Փաստ ինֆո

Քաղաքագիտության դոկտոր Հայկ Ա.Մարտիրոսյանը Tert.am -ի հետ զրույցում անդրադարձավ ԵԱՀԿ Մինսկի խմբի ձևաչափում Մոսկվայում սեպտեմբերի 8-ին կայանալիք քննարկմանը, որը վերաբերում է ԼՂ կարգավորմանը, և որի ընթացքում, ինչպես նշել էր ՌԴ ԱԳՆ պաշտոնական ներկայացուցիչ Մարիա  Զախարովան, քննարկվելու են հրատապ հարցեր:

- Պարոն Մարտիրոսյան, ՌԴ արտաքին գործերի նախարարության պաշտոնական ներկայացուցիչ Մարիա Զախարովան օրերս հայտարարել էր, որ սեպտեմբերի 8-ին ԵԱՀԿ Մինսկի խմբի համանախագահները կժամանեն Մոսկվա, որտեղ ռուսաստանցի համանախագահ Իգոր Պոպովի մասնակցությամբ քննարկվելու են Լեռնային Ղարաբաղի խնդրի կարգավորմանը վերաբերող հրատապ հարցեր: Մասնավորապես`Վիեննայի և Սանկտ Պետերբուրգի պայմանավորվածությունների հետ կապված: Սա, ըստ Ձեզ, ի՞նչ հրատապություն է, և արդյո՞ք ՌԴ նախաձեռնողականության շրջանակներում է:

- Չգիտեմ` ինչ հրատապություն է, բայց գիտեմ, որ այսպիսի հրատապ հանդիպումները սկսվեցին անմիջապես ապրիլյան մարտերից հետո, որոնք սանձազերծել էր Ադրբեջանը: Ստացվում է, որ, քանի որ դրանից հետո հայկական կողմը սկսեց ընդունել ադրբեջանականից իրեն պարտադրվող հրատապությունները, ուրեմն Ադրբեջանը մասամբ լուծում է ապրիլին իր առջև դրած խնդիրը: Բացի հայկական կողմի` կամովին դեպի հրատապ պարտություն շտապելուց` ես այստեղ այլ հրատապություն չեմ տեսնում: Մենք անգամ չգիտենք թե բացի մի քանի դատարկ դետալներից` իրականում ինչ մեծ խնդիրներ են քննարկել կողմերը փակ դռների հետևում: Կարծում եմ՝ քանի որ ամեն բան այսօր այդքան հրատապ է ստացվում` հայ հասարակությունն էլ պետք է հրատապ պահանջի գաղտնազերծել այդ խորհրդավոր «հրատապությունները»:

- Այս «հրատապության» համատեքստում և, հաշվի առնելով, որ հանդիպումը կրկին Մոսկվայում է, կարո՞ղ ենք գնահատել, որ Արևմուտքը որոշել է ՌԴ -ին հանձնել կարգավորման մենաշնորհը:

-Ոչ, ես այդպես չեմ կարծում: Ոչ ոք ոչ ոքի ոչինչ չի հանձնել դեռևս: Պարզապես Մոսկվան աննախադեպ ակտիվություն է դրսևորում միջնորդական իր կարգավիճակում: Եվ այս ամենը սկսվել է հենց ապրիլից հետո: ՌԴ արտգործնախարարության ներկայացուցիչ Մարիա Զախարովան Մոսկվայում տեղի ունեցած ասուլիսի ընթացքում՝ պատասխանելով հարցին, թե արդյոք ԱՄՆ-ը առաջարկե՞լ է Ռուսաստանին ստանձնել առաջնորդությունն Արցախի հարցում, տվել է բացասական պատասխան: Զախարովան ասել է, թե ԱՄՆ-ը չի զիջի առաջնորդությունն Արցախի հարցում: Միաժամանակ, ՌԴ ԱԳՆ պաշտոնական ներկայացուցիչը արել է բավական ուշագրավ հայտարարություն, որն ինչ-որ իմաստով հնարավոր է դիտարկել նաև իբրև բացահայտում: Զախարովան, որին, կարծես թե, բավական բնորոշ է դառնում անբռնազբոսությունն ու անկեղծությունն ասուլիսների ընթացքում, հայտարարել է, որ եթե ԱՄՆ-ը զիջեր առաջնորդությունն Արցախի հարցում, ապա դա կլիներ առաջընթաց:

- Սա կմեկնաբանե՞ք:

- Ճիշտն ասած` անհասկանալի է,  թե ինչու դա կլիներ առաջընթաց, հատկապես այն պարագայում, երբ ո՛չ ԱՄՆ-ը,  ո՛չ Ֆրանսիան բանակցային գործընթացում չունեն առաջնորդություն: Որտե՞ղ և ինչպե՞ս է այդ առաջնորդությունը դրսևորվում: Կազանն ու Պետերբուրգը, կարծեմ, Ռուսաստանում են, ԱՄՆ նախագահը վերջերս Բաքվում Ալիևի պալատում նրա հետ թեյ չի խմել, իսկ Հայաստանի ղեկավարը Վաշինգտոն չէ, որ վերջերս այցելել է`քննարկելու հենց Արցախի հարցը: Ինչպե՞ս կարելի է զիջել մի բան, որ չունես: Ես ընդհանրապես չեմ հասկանում , թե ինչ է առաջնորդությունը մի ձևաչափում, որտեղ երեք համանախագահներ աշխատում են և պետք է աշխատեն պարիտետային և անկողմնակալ սկզբունքով: Եթե Մինսկի խմբի համանախագահության սկզբունքները փոխվել են և հիմա առաջնորդության համար պայքար է ընթանում, ապա, կարծում եմ, պետք է գոնե Հայաստանի իշխանությունը հայտարարի այդ մասին իր ժողովրդին: Եթե այս պետության և ժողովրդի ճակատագիրն այժմ ցանկություն կա այս կամ այն կողմում որոշելու մոնոպոլ սկզբունքով, ապա դա նորություն է, որ չպետք է գաղտնիք պահել:

Հաարցազրույցը՝ Անուշ Դաշտենցի

Լուսանկարը՝ PAN Photo-ի

Աղբյուր` Փաստինֆո