Փաստ ինֆո

ՀՀ արտաքին գործերի նախարարությունը զբաղվում է քաղաքագետ Ստեփան Գրիգորյանի՝ Ռուսաստան մուտք գործելու արգելքի հարցով. այս մասին, 1In.am-ի հաղորդմամբ, հավաստիացրեց ՀՀ արտաքին գործերի փոխնախարար Շավարշ Քոչարյանը:

«Նախարարությունն այս պահին այդ խնդրով է զբաղված: Տեղեկություններ ունենալու դեպքում մենք անպայման հայտարարությամբ հանդես կգանք», – կառավարության նիստից հետո լրագրողների հետ զրույցում ասաց Շ. Քոչարյանը:

Արտաքին գործերի փոխնախարարը շնորհավորեց Արցախի ժողովրդին՝ Արցախի անկախության առթիվ և նշեց, որ 25 տարվա ընթացքում Արցախի ժողովուրդն ապացուցեց, որ ինքը տեր է իր կայացրած որոշմանը, և որպես պետությունը Արցախը կայացել է:

Շավարշ Քոչարյանի խոսքով՝ 20 տարուց ավելի տևած բանակցային գործընթացում Ադրբեջանի դեստրկուտիվ քաղաքականությունն արդեն առաջին պլան է մղում այն, որ ԼՂՀ ճանաչումը կարող է արդյունավետ դարձնել ամբողջ բանակցային գործընթացը. «Լեռնային Ղարաբաղն այդ ուղղությամբ աշխատում է, և շատ կարևոր է ուժերը կենտրոնացնել այդ ուղղությամբ»:

Հարցին՝ դիվանագիտական ձախողո՞ւմ է արդյոք, որ 25 տարիների ընթացքում որևէ պետություն չի ճանաչել ԼՂ անկախությունը, Շավարշ Քոչարյանը պատասխանեց, որ այդպիսի խնդիր չի դրվել. «Խնդիրը դրված էր բանակցային գործընթացի վրա, խնդիրը դրված էր, որ պետք միջազգային ճանաչում լինի և այդ միջազգային ճանաչումը պայմանավորվում էր բանակցային գործընթացով»:

Մանրամասները՝ սկզբնաղբյուր-կայքում և տեսանյությում

Աղբյուր` Փաստինֆո