Փաստ ինֆո

Ֆրանսիայի Ազգային ժողովի թերթը պարզաբանում է ներկայացրել ԼՂՀ նախագահ Բակո Սահակյանի հարցազրույցում «հայեր եւ ղարաբաղցիներ» բառերն օգտագործելու եւ թյուրիմացությունների տեղիք տալու համար: Այդ մասին այսօր Armtimes.com-ի հետ զրույցում տեղեկացրեց ԼՂՀ նախագահի մամուլի խոսնակ Դավիթ Բաբայանը:

«Ղարաբաղցիներ եւ հայեր արտահայտության հետ կապված մենք դիմել ենք Ֆրանսիայի Ազգային ժողովի ներկայացուցիչներին: Ներողություն են խնդրել եւ նշել, որ իրենց լեզվին եւ մտածելակերպին համապատասխան են թարգմանել այդպես, այլ ոչ թե ինչ-որ նպատակներից դրդված: Բացատրել են, որ ֆրանսիական լեզվի համար այդպես է ճիշտ: Խնդիրը նրանում է, որ ֆրանսերեն լեզուն ազգն ու պետութունը չի տարանջատում: Հետեւաբար, երբ որ նրանք գրել են ղարաբաղցիներ եւ հայեր, դրանով փորձ է արվել ցույց տալ, որ Արցախը անկախ պետություն է: Իրենք չեն հասկանում այդ նրբությունը, որ արցախցիները հայեր են»,- հայտարարեց Բաբայանը:

Նա իրականում տեղի ունեցածը հսկայական հաղթանակ է համարում եւ ընդգծում է, որ պետք չէ ադրբեջանցիների խայծն ուտել եւ նյարդայնանալ: Խոսքն ահա թե ինչի մասին է.

«Այս հարցազրույցը եւ այդ աղմուկը, որ բարձրացվել էր, ես ավելի քան համոզված եմ, որ սա Ադրբեջանի եւ Թուրքիայի նյարդային ռեակցիայի արդյունքն էր: Խնդիրը նրանում է, որ վերջին տարիներին Արցախի մասին օբյեկտիվ տեղեկատվություն է սփռվում բազմաթիվ առաջատար լրատվամիջոցներով: Այստեղ եկել են «New York Times»-ից, «Figaro»-ից, ռուսական, ֆրանսիական, Մերձավոր Արեւելքի առաջատար ալիքներից: Սա գագաթնակետին է հասել ապրիլյան պատերազմի օրերին, երբ որ այստեղ էին գրեթե բոլոր առաջատար համաշխարհային լրատվամիջոցները: Եվ հիմա էլ նախագահի հարցազրույցը տպագրվում է Ֆրանսիայի խորհրդարանի թերթում: Դե հիմա պատկերացրեք Ադրբեջանի վիճակը. նրանք պետք է դեսպանին հանեն, նրանք պետք է Ֆրանսիայի Ազգային ժողովին դատի տան, Ֆրանսուա Օլանդին սեւ ցուցակ գցեն, բայց սա դժվարին մի բան է, որը չի կարող արվել: Հետեւաբար Ադբեջանը սկսել է շահարկել, սուտ լուրեր տարածել, թե իբրեւ այդ հարցազրույցում գրված է զիջում, հայեր եւ ղարաբաղցիներ: Հայկական անունների տակ հանդես եկող ադրբեջանցի ֆեյքերն էին սփռում հայհոյանքներ եւ այլն: Ադրբեջանը նեղված է, որովհետեւ հսկայական նավթադոլարներ են ծախսում քարոզչության վրա, բայց այսպիսի բացթողում անում: Դրա համար, որ քողարկեն սխալները, հայության մեջ պառակտում են մտցնում: Դժբախտաբար հայկական ոչ ադեկվատ հոգեւոր ներաշխարհ ունեցող մարդիկ միացել էին, մի մասը բնազդով, որ միշտ պետք է հայհոյեն»,-ասաց Բաբայանը:

Մանրամասները՝ սկզբնաղբյուր կայքում

Աղբյուր` Փաստինֆո