Փաստ ինֆո

ՀԱՕԿ-ի գլխավոր քարտուղար Հրաչյա Ռոստոմյանն այսօր կայացած ասուլիսում խոսեց Ռիո դը Ժանեյրոյում կայացած 31-րդ Օլիմպիական խաղերում հայ մարզիկների մրցելույթների մասին՝ պատասխանելով նաև լրագրողների հարցերին:

«ՀԱՕԿ-ին գոհացնում է արդյունքը. կարող էինք ավելին: Անհատը կամ կազմակերպությունը, եթե գտնում է, որ հասնում է առավելագույնին, կարող է վերջակետ դնել աշխատանքներին:

Կային բաներ, որ մեր վերահսկողությունից դուրս էին, օրինակ՝ Անդրանիկի վնասվածքը: Երևի սա ամենաթերի կազմակերպված Օլիմպիական խաղերն էին: Լրագրողների համար աշխատելու պայմաններ չկային, խնդիրներ կային կամավորների հետ կապված, շատերն անգամ անգլերեն չէին խոսում, բազմաթիվ գողություններ են եղել»:

- Գլխավոր բացթողումը ո՞րն է:

- Մեծ հույսեր էինք կապում ազատ ոճի ըմբշամարտի հավաքականի, բռնցքամարտիկների հետ, որոնք չարդարացրին հույսերը: Առաջիկայում քննարկումներ կլինեն ֆեդերացիաների հետ:

Ինչ վերաբերում է Անդրանիկ Կարապետյանին, ապա նշեմ, որ տեսել եմ, նա մարզմանը հրում վարժությանը 205 կգ է բարձրացրել: Փաշիկ Ալավերդյանը տակտիկապես հզոր մարզիչ է, աշխարհում 2 մարզիչ իր նման լինեն, թե ոչ:

- Ի՞նչ պարգևներ է նախատեսել ՀԱՕԿ-ը:

- Բոլորը կպարգևատրվեն, կան անակնկալներ, պարոն Ծառուկյանն առատաձեռն է: Ամեն ինչ հայտնի կդառնա սեպտեմբերի 18-ին:

- Օլիմպիադայից առաջ 33 մարզիկներ ունեինք, ինչը ռեկորդային էր, սակայն տեղում խմորումներ եղան:

- Ինչ վերաբերում է Գոռ Ներկարարյանին, ապա մենք ստացել էիք վարկանիշի մասին տեղեկությունը: Տեղում հասկացանք, որ վնասվածք ունի, այդ պատճառով հանեցինք ցուցակից: Վնասվածքներ են եղել, որոնք մարզիկներն ու մարզիչները թաքցրել են. մի քիչ վատ բառ եմ ասում: Մենք ՀԱՕԿ-ի գործկոմի նիստում կքննարկենք դա: Նա նորմատիվը լրացրել էին: Մոնիկա Վասիլյանը մարզումներին մասնակցել է, սակայն ոսկորի փոքր հատված դուրս է ընկել. եթե պաշտոնական մարզմանը չի մասնակցել, ուրեմն չի հայտավորվել:

- Միհրան Հարությունյանի եզրափակիչ գոտեմարտը բողոքարկելու հարցով ի՞նչ դիրքորոշում ունի ՀԱՕԿ-ը:

- Հարությունյանի եզրափակիչ գոտեմարտը լկտի, անբարո ձևով անցավ... այլ բառեր չեմ գտնում: Մենք պետք է բողոքարկենք պասիվությունը, սակայն այն ինքնին սուբյեկտիվ դիրքորոշում է. մրցավարության կանոններում հստակ կետեր չկան: Մենք միջազգային իրավաբաններ ենք վարձել, ովքեր աշխատում ենք այդ ուղղությամբ: Բոլորս ուզում ենք Միհրանի մեդալը վերադարձնել:

Սոցիալական կայքերում տեսանք, որ շատերն անդրադառնում են Մամիաշվիլիին: Այո, ճիշտ է, եթե նա չցանկանար, Միհրանը չէր մասնակցի Օլիմպիադային: Եթե քաղաքացիությունը փոխում է մարզիկը, սպորտային քաղաքացիությունը չի փոխվում: Եթե նախորդ ֆեդերացիայի ղեկավարը չստորագրի, մարզիկը չի կարողանա տեղափոխվել:

