Փաստ ինֆո

Արցախի պողոտայում մայթի վրա 22-ամյա երիտասարդին վրաերթի ենթարկած և անզգուշությամբ մահ պատճառելու մեջ մեղադրվողը դատապարտվեց պայմանական ազատազրկման: 

Էրեբունի և Նուբարաշեն վարչական շրջանների ընդհանուր իրավասության դատարանի դատավճռով, 24-ամյա Աշոտ Հովհաննիսյանը մեղավոր է ճանաչվել ՀՀ քրեական օրենսգրքի 242-րդ հոդվածի 2-րդ մասով և դատապարտվելով 1 տարի 6 ամիս ժամկետով ազատազրկման:

Միևնույն ժամանակ դատարանի դատավճռով Աշոտ Հովհաննիսյանի նկատմամբ պատիժը պայմանականորեն չի կիրառվի՝ սահմանվել է փորձաշրջան 1 տարի ժամկետով։

Մինչև դատաքննությունը սկսելն ամբաստանյալն առաջադրված մեղադրանքում իրեն մեղավոր ճանաչելով միջնորդել է կիրառել դատական քննության արագացված կարգ։

Ըստ մեղադրանքի՝ Աշոտ Հովհաննիսյանը 19.01.2016թ. ժամը 16:00 սահմաններում «ԲՄՎ» մակնիշի ավտոմեքենան վարել է Տիգրան Մեծ պողոտայի կողմից դեպի Էրեբունի փողոց տանող ուղեմասի ձախ եզրային գոտով և հասնելով Արցախի պողոտայի թիվ 14 հասցեի դիմաց` թույլ է տվել ՃԵԿ-ի 65,66 և 67 կետերի ու «Ճանապարհային երթևեկության անվտանգության ապահովման մասին» ՀՀ օրենքի 23 հոդվածի 3-րդ կետի պահանջներին հակասող գործողություններ, որի հետևանքով կորցրել է ավտոմեքենայի կառավարումը, իր գործողություններով ստեղծել է վթարային իրադրություն, դուրս է եկել երթևեկելի գոտուց, վրաերթի ենթարկել մայթի վրայով քայլող հետիոտն Ա.Ներսիսյանին և անզգուշությամբ պատճառել մահ` ինքն իրեն զրկելով վրաերթը կանխելու տեխնիկական հնարավորությունից:

Դատարանն Աշոտ Հովհաննիսյանի պատասխանատվությունը և պատիժը մեղմացնող, ինչպես նաև անձը բնութագրող հանգամանք է դիտել այն, որ նա երիտասարդ է, դրական է բնութագրվում:

Տուժողի իրավահաջորդը՝ մահացած երիտասարդի հայրը Գ. Ներսիսյանը որևէ պահանջ չի ներկայացրել նրա նկատմամբ և դատարանին խնդրել է ամբաստանյալի նկատմամբ նշանակել ազատազրկման հետ կապ չունեցող պատիժ:

Արցախի փողոցում՝ մայթի վրա, վրաերթի ենթարկված երիտասարդը 16 օր անց գիտակցության չգալով մահացել է

Միևնույն ժամանակ դատարանն արձանագրել է, որ ամբաստանյալը զղջացել է կատարած արարքի համար և ընդունել է մեղքը, ինչը վկայում է այն մասին, որ նա լրիվ գիտակցել է իր արարքի հանրային վտանգավորությունը և զղջացել դրա համար:

Ավելի վաղ «Փաստինֆո»-ն տեղեկացրել էր, որ դեպքից անմիջապես հետո վրաերթի ենթարկված 22-ամյա Արամ Ներսիսյանը շտապօգնության ավտոմեքենայով տեղափոխվել էր «Էրեբունի» բժշկական կենտրոն, որտեղ նրա առողջական վիճակը գնահատվել էր ծայրահեղ ծանր:

Շուրջ 16 օր անց գտնվելով անգիտակից վիճակում այդպես էլ գիտակցության չգալով երիտասարդը մահացել է:

Աղբյուր` Փաստինֆո