Փաստ ինֆո

Վերաքննիչ քաղաքացիական դատարանը վիրավորանքի, զրպարտության և գործարար համբավը արատավորելու պատճառով իրավունքի պաշտպանության հայցի գործով մասնակի բեկանել է Երևանի Շենգավիթ վարչական շրջանի ընդհանուր իրավասության դատարանի կայացրած վճիռը և այդ մասով ուղարկել է գործը նոր քննության:

Ռիմա Երիցյանը, «Այթիմաստեր» ՍՊ ընկերությունը, Սուրեն Երիցյանը հայցադիմում են ներկայացրել դատարան ընդդեմ Հերմինե Անտոնյանի, Արտակ Առաքելյանի, Մերինե Առաքելյանի, Ռիմա Առաքելյանի և խնդրել պարտավորեցնել պատասխանողներին վիրավորանքի և զրպարտության համար հրապարակայնորեն ներողություն խնդրել Ռիմա Երիցյանից և Սուրեն Երիցյանից, պարտավորեցնել պատասխանողներին «Այթիմաստեր» ՍՊ ընկերություն ուղարկել գրավոր դիմում`«Այթիմաստեր» ՍՊ ընկերության հասցեին իրենց կողմից գրված զրպարտող արտահայտությունների անհիմն լինելու մասին, պատասխանողներից համապարտության կարգով հօգուտ Ռիմա Երիցյանի բռնագանձել 1.500.000 դրամ, որից 500.000 դրամը որպես վիրավորանքներով հասցված վնասի փոխհատուցում, 1.000.000 դրամը որպես զրպարտություններով հասցված վնասի փոխհատուցում, պատասխանողներից համապարտության կարգով հօգուտ Սուրեն Երիցյանի բռնագանձել 3.000.000 դրամ, որից 1.000.000 դրամը որպես վիրավորանքներով հասցված վնասի փոխհատուցում, 2.000.000 դրամը որպես զրպարտություններով հասցված վնասի փոխհատուցում, պատասխանողներից համապարտության կարգով հօգուտ «Այթիմաստեր» ՍՊ ընկերության բռնագանձել 2.000.000 դրամ որպես զրպարտություններով և գործարար համբավն արատավորող արտահայտություններով հասցված վնասի փոխհատուցում, պատասխանողներից համապարտության կարգով հօգուտ Ռիմա Երիցյանի բռնագանձել 450.000 դրամ, որից 300.000 դրամը որպես ապրուստի միջոց գույքը խլելու պատճառով հասցված բարոյական վնասի փոխհատուցում, 150.000 դրամը որպես բժշկական ծախսերի փոխհատուցում, պատասխանողներից համապարտության կարգով հօգուտ Սուրեն Երիցյանի բռնագանձել 500.000 դրամ որպես ապրուստի միջոց գույքը խլելու պատճառով հասցված բարոյական վնասի փոխհատուցում, պատասխանողներից համապարտության կարգով հօգուտ «Այթիմաստեր» ՍՊ ընկերության բռնագանձել 800.000 դրամ, որից 300.000 դրամը որպես գույքի ապօրինի տիրապետման ամբողջ ժամանակամիջոցում ստացած եկամուտների փոխհատուցում, 500.000 դրամը որպես այն եկամուտների փոխհատուցում, որը պատասխանողները կարող էին ստանալ գույքի ապօրինի տիրապետման ամբողջ ժամանակամիջոցում:

Վերաքննիչ դատարանը գտել է, որ սույն գործով առաջին ատյանի դատարանի կողմից թույլ է տրվել դատավարական իրավունքի նորմի խախտում, որը կարող էր հանգեցնել գործի սխալ լուծման:

Մասնավորապես, սույն գործով հայցվորները դատարան ներկայացնելով վիրավորանքի, զրպարտության և գործարար համբավը արատավորելու պատճառով իրավունքի պաշտպանության հայց`միաժամանակ ներկայացրել են միջնորդություն` նման պահանջ ներկայացնելու համար օրենքով սահմանված դատավարական ժամկետը բաց թողնելու պատճառը հարգելի ճանաչելու և բաց թողած ժամկետը վերականգնելու մասին:

Գործի նյութերի ուսումնասիրությունից պարզ է դառնում, որ Դատարանը որևէ կերպ` ո՛չ առանձին դատական ակտով, ո՛չ էլ վճռով չի անդրադարձել հայցվոր կողմի ներկայացրած միջնորդությանը և հաշվի առնելով այն հանգամանքը, որ վիրավորանքի, զրպարտության և գործարար համբավը արատավորելու պատճառով իրավունքի պաշտպանության հայցը մերժվել է նման հայց ներկայացնելու համար օրենքով նախատեսված մեկամսյա ժամկետի բացթողման հիմքով, ուստի հայցվոր կողմի ներկայացրած միջնորդությանը չանդրադառնալը կարող էր այդ մասով հանգեցնել գործի սխալ լուծման: Ուստի Դատարանի կողմից թույլ տրված դատավարական սխալը տվյալ դեպքում հիմք է դատական ակտի բեկանման համար:

Միևնույն ժամանակ Վերաքննիչ դատարանը հարկ է համարել արձանագրել, որ թեև վերաքննիչ բողոքի խնդրամասում բողոքաբերները խնդրել են Դատարանի վճիռը բեկանել ամբողջությամբ, սակայն բողոքի բովանդակությունից պարզ է դառնում, որ այն վերաբերում է միայն վճռի առաջին մասին /վճռի եզրափակիչ մասի առաջին պարբերությանը/, այն է` վիրավորանքի, զրպարտության և գործարար համբավը արատավորելու մասով ներկայացված պահանջները մերժելուն, որոնք մերժվել են հայցային վաղեմության կիրառման հիմքով:

Մինչդեռ վերաքննիչ բողոքը չի պարունակում որևէ հիմքեր և հիմնավորումներ բարոյական վնասի, բժշկական ծախսերի հատուցման, գույքի ապօրինի տիրապետման ամբողջ ժամանակամիջոցում ստացած եկամուտների փոխհատուցման պահանջները մերժելու մասով Դատարանի կողմից թույլ տրված այս կամ այն սխալի մասով:

Վերադաս դատարանն հիշեցնում է, որ ՀՀ քաղաքացիական դատավարության օրենսգրքի 219-րդ հոդվածի 1-ին մասի համաձայն` Վերաքննիչ դատարանը դատական ակտը վերանայում է վերաքննիչ բողոքի հիմքերի և հիմնավորումների սահմաններում: Ուստի բողոքարկվող դատական ակտը ենթակա է բեկանման միայն վիրավորանքի, զրպարտության և գործարար համբավը արատավորելու մասով ներկայացված պահանջների` հրապարակային ներողություն խնդրելուն, «Այթիմաստեր» ՍՊԸ-ին գրավոր դիմում ուղարկելուն պարտավորեցնելու, հօգուտ հայցվորների, ընդհանուր առմամբ 6.500.000 ՀՀ դրամ բռնագանձելու պահանջների մասով, իսկ մնացած մասով Դատարանի վճիռը պետք է թողնել օրինական ուժի մեջ:

Աղբյուր` Փաստինֆո