Փաստ ինֆո

Հայաստանի իշխանությունները քննարկում են որպես ընտրությունների ժամանակ մատնահետքերով էլեկտրոնային գրանցման գործընթաց կազմակերպելու այլընտրանք ստորագրված ցուցակները ուհրապարակել տարբերակը: Ազգային ժողովում լրագրողների հետ զրույցում այս մասին ասաց ՀՀ ԱԺ պետաիրավական հարցերի մշտական հանձնաժողովի նախագահ Հովհաննես Սահակյանը: 

«Դուք տեսաք, որ 4+4+4 ձևաչափով քննարկումների արդյունքում հնարավոր եղավ համաձայնության հասնել, մենք վստահության մթնոլորտ ձևավորելու համար ընդառաջ գնացինք ընդդիմադիր քաղաքական ուժերի առաջարկներին և ընտրական օրենսգրքում կատարեցինք երկու լրացուցիչ փոփոխություն, որոնցից մեկը պայմանով էր, մեկն առանց պայմանների: Մենք հստակ նշել էինք, որ միջազգային կառույցները պետք է մինչև սեպտեմբերի 1-ը տան իրենց դրական եզրակացությունը մատնահետքերով գրանցման էլեկտրոնային գործընթացի կազմակերպումը ֆինանսավորելու, ինչպես նաև ժամկետների մեջ տեղավորվելու հարցում: Սակայն կառավարության աշխատակազմի ղեկավար-նախարար Դավիթ Հարությունյանը Կենտրոնական ընտրական հանձնաժողով ուղարկած իր նամակում հայտնել էր, որ այդ գործընթացը տեխնիկապես հնարավոր չէ կազմակերպել, եթե նույնիսկ լինեն ֆինանսական միջոցները, քանի որ ժամանակը կարճ է»,-«Արմենպրես»-ի հաղորդմամբ՝ ասաց Սահակյանը:

Պատգամավորը կարծում է, որ, այնուամենայնիվ, ընտրական օրենսգրքի շուրջ քննարկուﬓերը պետք է շարունակվեն՝ ընդհանուր եզրեր գտնելու և դրանց շուրջ համաձայնության հասնելու համար:

«Դա կլինի ստորագրված ցուցակների հրապարակումը, թե այլ մեթոդներ, առաջիկայում կերևա: Քննարկուﬓերն այս պահին շարունակվում են: Մենք պետք է ընդհանուր եզրահանգման գանք, որպեսզի կարողանանք պահպանել վստահության մթնոլորտը, որը ձևավորվել էր նախորդ համաձայնության արդյունքում: Ես շարունակում եմ մնալ այն կարծիքին, որ առանց այլ փոփոխությունների էլ ընտրական օրենսգիրքը կարող է ապահովել արդար և թափանցիկ ընտրություններ, սակայն այս դեպքում պակասում է հենց վստահության մթնոլորտը: Մեր ընդդիմադիր գործընկերները չեն տեսնում այդ վստահության մեխանիզմները, ուստի մենք պետք է կարողանանք ընդհանուր եզրեր գտնել և ապահովել այդ մթնոլորտը, որպեսզի պարտվողը իր պարտության պատճառները տեսնի միայն իր մեջ, այլ ոչ թե դիմացինին մեղադրի դրա համար»,- ասաց Սահակյանը:

2016թ. հունիսի 30-ին Ազգային ժողովը երկրորդ ընթերցմամբ և ամբողջությամբ ընդունել էր քաղաքական համաձայնության արդյունքում ընտրական օրենսգրքում փոփոխություններ և լրացումներ կատարելու մասին օրենքի նախագիծը: Ընտրական օրենսգրքում առաջարկվող փոփոխություններով, մասնավորապես, նախատեսվում էր ներդնել ընտրողների մատնահետքերով գրանցման համակարգ, ինչի համար մինչ քվեարկությունը բոլոր ընտրողները պետք է նախագրանցվեն և ստանան նույնականացման քարտեր: Կենտրոնական ընտրական հանձնաժողոﬖ օգոստոսի 29-ի արտահերթ նիստում չեղյալ է համարել Ընտրական օրենսգրքում արված փոփոխությունները, որոնք սարքավորուﬓեր ձեռք բերելու համար անհրաժեշտ ֆինանսներ գտնելու և ժամկետների մեջ տեղավորվելու պայմանով, ընդունել էր Ազգային ժողովը:

Աղբյուր` Փաստինֆո