Փաստ ինֆո

Հայաստանի երիտասարդական հավաքականն ընկերական հանդիպում անցկացրեց Երևանում ուսումնամարզական հավաք անցկացնող «Զախո» թիմի հետ: Մեր մինչև 21 տարեկանների ընտրանին նվազագույն հաշվով հաղթանակ տարավ: Այս մասին տեղեկանում ենք Armsport.am-ից:

Հանդիպումը բավականին ակտիվ սկսած հայ ֆուտբոլիստները 6-րդ րոպեին բացեցին հաշիվը. Արտյոմ Սիմոնյանի հարվածից հետո մրցակցի դարպասապահը հետ մղեց գնդակը, իսկ հարմար դիրքում գտնվող Վիուլեն Այվազյանը այն ուղարկեց անպաշտպան դարպասը:

Մինչև առաջին խաղակեսի միջնամասը Կարեն Բարսեղյանի գլխավորած թիմի խաղացողներն առավելությամբ էին գործում և ավելի շատ էին գրոհում: «Զախոյի» ֆուտբոլիստներն աստիճանաբար հավասարեցրին խաղը և գոլային մի շարք պահեր ստեղծեցին: Դրվագներից երկուսում իր թիմին փրկեց Արման Մելիքսեթյանը:

Առհասարակ, հանդիպման ընթացքում գոլային պահերը բավականին շատ էին:

Երկրորդ խաղակեսին Բարսեղյանը մի շարք փոխարինումներ էր կատարել. կազմը գրեթե ամբողջապես այլ էր:

Երկրորդ կեսի մեկնարկում՝ 49-րդ րոպեին մրցակցի տուգանային հրապարակում «Զախոյի» ֆուտբոլիստը ձեռքով խաղաց, իսկ մրցավար Արթուր Հովհաննիսյանը նշանակեց 11 մետրանոց հարված: Պետրոս Ավետիսյանի հարվածից հետո դարպասապահը դարպասաձողի օգնությամբ հեռացրեց գնդակը:

Աստիճանաբար հայ ֆուտբոլիստներն անցան պաշտպանության և վտանգավոր հակագրոհներ կազմակերպեցին: Արման Մելիքսեթյանին փոխարինած Հենրի Ավագյանը խաղին միջամտելու քիչ հնարավորություններ ունեցավ:

Երկրորդ խաղակեսի միեջնամասում հատկանշական պահ էր, երբ Կարեն Բարսեղյանը ետ փոխարինում էր կատարում՝ կրկին խաղադաշտ դուրս բերելով Ռազմիկ Հակոբյանին: «Զախոյի» գլխավոր մարզիչը հետաքրքրվեց, թե ինչ է կատարվում, իսկ Բարսեղյանը շտապեց հիշեցնել, որ ընկերական խաղ է և հստակ պայմանավորվածություն չկա: Մրցակիցը ևս մի շարք փոխարինումներ կատարեց:

Հանդիպումից հետո հյուրերին հանձնվեց խորհրդանշական գավաթ. պարգևատրումն իրականացրեց ՀՖՖ-ի գործկոմի անդամ Սամվել Ալեքսանյանը:

Սեպտեմբերի 4-ին Հայաստանի երիտասարդական հավաքականն անցկացնելու է Բուլղարիայի հետ ընտրական փուլի տնային հանդիպումը:

Աղբյուր` Փաստինֆո