Փաստ ինֆո

Aravot.ամ-ն անդրադարձել է օրեր առաջ Դսեղում տեղի ունեցած ծառահատման դեպքին և զրուցել Չարենցի անվան գրականության եւ արվեստի թանգարանի տնօրեն Կարո Վարդանյանի հետ, որը նաեւ համակարգում է Դսեղում գործող Հովհաննես Թումանյանի անվան տուն-թանգարանի աշխատանքները: Այս թանգարանը Չարենցի անվան գրականության եւ արվեստի թանգարանի 6 մասնաճյուղերից մեկն է:

«Ոչ մի ծառ ապօրինի չի հատվել»,-լրատվամիջոցի հետ զրույցում պնդել է Կարո Վարդանյանը՝ ներկայացնելով բոլոր այն իրավասու մարմինների եզրակացություններն ու թույլտվությունները, որոնց հիման վրա թանգարանի տարածքի մի քանի ծառերը հատվել են. «Ինչ ասես, որ չգրեցին՝ անհայտ չարագործներ, ապօրինի հատել են եւ այլն: Բայց ոչ ոք հետաքննություն չարեց, չհետաքրքրվեց, թե իրականում ինչո՞ւ են հատվել այդ ծառերը: Եթե չհատվեին հետեւանքը սարսափելի կլիներ, եթե մի ծառ ընկներ, այն ժամանակ ոչ թե կասեին անհայտ չարագործը, այլ, ինձ ազգի թշնամի կհանեին»:

Կ.Վարդանյանի խոսքերով՝ այս պատմությունն 9-10 ամիսների վաղեմություն ունի: Խնդիրը ծագել է անցյալ տարվա նոյեմբերի 12-ին, երբ մասնաճյուղի վարիչից տնօրենը ահազանգ է ստացել, այն մասին, որ քամու հետեւանքով 2 ծառ կոտրվել են եւ մեկն ընկել է մասնաշենքի թիթեղյա տանիքի հատվածի վրա, մյուսն էլ՝ Թումանյանի կիսանդրու վրա.

«Բարեբախտաբար այդ թիթեղյա տանիքը դիմացել էր, որովհետեւ շենքը 200 եւ ավելի տարվա է, հնամաշ եւ հիմնական մասի տանիքները փայտյա են: Այսինքն` դա մեծ մտահոգություն էր եւ այս դեպքից առաջ էլ այն կար: Երբ քամի էր բարձրանում այդ ծառերն այնպես էին ճարճատում ու ճռճռում, որ այցելուներին էլ էինք միշտ զգուշացնում՝ դրանց տակով զգույշ անցնել: Դեպքի համար դիմեցինք արտակարգ իրավիճակների նախարարության փրկարար ծառայությանը: Եկան այդ տապալված ծառերը զգուշորեն հատեցին, որպեսզի տանիքը հնարավորինս քիչ վնասվի: Դրան հաջորդեց Դսեղ համայնքի ղեկավարության գրությունն՝ ուղղված ինձ, քանի որ մեր տարածքն էր դա, մեր իրավասության ներքո, եւ առկա էր վտանգը մյուս 10-15 ծառերն էլ նույն թեքված վիճակում էին տանիքի վրա եւ քամուց կարող էին տապալվել, ինձ առաջարկում էին լուծել այդ ծառերը հատելու խնդիրը եւ փոխարենը բակը պատել թփուտներովլ»:

Դսեղում ապօրինի ծառահատման դեպքի առթիվ քրեական գործ է հարուցվել

Հիշեցնենք, որ դեպքի առթիվ ՀՀ քննչական կոմիտեի Լոռու մարզային քննչական վարչության Թումանյանի քննչական բաժնում հարուցվել է քրեական գործ: Իրավապահների համար հիմք է հանդիսացել լրատվամիջոցներով օգոստոսի 18-ին տարածված այն տեղեկատվությունը, որ Լոռու մարզի Դսեղ գյուղում ապօրինի հատվել են հայ մեծանուն գրող Հովհաննես Թումանյանի անվան տուն-թանգարանի տարածքի եղեւնիներ եւ այլ տեսակի ծառեր՝ բուսական աշխարհին պատճառելով զգալի վնաս:

Մանրամասները՝ սկզբնաղբյուր-կայքում

Աղբյուր` Փաստինֆո