Փաստ ինֆո

Այսօր դատարանը կքննի պատգամավորից շորթման մեջ մեղադրվող «Analitik.am» կայքի տնօրեն Անի Հովհաննիսյանի կալանքի ժամկետը երկարացնելու միջնորդությունը: Այս մասին «Փաստինֆո»-ի թղթակցին հայտնեց մեղադյալի պաշտպան, փաստաբան Լիպարիտ Սիմոնյանը:

Միջնորդության մեջ քննիչը նշել է. «Անի Հովհաննիսյանը ազատության մեջ մնալով,..... կխոչընդոտի մինչդատական վարույթում կամ դատարանում գործի քննությանը՝ քրեական դատավարությանը մասնակցող անձանց վերաբերյալ վարկաբեկիչ նյութերի հրապարակման կամ հրապարակային սպառնալիքի եղանակով»:

Զինվորի արյունը, պատերազմի թեման ու ազգի պատիվը Անին գնահատել էր 1.000.000 դրամ ամսական. Բացահայտումներ «Անալիտիկի գործի» շուրջ. Տիգրան Ուրիխանյան

Ըստ պաշտպանի, գործի նյութերից էլ ակնհայտ է, որ նրա նկատմամբ քրեական հետապնդում է սկսվել իրականացվել այն ժամանակ, երբ «Անալիտիկ» կայքում սկսել է հրապարակումներ կատարել ՎՏԲ-բանկի և այդ բանկում ադրբեջանական կապիտալի վերաբերյալ:

«Մի կողմից էլ անհասկանալի է, որ չկատարած արարքի համար Անի Հովհաննիսյանին, ով ռիսկ է ունեցել բացեիբաց դուրս գալ ռուսական բանկի դեմ /նշելով, որ դրանում կա նաև ադրբեջանական կապիտալ/, արդեն 4 ամիս է պահում են կալանքի տակ, որպեսզի այլևս հրապարակումներ չկատարի»,- ասաց պաշտպանը:

Հիշեցնենք, որ քրեական գործի նախաքննության ընթացքում «analitik.am» լրատվական կայքի գործադիր տնօրեն Անի Հովհաննիսյանին և աշխատակից Վարդիթեր Գիշյանին մեղադրանք է առաջադրվել ՀՀ քրեական օրենսգրքի 182-րդ հոդվածի 2-րդ մասի 2-րդ կետով:

Ըստ մեղադրանքի՝ «analitik.am» լրատվական կայքի աշխատակիցները կայքում պարբերաբար ՀՀ ԱԺ պատգամավոր Տ.Ուրիխանյանի անձի, ընտանիքի անդամների, ինչպես նաև վերջինիս գործունեությանը վերաբերող սուտ տեղեկատվություններ, զրպարտություններ և վարկաբեկիչ այլ նյութեր հրապարակելու կապակցությամբ հանդիպումներ են ունեցել նրա հետ, և նմանօրինակ հրապարակումները չդադարեցնելու և հետագայում նույնաբովանդակ այլ հոդվածներ հրապարակելու սպառնալիքով՝ իրենից պահանջել են յուրաքանչյուր ամիս վճարել 300 հազ. ՀՀ դրամ:

Աղբյուր` Փաստինֆո