Փաստ ինֆո

Մաքսանենգության հոդվածն ուժը կորցնելու առնչությամբ Դուբայում Հնդկաստանի քաղաքացու սպանության գործով ամբաստանյալների մեղադրանքը փոփոխելու ու նոր մեղադրանք առաջադրելու խնդիր է առաջանում: Այս մասին այսօրվա դատական նիստում հայտարարեց մեղադրող Արիս Բարսեղյանը և դատարանից ժամանակ խնդրեց համապատասխան որոշում կայացնելու համար՝ դատարանը բավարարեց միջնորդությունը:

Դատարանն այսօրվա դատական նիստում հրապարակեց պետական եկամուտների կոմիտեից ստացված գրությունը՝ ի պատասխան դատարանի հարցման:

Ըստ ՊԵԿ գրության՝ 2014թ. հունվարի 23-ի դրությամբ (երբ «Զվարթնոց» օդանավակայանում գործով ամբաստանյալ Հովհաննես Մելքոնյանի ուղեբեռի զննությամբ հայտնաբերվել էին Դուբայից մաքսանենգությամբ` մաքսային հսկողությունից թաքցնելով, Երևան տեղափոխված ադամանդները) ֆիզիկական անձանց կողմից ՀՀ ներմուծման դեպքում մաքսային մարմինների կողմից կգանձվեր ԱԱՀ 20%:

ՊԵԿ-ը տեղակացնում է նաև, որ հիմք ընդունելով ներկայացված ապրանքների միջին շուկայական արժեքը և կատարելով հարկերի ու տուրքերի համապատասխան նվազեցումներ խնդրո առարկա ապրանքների ընդհանուր մաքսյին արժեքը 2014թ. հունվարի 23-ի դրությամբ կկազմեր 480.580.755 ՀՀ դրամ, իսկ վճարման ենթակա մաքսային վճարների ընդհանուր գումարը կկազմեր 96.116.151 ՀՀ դրամ:

Դատարանն անցյալ դատական նիստում սեփական նախաձեռնությամբ որոշել էր հարցում ուղարկել Պետական եկամուտների կոմիտեին մաքսանենգության քրեական հոդվածն ուժը կորցնելու, այսինքն՝ հոդվածի ապաքրեականացվելու հետ կապված որոշ պարզաբանումներ ստանալու նպատակով: Հարցումն ուղարկվել էր՝ հաշվի առնելով այն հանգամանքը, որ հիշյալ աղմկահարույց քրեական գործով բոլոր երեք ամբաստանյալները՝ Հովհաննես Մելքոնյանը, Սեմյոն Եդիգարյանը և Խոսրով Մելքոնյանը, բացի սպանության ու ավազակության հոդվածներից մեղադրվում են նաև ապաքրեականացված մաքսանենգության հոդվածով:

Հիշեցնենք, որ, ըստ մեղադրական եզրակացության, Հայաստանի Հանրապետության քաղաքացի Հովհաննես Մելքոնյանը հանցանքներ կատարելու համար ստեղծել է կազմակերպված կայուն խումբ՝ դրանում ընդգրկելով Հայաստանի Հանրապետության քաղաքացիներ, իր հորեղբոր որդի Խոսրով Մելքոնյանին և նրա ընկերոջը` Սեմյոն Եդիգարյանին, նրանք խմբով կատարել են առանձնապես խոշոր չափերով գույք հափշտակելու նպատակով ավազակություն, շահադիտական դրդումներով ու ավազակությամբ զուգորդված սպանություն և մաքսանենգություն:

Հովհաննես Մելքոնյանը և Սեմյոն Եդիգարյանը, ըստ մեղադրանքի, նախապես մշակված պլանի համաձայն, ադամանդները հափշտակելու նպատակով հարձակում են գործել Վաիիհավ Դհոնդիբա Սալոնկիի վրա, նրա կյանքի ու առողջության համար վտանգավոր բռնություն գործադրելով` բռունցքներով հարվածներ են հասցրել վերջինիս մարմնի տարբեր մասերին, քարշ տվել լոգարան, կպչուն ժապավենով Հովհաննես Մելքոնյանը կապել է Վաիիհավ Դհոնդիբա Սալոնկիի ձեռքերը, իսկ Սեմյոն Եդիգարյանը` ոտքերը, ապա ապօրինաբար Վաիիհավ Դհոնդիբա Սալոնկին կյանքից զրկելու դիտավորությամբ նրա գլխին անցկացրել են երկու պոլիէթիլենե փաթեթներ, դրանց եզրերը կպչուն ժապավենով ամուր սեղմելով, օդի հոսքը փակելով՝ մեխանիկական շնչահեղձության եղանակով ապօրինաբար, դիտավորությամբ կյանքից զրկել` սպանել են Վաիիհավ Դհոնդիբա Սալոնկիին և հափշտակել են «Color Source for Gold and Diamonds Company» ընկերության տնօրեն Ռահուլ Ռաջենդրա Կառնավարտին պատկանող առանձնապես խոշոր չափերի` 691.883.000 ՀՀ դրամին համարժեք 1.700.000 ԱՄՆ դոլար արժողությամբ, 6.800 կարատ տարբեր գույների ադամանդներ: 5.290.715 կարատ ադամանդները «Զվարթնոց» օդանավակայանում, մաքսանենգությամբ` մաքսային հսկողությունից թաքցնելով, տեղափոխել են Երևան քաղաք, որտեղ էլ դրանք ՀՀ ոստիկանների կողմից հայտնաբերվել են Հովհաննես Մելքոնյանի ուղեբեռի զննությամբ, իսկ մնացած 1509.285 կարատ ադամանդները չեն հայտնաբերվել:

Աղբյուր` Փաստինֆո