Փաստ ինֆո

Մարաշում հայտնաբերված զենք-ռազմամթերքի վերաբերյալ դատարան ուղարկված առաջին գործով այսօր սկսվեց դատական վիճաբանությունների փուլը: Բոլոր չորս ամբաստանյալները ընդունել են մեղադրանքը և միջնորդել գործը քննել արագացված կարգով, դատարանը բավարարել է միջնորդությունները:

Մեղադրողը միջնորդեց ամբաստանյալներ Հակոբ Հակոբյանին ու Անուշավան Ավետիսյանին մեղավոր ճանաչել ՀՀ քրեական օրենսգրքի 235-րդ հոդվածի 2-րդ մասով՝ մի խումբ անձանց կողմից նախնական համաձայնությամբ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը, և դատապարտել համապատասխանաբար՝ 4 տարվա և 3 տարվա 6 ամսվա ազատազրկման:

Մեղադրողը միջնորդեց ամբաստանյալներ Հարություն Հովհաննիսյանին ու Ստեփան Չիլինգարյանին մեղավոր ճանաչել ՀՀ քրեական օրենսգրքի 235-րդ հոդվածի 1-ին մասով՝ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը, և դատապարտել համապատասխանաբար՝ 1 տարի 10 ամսվա և 2 տարվա ազատազրկման:

Ըստ մեղադրանքի, Հակոբ Հակոբյանը Արթուր Վարդանյանից 2015թ. հուլիսին առաջարկություն ստանալով համապատասխան վարձատրության դիմաց զենք, ռազմամթերք ու պայթուցիկ նյութեր հայթայթել և իրեն իրացնել, դիմել է ծանոթին` Գյումրի քաղաքի բնակիչ Անուշավան Ավետիսյանին, որից հետո երկուսով, նախնական համաձայնությամբ, ձեռնամուխ են եղել այդ գործընթացին:

Մեղադրական եզրակացության մեջ նշվում է, որ Հ. Հակոբյանը չի իմացել, որ դրանք նախատեսվում էին, ըստ անհրաժեշտության, գործածել Հայաստանում իշխանության զավթելը իրականացնելու ժամանակ:

Անուշավան Ավետիսյանն, ըստ մեղադրանքի, Հ.Հակոբյանից 2015թ. հուլիսին առաջարկություն ստանալով համապատասխան վարձատրության դիմաց զենք, ռազմամթերք և պայթուցիկ նյութեր հայթայթել և իրացնել Արթուր Վարդանյանին, չիմանալով, որ դրանք նախատեսվում են, ըստ անհրաժեշտության, գործածել Հայաստանում իշխանության զավթելը իրականացնելու ժամանակ, երկուսով, Հակոբ Հակոբյանի հետ նախնական համաձայնությամբ, ձեռնամուխ են եղել այդ գործընթացին:

Ըստ Հարություն Հովհաննիսյանին առաջադրված մեղադրանքի, նա Անուշավան Ավետիսյանից 2015թ. հուլիսին առաջարկություն ստանալով համապատասխան վարձատրության դիմաց զենք, ռազմամթերք և պայթուցիկ նյութեր հայթհայթել և իրացնել, չիմանալով, որ դրանք նախատեսվում են, ըստ անհրաժեշտության, գործածել Հայաստանում իշխանության զավթելը իրականացնելու ժամանակ, Գյումրիում նրան 900 ԱՄՆ դոլարով զենք է իրացրել:

Իսկ ըստ Ստեփան Չիլինգարյանին առաջադրված մեղադրանքի, նա Անուշավան Ավետիսյանից 2015թ. հուլիսին առաջարկություն ստանալով համապատասխան վարձատրության դիմաց զենք, զինամթերք և պայթուցիկ նյութեր հայթհայթել և իրացնել, չիմանալով, որ դրանք նախատեսվում են, ըստ անհրաժեշտության, գործածել Հայաստանում իշխանության զավթելը իրականացնելու ժամանակ, Գյումրիում նրան 4700 ԱՄՆ դոլարով զենք է իրացրել:

Հարություն Հովհաննիսյանի պաշտպան, փաստաբան Խաչատուր Խաչատրյանը միջնորդեց իր պաշտպանյալին դատապարտել 8 ամսից ոչ ավելի ժամանակով ազատազրկման ու ազատ արձակել դատարանի դահլիճում (Հ. Հովհաննիսյանը կալանքի տակ է գտնվում անցյալ տարվա դեկտեմբերից): Իսկ եթե դատարանը գտնի, որ ամբաստանյալը ավելի երկար ժամանակով պետք է ազատազրկվի, պաշտպանն այդ դեպքում միջնորդեց պատիժը պայմանականորեն չկիրառել:

Խ.Խաչատրյանը խնդրեց դատարանից պատիժ նշանակելիս հաշվի առնել մեղմացուցիչ և անձը բնութագրող հանգամանքները՝ մասնավորապես, այն, որ իր պաշտպանյալը նախկինում դատապարտված չի եղել, բնակության վայրում դրական է բնութագրվում, կինը ու մինչև 14 տարեկան երկու երեխաները գտնվում են նրա խնամքին, խոստովանական ցուցմունք է տվել ու զղջացել, ունի առողջական խնդիրներ:

Իսկ ամբաստանյալ Ստեփան Չիլիգարյանի պաշտպան Մարտին Զիլֆուղարյանը միջնորդեց դատարանին բավարար համարել, որ իր պաշտպանյալն 9 ամիս գտնվում է կալանքի տակ և ազատ արձակել դատարանի դահլիճում կամ նշանակված պատիժը պայմանականորեն չկիրառել:

Պաշտպանը նշեց, որ իր պաշտպանյալը վաճառել է պապից ու նրա եղբորից մնացած զենքը՝ նյութական ծանր վիճակից ելնելով: Պաշտպանը խնդրեց հաշվի առնել, որ Ս.Չիլինգարյանը տվել է խոստովանական ցուցմունքներ, անկեղծորեն զղջացել է իր կատարած արարքի համար: Պաշտպանը հայտնեց, որ ամբաստանյալն ունի առողջական խնդիրներ, նախաքննության ժամանակ նրա հայրը մահացել է, մայրը վատառողջ է:

Մյուս երկու ամբաստանյալների պաշտպանները խնդրեցին ժամանակ տրամադրել պաշտպանական ճառերի հրապարակմանը նախապատրաստվելու համար՝ դատարանը հետաձգեց դատական նիստը մինչև սեպտեմբերի 7-ը:

Աղբյուր` Փաստինֆո