Փաստ ինֆո

Սոցիալական ցանցերը որոշ առումներով հասարակության համար չարիք են դարձել, հասարակության մի ստվար զանգվածի մոտ դրանք կախվածություն են առաջացել. մարդկային նորմալ շփումների փոխարեն նախընտրում են վիրտուալ շփումները, երեխաները նույնպես բակում իրենց հասակակիցների հետ խաղերը փոխարինում են համակարգչի առաջ ժամերով նստելով՝ պատճառ դառնալով ինչպես ֆիզիկական առողջության, այնպես էլ՝ հոգեբանական լուրջ խնդիրների: 

Ավելին՝ ծնողի վերահսկողությունից մի փոքր դուրս գտնվելու դեպքում անչափահասները սոցիալական ցանցերում կարող են անծանոթների ծուղակում հայտնվել, ինչի հետևանքով կարող են խեղվել դեռևս կյանքի թոհուբոհի միջով չանցած մաքրամաքուր բազում ճակատագրեր:

Մասնավորապես՝ դարի հանցագործություն կարող ենք որակել այն, որ սոցիալական ցանցերի միջոցով ծանոթություններ են հաստատում տարիքային տարբեր խմբերի ներկայացուցիչներ՝ անգամ չթաքցնելով, որ նպատակը մեկն է՝ սեռական հարաբերություն ունենալը:

Եթե տարիներ առաջ աշխարհի հնագույն մասնագիտության տեր կանայք իրենց ծառայություններ էին առաջարկում փողոցներում, այսօր փողոց դուրս գալու անհրաժեշտությունն իսպառ բացակայում է. այդ ծառայություններից օգտվողները գիտեն որտեղ նրանց գտնել։ Ավելին՝ «սպառողն» իր սեռական կրքերին հագուրդ տալու համար թիրախավորում է ոչ միայն մարմնավաճառների, այլև՝ ում պատահի:

«Փաստինֆո»-ն բազմիցս անդրադարձել է հանցագործության այս տեսակին, այսօր ևս կոնկրետ դեպքով ցանկանում ենք ևս մեկ անգամ հասարակության ուշադրությունը հրավիրել ու զերծ պահել այդ «թակարդն ընկնելու» վտանգից:

Հերթական դեպքով, որով նախաքննությունն ավարտվել է և գործն այժմ գտնվում է դատարանում, պարզվում է, որ արական սեռի ներկայացուցիչը «odnoklassniki.ru» սոցցանցի միջոցով ծանոթություններ է հաստատել մեկ տասնյակից ավել անձանց հետ և սեռական հարաբերություն ունենալու առաջարկությամբ հանդես եկել:

Ըստ մեղադրանքի՝ Ա.Գրիգորյանը 2016 թվականի մարտի 27-ից մինչև 2016 թվականի մարտի 28-ն ընկած ժամանակահատվածում սեռական հարաբերություն ունենալու առաջարկությամբ «odnoklassniki.ru» ինտերնետային կայքում առկա իր անձնական էջի միջոցով կապ է հաստատել նույն ինտերնետային կայքում գրանցված Արարատի մարզի բնակչուհու հետ և հաղորդագրությունների միջոցով պոռնկագրական նյութեր պարունակող նկարներ ուղարկել:

Բացի այդ, նույն ժամանակահատվածում նա դարձյալ սեռական հարաբերություն ունենալու առաջարկությամբ պոռնկագրական նյութեր է ուղարկել ինչպես անչափահաս աղջիկների այնպես էլ տարիքով ավելի մեծ կանանց և տղաների անվամբ գրանցված սոցիալական կայք էջերի օգտատերերի:

Ա.Գրիգորյանին մեղադրանք է առաջադրվել ՀՀ քրեական օրենսգրքի 263-րդ հոդվածի 1-ին մասով՝ (պոռնկագրական նյութեր՝ տպագիր հրատարակություններ, կինոյի և տեսաֆիլմերի նյութեր, պատկերներ տարածելը):

Ա.Գրիգորյանի նկատմամբ որպես խափանման միջոց է ընտրվել չհեռանալու մասին ստորագրությունը:

Հոդվածի դիսպոզիցիայով որպես պատիժ է նախատեսվում տուգանք՝ 200 000-400 000 ՀՀ դրամի չափով կամ կալանք՝ առավելագույնը երկու ամիս ժամկետով, կամ ազատազրկում՝ առավելագույնը երկու տարի ժամկետով:

Հոդվածը դասվում է հասարակական կարգի և բարոյականության դեմ ուղղված հանցագործությունների շարքին: Հարց է առաջանում՝ որպես իրավական պետություն՝ ի՞նչ քայլեր են արվում՝ բարոյական հասարակություն ունենալու համար:

Աղբյուր` Փաստինֆո