Փաստ ինֆո

Փաստաբան Գևորգ Գյոզալյանը ՀՀ արդարադատության նախարարություն է ներկայացրել օրենքի նախագիծ, որով նա առաջարկում է փոփոխել «Փաստաբանության մասին» ՀՀ օրենքի 39.7.-րդ հոդվածի 8-րդ մասը: Փոփոխության արդյունքում, ըստ առաջարկության հեղինակի, Փաստաբանների պալատի խորհրդի որոշումները կարող են բողոքարկվել ՀՀ վարչական դատարան։

Ինչպես տեղեկանում ենք փաստաբան Գևորգ Գյոզալյանի կայքէջից, փաստաբանը, մասնավորապես, առաջարկում է հիշյալ՝ 39.7.-րդ հոդվածի 8-րդ մասը շարադրել հետևյալ կերպ. «Պալատի խորհրդի որոշումը կողմերը կարող են բողոքարկել ՀՀ վարչական դատարան`պալատի խորհրդի որոշումն ստանալու օրվանից` մեկամսյա ժամկետում: Պալատի խորհրդի որոշումն օրինական ուժի մեջ է մտնում սույն հոդվածով նախատեսված բողոքարկման ժամկետն անցնելուց հետո»։

26․08․2016թ-ին ՀՀ արդարադատության նախարարությունն ի պատասխան այս առաջարկի նշել է, որ ներկայումս ՀՀ Ազգային ժողովում է գտնվում ՀՀ ԱՆ հեղինակած «Վարչարարության հիմունքների և վարչական վարույթի մասին» ՀՀ օրենքում փոփոխություններ կատարելու մասին օրենքի նախագիծը, որով ի տարբերություն գործող իրավակարգավորման, առաջարկվում է սահմանել, որ նշված օրենքի իմաստով վարչական մարմին է համարվում նաև այն մարմինը կամ անձը, որին օրենքով ուղղակիորեն վերապահվել է վարչարարություն իրականացնելու լիազորություն։

Աղբյուր` Փաստինֆո