մի խումբ անձանց կողմից նախնական համաձայնությամբ, 112-րդ հոդվածի 2-րդ մասի 14-րդ կետով՝ դիտավորությամբ առողջությանը ծանր վնաս պատճառելը, որն անզգուշությամբ առաջացրել է տուժողի մահը:

Աղբյուր` Փաստինֆո