- Արթուր Ալեքսանյանի անվան մարզադպրոցը ոչ լավ վիճակում է. ի՞նչ եք անելու:

- Դա պատկանում է տեղական ինքնակառավարման մարմիններին, իրենք են տնօրեն նշանակում: Ինչ վերաբերում է ՀԱՕԿ-ին, ապա մենք Գյումրիում մարզահամալիր ենք կառուցում, որը մի շարք մարզաձևերի համար պայմաններ է առաջարկելու: Պետք է ընթանան ներքին հարդարման աշխատանքները, հուսով ենք՝ հաջորդ տարի Գյումրիի մարզակառույցը կբացվի:

- Դոպինգային սկանդալի կենտրոնում է նաև Հայաստանը. Տիգրան Մարտիրոսյան, Հռիփսիմե Խուրշուդյան...

- Ցավոք սրտի Օլիմպիադա-2008-ի վերաբերյալ խնդիրներ ունենք. ամբողջ աշխարհում կա այս խնդիրը: ՀԱՕԿ-ում հետաքննություն ենք անում. մարզիկները մեղավոր չեն, մարզիչներն են մեղավոր:

Այս Օլիմպիական խաղերում մեր մարզիկները ռուսներից հետո թերևս ամենաշատն են դոպինգ-թեստ հանձնել: ՀԱՕԿ-ն ունի դիրքորոշում. եթե մարզիկը դոպինգ օգտագործած լինի, մարզիչը հայկական սպորտում անելիք չունի:

- Մեծ աղմուկ բարձրացրեց Առաքել Միրզոյանի մասնակցության հարցը. ինչպե՞ս կմեկնաբանեք դա, անարդարություն չե՞ք տեսնում:

- Այնպիսի տպավորությունն էր, որ մենք ազգի թշնամի էինք, մեզ թևաթափ անելու, կոտրելու միտումներ ենք տեսել: Կներեք, որ ասում եմ, բայց համացանցում գրվածներն անտեսել ենք:

Եթե խոսվեր Վանիկ Ավետիսյանի մասին, ինչ-որ տեղ կհասկանայինք, սակայն Աղասյանի հետ միանշանակ համաձայն չեմ: Աղասին վերջին 4 տարում ոչ մի կիլոգրամ չի ավելացրել, ընդհակառակը՝ հետընթաց է եղել: Միրզոյանն առաջընթաց է ունեցել: Խնամի, ծանոթ, բարեկամ հասկացություն չկա:

- Մարզաձևերը հատ-առ հատ գնահատեք:

- Ծանրամարտ՝ գերազանց, Արթուր Ալեքսանյան՝ գերազանց. նա լեգենդար մարզիկ դառնալու բոլոր հնարավորություններն ունի: Միհրան Հարությունյան՝ գերազանց, Արսեն Ջուլֆալակյան՝ անբավարար. սայթաքում եղավ: Չմոռանանք, որ նա շատ մեդալներ է պարգևել մեր երկրին: Ազատոճային ըմբիշներ՝ բնականաբար լավ չէր, նույնը բռնցքամարտը: Մարմնամարզությունը մեծ պոտենցիալ ունի մեր երկրում: Մերդինյանն արտակարգ մասնակցեց որակավորմանը, սակայն եզրափակչում չստացվեց: Եթե մեքենան 5 ժամ աշխատում է, խնդիրներ է ունենում, էլ ուր մնաց՝ մարդը:

Նպատակը հետևյալն է. հաջորդ Օլիմպիական խաղերում ունենալ մարմնամարզության թիմ, այսինքն պետք է լինենք լավագույն 12 հավաքականների թվում: Ինչ վերաբերում է պայմաններին, պետությունն այդ մասին մտածում է: Մարմնամարզիկներն առաջիկայում 6 նոր գործիք կունենան:

Աղբյուր` Փաստինֆո