Փաստ ինֆո

Հատուկ քննչական ծառայությունը գտնում է, որ ինքը չէ այն մարմինը, որը պետք է գրավոր ներողություն հայցի արդարացվածից: Այս մասին «Փաստինֆո»-ի լրագրողին հայտնեց ծանր հանցագործության կատարման մեջ մեղադրվելուց ու ավելի քան երկու տարի կալանքի տակ պահվելուց հետո արդարացված Սահակ Հարությունյանի պաշտպան, փաստաբան Կարեն Մեժլումյանը:

Պաշտպանը նշեց, որ իրենք այսպիսի բովանդակության գրություն են ստացել Հատուկ քննչական ծառայության պետին առընթեր ՀԿԳ ավագ քննիչ Ա.Մինասյանից: Գրության մեջ նշելով հանդերձ, որ կասկածի տակ չեն դնում, որ արդարացման դատական ակտ է կայացվել, միաժամակ հրաժարվում են ներողություն հայցել՝ իրենք չեն բողոքարկողը, իրենք չեն նաև ներողություն հայցողը:

Կարեն Մեժլումյանն այնպիսի տպավորություն ունի, որ կարծես այդ պատասխանն ոչ թե իրավական պետության կառույցից է, իրավապահ մարմնից, այլ ինչ-որ «տղայական» պատասխան է՝ «ո՞նց ես ներողություն խնդրեմ»:

«Ցավ եմ ապրում, որ նման պատասխան ենք ստացել: Մտածում ենք դատախազին բողոքարկել կամ միգուցե նաև դատարան դիմել»,- ասաց Կարեն Մեժլումյանը:

Արդարացված Սահակ Հարությունյանը դիմել էր քրեական հետապնդում իրականացնող մարմնին՝ Հատուկ քննչական ծառայությանը, իրենից գրավոր ներողություն հայցելու հարցով:

ՀՀ քրեական դատավարության օրենսգրքի 66-րդ հոդվածի 10-րդ մասի համաձայն, քրեական հետապնդման մարմինը պարտավոր է գրավոր ներողություն հայցել արդարացվածից: Իսկ Քրեական դատավարության օրենսգրքի 6-րդ հոդվածի 22-րդ կետի համաձայն, քրեական հետապնդման մարմիններն են՝ դատախազը, քննիչը, հետաքննության մարմինը:

Հանցակազմի բացակայության հիմքով արդարացվածը դիմել է դատարան՝ պահանջելով փոխհատուցում

Այսինքն՝ Հատուկ քննչական ծառայությունն՝ ի դեմս քննություն իրականացրած քննիչի, քրեական հետապնդման մարմին է հանդես եկել և դրանից ելնելով էլ Սահակ Հարությունյանը գրավոր դիմել է, որպեսզի օրենքի պահանջը, իրենց օրենսդրական պարտականությունը կատարեն և գրավոր ներողություն հայցեն:

«Այսպես, փաստորեն կարող են մարդուն անհիմն մեղադրել ծանր հանցագործության մեջ, կալանավորել ու ավելի քան երկու տարի կալանքի տակ պահել, իսկ արդարացվելուց հետո հրաժարվել անգամ ներողություն հայցել»,- ասաց Կարեն Մեժլումյանը:

Անցյալ տարեվերջին, այն է՝ նոյեմբերի 27-ին, ՀՀ վերաքննիչ քրեական դատարանը՝ դատավորներ Մ.Պապոյան (նախագահող դատավոր), Վ.Ռշտունի և Կ.Ղազարյան կազմով արդարացրել էր ու անմեղ ճանաչել ՀՀ արդարադատության նախարարարության քրեակատարողական վարչության այլընտրանքային պատիժների կատարման բաժնի Արմավիրի բաժանմունքի նախկին պետ Սահակ Հարությունյանին՝ մի խումբ անձանց կողմից շորթմամբ խոշոր չափերով կաշառք ստանալու մեղադրանքում՝ արարքում հանցակազմի բացակայության հիմքով:

Արմավիրի մարզի առաջին ատյանի դատարանի կողմից հիշյալ հոդվածով մեղավոր ճանաչված ու չորս տարվա ազատազրկման դատապարտված Սահակ Հարությունյանի նկատմամբ ընտրված խափանման միջոցը` կալանավորումը, վերացվել էր և նրան Վերաքննիչ դատարանի դահլիճում, անհապաղ, ազատ էին արձակել երկու տարուց ավելի տևած կալանքից:

Վերաքննիչ դատարանն այս արդարացման ակտը կայացրել էր՝ ՀՀ վճռաբեկ դատարանում գործերի քննության համար սահմանված կանոններով քննության առնելով ՀՀ Արմավիրի մարզի ընդհանուր իրավասության առաջին ատյանի դատարանի 2015 թվականի մարտի 24-ի դատավճռի դեմ ամբաստանյալ Սահակ Հարությունյանի պաշտպան, փաստաբան Ինեսսա Պետրոսյանի վերաքննիչ բողոքը:

Բողոքարկման համար օրենքով նախատեսված ժամկետի շուրջ մեկամսյա ուշացումով, այսինքն՝ բողոքարկման ժամկետը բաց թողնելով՝ արդարացման դատական ակտը ՀՀ գլխավոր դատախազի տեղակալը բողոքարկել էր Վճռաբեկ դատարան, որն առանց քննության էր թողել այն, ինչը նշանակում է, որ արդարացման դատական ակտը օրինական ուժի մեջ էր մտել հրապարակվելուց մեկ ամիս անց՝ 28.12.2016թ.-ին:

Արդարացման դատական ակտի օրինական ուժի մեջ մտնելուց հետո 7 ամիս 7 օր անց ՀՀ գլխավոր դատախազի տեղակալ Արթուր Դավթյանի ստորագրությամբ (այդ պահի դրությամբ ՀՀ գլխավոր դատախազը Գևորգ Կոստանյանն էր) օգոստոսի երկուսի թվագրությամբ նոր բողոք էր ներկացվել Վճռաբեկ դատարան՝ բողոքը նախորդի կրկնությունն է:

Պաշտպանը նշեց, որ բողոքը պետք է առանց քննության թողնվի, որևէ հիմք չկա և վճռաբեկ բողոք ներկայացնելու ժամկետներն էլ բաց են թողնվել: Առավել ևս, որ վեցամսյա ժամկետում հիմնարար խախտումների հիմքով բողոք բերելու հիմքեր չկան, հավելեց Կարեն Մեժլումյանը:

Աղբյուր` Փաստինֆո