Փաստ ինֆո

Արցախյան հիմնախնդրի կարգավորման դիվանագիտական գործընթացը փակուղում է:

Այս մասին, ինչպես նշում է «Արցախպրես»-ը, այսօր լրագրողների հետ զրույցում ասաց ԱԺ պատգամավոր Թևան Պողոսյանը:

«Պայմանավորվածությունները, որոնք ձեռք են բերվել Վիեննայում, կյանքի չեն կոչվում: Վստահության բարձրացման ուղղությամբ ձեռքբերված պայմանավորվածությունները չեն կատարվում: Առաջնագիծը մոնիտորինգի չի ենթարկվում, հետաքննական մեխանիզմները չեն տեղադրվում: Արցախում սեփական ուժերով են ամրապնդում առաջնագիծը, որ ապրիլյան էսկալյացիայի բացերը, որոնք ունեցել ենք, չկրկնվեն»,- ԹԵՐԹ.ամ-ի փոխանցմամբ՝ ասաց Թևան Պողոսյանը:

Նա նշեց, որ, արցախցիների շրջանում անցկացված սոցիալական հարցման համաձայն, մարդիկ պատրաստ չեն զիջումների, ուզում են շարունակել պայքարը, ինչը, Թևան Պողոսյանի խոսքով, ողջունելի է:

Պատգամավորը շեշտեց, որ ԼՂ հակամարտության կարգավորում տեղի չի ունենա, քանի դեռ Արցախը բանակցային սեղանի շուրջ չի նստել: «Կարող են բանակցել տարբեր մտավարժանքների, փաստաթղթերի շուրջ, որոնք կգան ու կգնան, բայց ամեն ինչ որոշվելու է միայն այն դեպքում, երբ հենց Արցախի ներկայացուցիչները նստած լինեն Արցախի բանակցությունների սեղանին»,- հավելեց Պողոսյանը:

Թևան Պողոսյանի խոսքով՝ ԼՂ-ն պետք է պատրաստ լինի ռազմական գործողություններով հարցը լուծելուն, որովհետև ունի Ադրբեջանի պես հակառակորդ, ունենա հզոր բանակ, ապահովի բանակի գործունեության համար անհրաժեշտ բոլոր պարագաները, ունենա լավ ռազմական տեխնիկա:

Ինչ վերաբերում է տեսակետներին, որ հարցը կլուծվի հողերի հանձնման գնով, Թևան Պողոսյանն ասաց, որ հողերի վերադարձ չի լինի:

«Նոր եմ վերադարձել Արցախից։ Այն, ինչ տեսել եմ, վստահություն է ներշնչում, որ մարդիկ հողեր չեն հանձնելու, կորցրածն են վերադարձնելու: Հասկանում եմ, որ մարդիկ կան, որոնք հայրենասիրությունից են դրդված հարցը բարձրացնում, որ համախմբվեն, մարդիկ կան, որոնք այլ հարցերի համար են շահարկում, բայց այս խոսակցությունները որևէ դրական ազդեցություն չեն ունենում մարդկանց վրա, ովքեր կատարում են աշխատանքը, պահում են սահմանները: Մի թիզ հող չի հանձնվելու: Խորհուրդ կտամ բոլորին գնալ Արցախ, տեսնել տրամադրությունները: Այս հարցը սերունդների խնդիր է, սա երկար է տևելու»,- նշեց ԱԺ պատգամավորը՝ հավելելով. «Մենք կմոտենաք, հավանաբար, ընկալմանը, որ հակառակորդի հետ հնարավոր է խոսել, երբ Ադրբեջանում պատմության դասագրքերը դեն նետվեն աղբաման, գրվեն նոր իրական պատմություններ: Մենք պետք է մի բան հասկանանք. այն, ինչին մեր պապերի պապերը համաձայնել են 20 թ.-ին, այն լուծումը չէր, որ իրենք ուզում էին թողնել թոռներին: Մեր վրա եկեք նման խնդիր չվերցնենք, չշտապենք»:

Թևան Պողոյանի խոսքով՝ առջևում ժամանակահատված է, երբ լուրջ բանակցային գործընթաց չի լինի: «ԱՄՆ-ում ընտրություններ են սպասվում, Հայաստանում ևս՝ սկզբում ՏԻՄ ընտրություններ, հետո՝ խորհրդարանական…»,- նշեց պատգամավորը:

Tert.am-ի դիտարկմանը, թե ԼՂ նախագահի խոսնակը հայտարարեց, որ զիջումները միակողմանի չեն լինելու, Թևան Պողոսյանն այսպես արձագանքեց. «Նա կատարում է դիվանագիտական աշխատանք: Նա նկատի է ունեցել, որ մեզ վրա որևէ մեկ անգամ հույս չդնեք, որ մենք փորձելու ենք ինչ-որ բան միակողմանի անել: Քայլերը միակողմանի չեն լինելու: Սա է»:

Լուսանկարը՝ Sputnik-ի

Աղբյուր` Փաստինֆո